Avea lenei avanoa e faatalofa aloaia atu ai i le tatou atunuu, i ona tulaga faalupelupeina, mai lava i mauga tetele, seia oo atu i mauga iti, aemaise lava o le aufaitau a le tatou nusipepa a le Samoa Times, e le gata i Niu Sila atoa, a o Ausetalia foi.
E le faagaloina foi le mamalu o Samoa o loo mafai ona faitauina le tatou nusipepa e ala i fesootaiga televavave, i luga o le initaneti. Faamalo lava le soifua manuia, faafetai mo le faatauina o le tatou nusipepa, faafetai foi mo le faaaogaina e ala i le faitauina.
O ou sa Samoa ma ou mamalu e le avea, o le a taoto pea ia faamaene o tailoloto, e le toe faloina foi le afa loloa, ae nuunuu atu ia faatini o tausala, i faleupolu totofi o le atunuu, o la latou fatuaiga tausi lea, ma e le mafai e se vave ona toe auauina.
O paia foi o le aufaigaluega a le Atua i soo se fata faitaulaga o le a lē tāea foi i se manatu vaivai, ma e le gagea foi i sa matou faamatalaga, ae nuuuu ia i le Atua, aua o ia lava e ou paia, sa, ma mamalu o loo tiu ai lana aufaigaluega paia. Viia le Atua!
Ae o lenei taimi e fiafia lava e faailoa atu se tasi lenei o itulau fou o le tatou auaunaga mo vaiaso taitasi. O le itulau ua faaulutalaina “Samoa Saili Malo”.
O lona autu ma lona uiga, o le faitauina lea o ni talaaga e uiga i galuega fita sa tauasa, atoa ai ma matatia sa ausia e nisi o tuaa i tamalii ma failauga, o tamaitai ma auga faapae, ae tainane foi tamafanau a le atunuu, e ala i lo latou soifua galulue i tulaga maualuluga i galuega faapolofesa, ae manatu e faapea foi le galuega a le Atua.
O nisi o i latou ma a latou galuega sa mua-i-malae, o sailiga malo ua mafua ai ona tatou sao i maa o malie, ma aeae manuia e oo mai i lenei taimi.
Ua le gata i totonu o malo ma upufai, a o kamupani ma pisinisi tumaoti, ma soo se auaunaga lava, ua mafai ona mulimulitai ai nisi e oo mai i le taimi nei. O se itulau o le a faitauina ma faaaogaina ai nisi o auala sa latou tauasaina i lo latou foi vaitaimi, ma o loo matamata tetele pea e oo mai lava i le taimi nei.
O tulaga iloga ua mafua ai ona faaeaina, ma taunuu ai miti sa tulitulimatai seia oo lava ina taunuu. E manatu le tatou nusipepa, o se avanoa o le a mafai ona luitauina ai nisi o le a faitau i ai, ma faaaogaina pe fai ma faataitaiga lelei mo le soifua agai i luma pe a manaomia.
Atonu o i latou o le a agai i ai lenei tusitusiga ma tuuina atu i luga o a tatou lomiga i vaiaso taitasi, o lo latou fasoa mai, o so latou foi lea sao mo i tatou o loo tutupu a‘e, a o agai ina gagaifo le la ma aso o lo latou soifua.
E manatu o le a lē mavae ai lea agaga finau, pe motusia le faaauauina pea o ia meaalofa sa faamanuia ai le Atua i o latou soifua galulue, ma tulai mai foi nisi faapei o i latou, e tauavea le tagavai, ma tuufaasolo atu i augatupulaga o loo mulimuli mai, ma saga manuia ai pea Samoa ma lona lumanai.
E momoli atu ai foi le agaga faafetai tele mo i latou uma ua mafai ona tuuina ma faatagaina mai o latou taimi, atoa ai ma a latou faamatalaga uma e fesoasoani mai ai i le amataina o lenei taumafaiga, ma le faamoemoe, o le a tele sona sao ma sona aogā mo nei ma ielua.
O le a amata le tatou itulau mo lenei vaiaso i le susuga i le Papaliitele Peter Taouma.
