Na ulufale le Minisita o A‘oga Taaloga ma Aganuu i le potu faamasino o loo ia faaaoga tootoo ona o loo afaina lona aao (vae) agavale mai le faalavelave tau taavale na aafia ai i le aso 7 o Novema o le tausaga 2009.
O le faaletonu o lona aao na le tulai ai i le pa mo tagata solitulafono, ae sa avane se nofoa ma alala ai i totonu o le faamasinoga i le pito i luma. Na fesili le faamasino afioga Tauiliili Fao Harry Schuster, i le alii minisita pe manao e fai sana loia, ae na ia tali e leai. Na faapea ona tuuina atu ma lana tali ioe i ona moliaga e lua o le ave taavale faatamala poo le careless driving. O le faasalaga maualuga o lea solitulafono o se faasalagatupe e le itiiti ifo ma le $250 tala.
E lua faalavelave tau taavale na aafia ai le afioga Toomata Alapati i le masina o Novema o le tausaga ua mavae 2009.
O le faalavelave i le aso 5 o Novema o le tausaga na tea nei, na tuuaia ai e se ave taxi le minsita i lona so‘aina o le pito i tua o lana taavale. O le aso 7 o Novema o le tausaga lava ua mavae na aafia ai le alii minisita i se isi faalavelave tau taavale i Savaii lea na aafia ai i ni manu‘a tuga e pei ona afaina ai lona aao (vae) agavale ma faaaoga ai tootoo i le taimi nei.
O ni taavale togipau poo rental cars sa faaaoga e le minisita i le taimi o ia faalavelave. Na mafua ona ia faaaoga ia taavale ona sa faaletonu lana taavale masani mo ona tiute faalemalo.
O le ioeina e Toomata o ona moliaga ua le tuuina atu ai e leoleo ni molimau e tusa ai ma aga masani o moliaga faasolitulafono pe a tetee se tagata e molia i se moliaga.
O le aso 16 o le masina fou o Aperila o le a lauina ai se faaiuga o moliaga o le minisita.
O le aafia o le taavale na malaga ai le minisita i le faalavelave na tupu i Savaii na taofia ai i le falemai o Tupua Tamasese Meaole mo ni vaiaso a o faia togafitiga a fomai i lona aao na afaina.
Ua toe manuia ona togafitiga ma ua toe faaauau ona tiute faalemalo. Na uluai ulufale Toomata i le Palemene i le tofi faipule o Salega i le tausaga e 1999 lea na tofia ai o se tasi o failautusi faapalemene mo le Matagaluega o Tina ma Tamaitai.
O le tausaga e 2001 na filifilia ai o se failautusi faapalemene mo le Matagaluega o Pisinisi ma Alamanuia ma Fefaatauaiga, ae o le tausaga e 2005 na tofia ai o se tasi o Minisita o le kapeneta mo le Matagaluega o Faatoaga.
O le mae‘a o le palota tele o le 2006 na filifilia ai e avea ma Minisita o A‘oga Taaloga ma Aganuu.
