Ua faaalia le lagolago a le Asosi o Faafafine i le toe iloiloina o le Tulafono faasaga ia i latou – O se tasi lea o le tele o vaega o le Tulafono o Soligatulafono o loo tapa ai finagalo o le atunuu e pei ona amata ai feiloaiga i le faaiuga o le vaiaso.
Faaalia e le Peresitene o le Asosi a Faafafine, Tootooalii Roger Stanley, o le tulafono ua faia faasaga i faafafine ua tutusa lava ma le tele o vaega o lenei tulafono, ua leva ona tatau ona sui ina ia ogatusa ma le suiga ua iai le olaga i Samoa nei i lenei vaitau.
O le vaega lenei o le tulafono o soligatulafono ua tapu ai soo se alii ona o latou faataitai uiga o tamaitai ma ua faasa ai ona faia e alii ni laei o tamaitai.
O le faasalaga e pei ona maioio mai ai i le Tulafono lea o le 1961 e mafai ai ona nofo i le falepuipui i se umi e le sili atu i le 6 masina poo le sala tupe foi e $200 (tala Samoa).
E ui lava la na amata mai lenei tulafono i le tausaga e 1961 e le o vaaia lava i lenei vaitaimi le faamalosia e le tulafono.
O le valaau la a le Komisi o loo toe iloiloina Tulafono o Soligatulafono ua tapa ai loa se finagalo faaalia o le mamalu lautele o le atunuu.
O le mau a le Komisi e aoga lava le faasoa mai o le atunuu ona o soifua ia o loo aafia i lalo o nei suiga. Ta‘ua e le tamaitai loia o loo faauluulu i ai lenei komisi o Leilani Tuala Warner, e aoga tele le togi ‘aso uma o Samoa i iloiloga nei ma e tele foi finagalo e le o oo i ai se manatu o le au faitulafono.
O le mau a le Asosi o Faafafine, e lelei tele le iloiloga ua fai nei auā o le taimi muamua foi lenei o le a avatu ai se sao o le Asosi o Faafafine i suiga faatatau ia i latou. Ta‘ua e Stanley, mo faafafine lava ia, ua latou lē talia vaega o le tulafono o loo faapea mai o le taumafai lea e faataitai nisi.
“O le taimi lenei, a e alu i Las Vegas i Amerika e te vaaia ai tagata o loo faataitai Elvis poo Michael Jackson.
O le mea lena e ta‘u o le faataitai fua o le isi ae i le tulafono lenei – ou te manatu e tatau ona toe suia aua e le o faataitai e faafafine nisi tagata, ae o le lagona lava ia o ia o le teine ma o le saolotoga foi lea e tatau ona ave pea i le tagata soifua i lana filifiliga”.
O le taimi lenei ua tuufaatasia le tele o kalapu a faafafine sa iai i Samoa ma ua i lalo uma nei o le asosi tele lea a faafafine lea e faatamā ai le Palemia o le atunuu ma ua lagolagoina foi e le tele o taitai o Samoa.
“E ala ona talia le faafafine i Samoa ona o lo latou sao i le tausiga o aiga aemaise o le fesoasoani ai e pei ona o latou saili tupe pea mo tagata matutua i Mapuifagalele aemaise nofoaga o aoaoga mo fanau e iai manaoga faapitoa,” o se faamatalaga lea a Stanley.
“O loo talia foi e le asosi soo se faafafine, ae o le tele lava ua alu lava le tagata e saili lona lumanai e ala i le faatinoga o a latou galuega, o le faatamoega o a latou pisinisi aemaise le tausiga o aiga ma o loo faaauau ona talia lesitala a sui e fia auai i lenei asosi”.
O le mae‘a la o faatalatalanoaga aemaise o finauga i nei mataupu e faatatau i le tulafono e limataitaina ai soifua o faafafine, o le a faamautu ai loa suiga a o lei tuu atu e le Komisi aua se lipoti i le Palemene.
