Maliu le Faauluuluga o le Faatāua le Ola

O lana tautua galue sa taulai i le faasaoina o soifua o tagata Samoa, o se auaunaga sa pele ia te ia, ma e molimau uma ana uo, o aiga, ma i latou sa galululue soosootauau ma lenei tina, i le tele o faataulaga ma le tuuina atu atoa o lona soifua galue i lana tautua.
Ae o le vaiaso na tuanai atu nei, na logoina ai le atunuu i se tala faanoanoa, ina ua maliu filemu i le maota gasegase i Motootua lenei tina, le faletua ia Ofeira Salevao-Manutai.
O se finauga umi ma gasegase o le tino ua maliu ai lava lenei foi taitai iloga i galuega fesoasoani ma faalapotopotoga tumaoti i totonu o Samoa.
O lona tomai faafaufautua ia i latou ua lofituina i mafatiaga o le olaga nei, na amata ai lava ona faatu le faalapotopotoga lenei ua ta‘ua o le Faatāua le Ola.
O se faalapotopotoga iloga i le tali atu ia i latou e moomia le fesoasoani ma na faatu ai foi ma se fesoasoani e 24 itula e ala i telefoni auā le fesootai atu o soo se tasi ua mafatia tele i faafitauli o le soifua ia i latou ua faamaonia latou te tali atu ma ofo atu fautuaga ia i latou ua sulufai atu e ala i telefoni.
E le gata i lea, o polokalame na faalauiloa ai galuega faatino a le Faatāua le Ola na manino le toatele o le atunuu na tali mai i ai.
O lenei polokalame na fofogaina lava e le tamaitai lenei o Ofeira Salevao na toatele le atunuu na mafai ona sasaa mai ai a latou foi fautuaga, o fesoasoani aemaise o le faasoa mai o faafitauli o loo feagai ma i latou i lea vaiaso ma lea vaiaso.
O se tamaitai lenei o le a lē taumate le toatele o le atunuu o le a misia i nei polokalame i luga o le ea.
O ana faasalalauga foi i luga o le televise o loo faaauau e oo mai i le taimi nei ma ua faapea ona faatalatalanoa ai nisi o mataupu e tele ina lē amanaia e le atunuu ae ua tutupu mai ai faafitauli e pei o tamaitai o loo maua i mafatiaga i le mae‘a ai ona fananau.
O tamaitai o loo maua i faafitauli pe a oo ina suia le soifua fanau ma avea ai ma tina matutua. O soo se tasi ua iai faalogona e fia pule i le ola.
E iai le talitonuga o galuega fesoasoani na ofo atu e le Faatāua le Ola i le faamalumaluga a lenei tamaitai, na telē se fesoasoani i le tuuitiitia ai o le fuainumera o i latou ua pule i o latou lava soifua i totonu o Samoa i le faasolo mai ai o tausaga.
O lenei foi finau a le tamaitai o Ofeira na vaaia ai se faatasiga e ta‘ua o le “Savali mo lou Soifua”.
O se tuufaatasiga lea ua auai ai taitai o le atunuu i se tamoega ma se savaliga i le talafatai o le taulaga o Apia i tausaga taitasi.
O le finau lenei a lea tina o le a manatua ai pea e taitai ma tagata o Samoa.
E oo mai le taimi o lenei lipoti e lei faamautinoa mai se aso tonu o toe sauniga o lenei tina.