Ua tuuaia e le tamā o Vaipu‘a Manoa Leiloa ma lona aiga le pepelo o faamatalaga na tuuina atu e le loia a le avepasi o Felise Tuaoi, 53 tausaga o Magiagi i luma o le faamasinoga na taua ai le faia e le aiga o Felise o ni Ifoga ma ni faatoesega i aiga o le au manunua ma le au maliliu mai le faalavelave tau taavale na mafuli ma taavalevale ai le pasi a Lalomauga i le aso 9 o Novema o le tausaga na te‘a nei.
O le mau a Vaipu‘a ma lona uso na auai i le lauina o le faaiuga faatasi ai ma nisi o lona aiga, e lei oo atu se Ifoga poo se faatoesega, ae e toatolu tagata o lona aiga na maliliu ai i le faalavelave.
Fai mai le tamā ua lagona lona le fiafia i lea folasaga i le faamasinoga ae e le moni.
“O fea la se tu ma se aganuu faapea na faia e lou aiga?”, o le fesili tuusao lea a Vaipu‘a a o faafofoga ane Felise ma nisi o lona aiga i fafo o le potu faamasino o le Faamasinoga Faaitumalo ina ua mae‘a ona lau le faaiuga a le afioga i le faamasino o Tauiliili Fao Harry Schuster.
E leai se faamatalaga na gagana ai Felise poo se isi o lona aiga, ae o alii leoleo sa tiute i le fale faamasino na nanati ane ma faatoatoa lagona le fiafia o le tamā o Vaipu‘a ma nisi o lona aiga.
“O loo sisila le Atua i le tulaga lenei ua folasia e Felise ma lana loia ae e le sa‘o ma moni i le silafaga ati a le silisiliese”, o le toe faaopoopo mai lea o Vaipu‘a Manoa Leiloa i se fesili a le tusitala.
E lua moliaga na ioeina e lē ua molia, e aofia ai le moliaga o le ave taavale matautia ua maliliu ai nisi, ma le ave taavale matautia ua manunua ai ni tagata.
E toavalu na maliliu i le faalavelave ae 24 na manunua e pei ona faaalia e leoleo i le latou folasaga i le faamasinoga.
Na saunoa le alii faamasino o Tauiliili Fao Harry Schuster ma ia faailoa i le susuga a Felise le matuia ma le ogaoga o le faalavelave na tupu.
“E te lei aveina le pasi mo oe, ae sa e aveina ma lou silasila i le mamalu o le pasese na malaga”, o se vaega lea o le finagalo o le alii faamasino.
Sa luelue ane le ulu o lē ua molia o se faailoga o lona ioeina o le finagalo o le faamasinoga.
Sa faailoa foi e Tauiliili le matuia o le mea na tupu ona sa taumafai nisi o le pasese e fautua le alii avepasi e faaalu lemu le taavale, ae sa ia le logosaia se fautuaga.
O le tala foi lea a le tamā o Vaipu‘a e faapea na faailoa atu e leoleo ia te ia, o lona toalua na maliu ai i le faalavelave na tosoina faalua le logo ma fautua i le avepasi e faalemu, ae tali ane le alii o Felise, “a ua iai sou nofoaga ona filemu lea”, na faamatala ai Vaipu‘a.
E lei fia faaalia se finagalo o lē ua faasalaina ina ua talosaga i ai le tusitala.
Na vave ona tali ane se tasi o mafine o lona aiga e le toe faia ni interview.
O le moliaga o le ave taavale matautia ua maliliu ai ni tagata, e 5 tausaga le faasalaga faafalepuipui, ae o le moliaga o le ave taavale matautia ua manunua ai nisi e 3 tausaga.
E tuli eseese faasalaga o lona uiga e tuli atoa le valu, ma o se faaiuga lea a le faamasinoga ua teena ai le talosaga a le loia a Felise ina ia tuli faatasi.
E iai nisi o moliaga tau taavale afi o le ua molia ma faasalaina, peitai o le taimi muamua lea ua tulai ai i le faamasinoga i se solitulafono matuia e aafia ai soligatulafono o taavale afi.
