“E leai ma so‘u iloa o le faagaioiga o le faatauga o le taavale, aua sa fai uma e le failautusi o le Fono, le afioga Fepuleai”, o le finagalo lea o le afioga i le Fofoga Fetalai, Tolofuaivalelei Falemoe Leiataua, ina ua fesootai atu i ai mo sona finagalo faaalia i le salalau ai o lipoti ma faamatalaga, i le iai o sona aafiaga i le faatauga o le taavale e $175,000 lona tau, ae o se taavale na faaaoga muamua poo se used car.
O le taavale o loo pisapisao ai manatu faaalia o loo faaaoga e le Fofoga Fetalai mo ana galuega tau i lona ofisa.
O le sui lea o lana taavale foeuli tauagavale ua le toe faaaogaina ona ua iai le faiga faavae a le Malo ua faamalosia ai Matagaluega ma Faalapotopotoga uma a le Malo e sui uma i taavale foeuli taumatau, e mafua i le suiga o le itu auala ua feoai ai nei taavale i Samoa.
I le avanoa na maua i le Fofoga Fetalai na ia talosaga mai ai i le tusitala o ia e le toe fia faaali sona manatu i le mataupu, ona e foliga o le a toso sese ai ma foliga ai o se faiga le sa‘o na faatau ai le taavale mo ona ofisa.
“Ae malie si ou uso e le toe fia faia sa‘u tala i le mataupu. E leai lava se alualua o le faatauga o le taavale”, o le finagalo lea o le Fofoga o le Fono ina ua maua le fesootaiga i le telefoni.
O se tasi o lipoti a se isi nusipepa i Samoa na lipotia ai se finagalo o le Fofoga Fetalai na ia faamatala ai le sosolo o le faatauga o le taavale i auala ma faiga faavae a le Malo.
O lipoti foi ia na ta‘ua ai le iai o se sootaga o le Fofoga Fetalai i le faatauga o le taavale ona sa faatau mai i se kamupani faatau taavale o loo lisiina se fanua o le Sui Fofoga Fetalai e fai ai le pisinisi.
O loo ta‘ua ai e le Sui Fofoga Fetalai e leai sona piitaga i le pisinisi ae o lona fanua o loo lisi ai.
O lona uiga e le o sana pisinisi faatau taavale.
O le tau o le taavale le isi vaega o loo fesiligia ona o loo maua taavale o le ituaiga na faatau mai i le pisinisi taavale o loo lisi i le fanua o le Sui Fofoga Fetalai, i isi pisinisi faapea i se tau e le silia ma le $45,000 aua o taavale sa faaaoga muamua.
E lei manuia sailiiliga ma taumafaiga i le ofisa o le Tupe a le Malo mo se faamatalaga i le faatauina o le taavale mo le ofisa o le Fofoga Fetalai.
E lei maua foi se fesootaiga ma le failautusi o le Fono le afioga Fepuleai Atila Ropati mo se faamatalaga, ae o sona finagalo na tuuina atu i se isi lipoti e faatatau i le mataupu lava lenei, o loo ia faaalia ai, o le faamatalaga ua tuuina atu e le Fofoga Fetalai, o le faamatalaga foi lea a lona ofisa.
