Ua faaauau lapataiga i Samoa e faatatau i sauaga faasaga i fanau ma tina. O le faalapotopotoga o le Mapusaga o Aiga ua faalauiloa i luga o le leitio a latou polokalame ua toe unai ai le taofia o sauaga i totonu o aiga faasaga i tamaitai aemaise ai o fanau.
Ua toe lāgā lenei mataupu i le maliu ai o se tina e 40 tausaga o Leauvaa i le faaiuga o le vaiaso na te‘a nei.
O le mafuaaga e pei ona ta‘ua e le Ofisa o Leoleo ua taofia ai nei le tama o le aiga ona ua tuuaia i lona faaoolima i le tina. Faaalia e lipoti o le tina lenei na te faia lava le maumaga ma o ia foi e feagai lava ma le tausi aiga.
E faateia uma aiga o lenei tina ona o le faalavelave ua tulai mai ae na ona pau le faamatalaga ua mafai ona faalauiloa mai sa fasi e le tama o le aiga lea tina i le po o le Aso Toonai ma e masalomia lava o le osofaiga lenei ua mafua ai le maliu o le tina.
Faaalia e Faoliu Wendt i luga o le alaleo a le Leitio Polenisia, o lea foi ua toe lālā mai moliaga faapenei ua aafia ai tina i totonu o aiga ma o se taumafaiga malosi a faalapotopotoga e pei o le Mapusaga o Aiga ina ia faaofi i finagalo o i latou ua tuu i ai le faamoemoega o taitai o aiga ina ia o latou puipui o latou taitoalua ma alolofa i fanau.
“E le talafeagai le fasi o le toalua, e le talafeagai le sauaina o tina, ia o fea ni mea e tauto ua avea ma tino e tasi ae o lea ua toe fasi lava le toalua”, o se saunoaga lea a le tina ia Faoliu.
“O le feagaiga na osia i le va o ulugalii ua manino le talepe ma ua leai ai ma se filemu e maua”.
E toafitu le fanau a lenei tina ma na ta‘ua mai le mafatia tele o le fanau ona o galuega faatino uma o le aiga e feagai ai lava ma lo latou tina.
E le o iloa le mafuaaga o le ita o le tamā ae o le polokalame faalauiloa a le Mapusaga o Aiga na oo ai lava talanoaga i le itu lea pe le o le ese foi o le leo o tina e mafua ai vevesi e tulai mai.
O le tali a le sui lea o le Mapusaga o Aiga, e manino i le faa-Kerisiano o tina e ave pea le faaaloalo ma le faamuamua i o latou taitoalua, o i latou o le ulu o le aiga, ae e moni foi ua iai ulugalii ua tulai mai ai mafatiaga ona o le manaoga foi o le tina latou e na te pulea upufai o aiga ma le va faaleulugalii.
“Ae o loo manino le upu tino e tasi, e aia tutusa i le faatinoga o o la tiute – ma e ui lava o loo unaia e tina o le ulu o le aiga le tamā, ae o loo manino foi i le laua lava vā, o i la‘ua e tutusa.
O le a foi lava se tulaga faaletonu i le taitaiga o le aiga e leai lava se mea o le a ufiufi ai le sauaina fua o tina ma fanau,” o se faamatalaga lea a Faoliu.
E tele lapataiga ua faia e le gata i Leoleo ae faapea foi isi faalapotopotoga tumaoti o loo sulufai i ai tamaitai ua sauaina, ae foliga mai o loo faaauau pea le tulai mai o nei faafitauli i totonu o aiga i Samoa.
E eseese lava foi mafuaaga o le tulai mai o nei solitulafono, ma o le taumafaiga a nei faalapotopotoga uma aemaise le Ofisa o Leoleo, ina ia iai lava se auala e faaofi gofie ai i finagalo o i latou o loo faia lenei amio o le sauaina o tamaitai ma fanau, e taofi ai nei faiga le alofa.
E fai nei faasalalauga ma polokalame faalauiloa ae o loo i New York i Amerika le tamaitai minisita, le afioga Fiame Naomi Mataafa i le fono tele a Tamaitai o le lalolagi i le iloiloina o le tulaga o iai soifua o tamaitai o le lalolagi, e pei ona iai ni maliega e faatatau i le faaleleia o soifua o tamaitai uma.
O lipoti e faatatau i atinae aemaise o faafitauli o loo feagai ma tamaitai o lea atunuu ma lea atunuu, o loo talanoaina uma i lenei fonotele ma le faamoemoe lava ina ia iai ni suiga i le soifua o tina ma tamaitai. Mo Samoa lava ia o loo manino ai i lipoti a leoleo i lona ofisa o loo nafa ma sauaga i totonu o aiga, e le o faaitiitia sauaga faasaga i tina ma tamaitai.
