“E sili le mao i mea lelei”
E toatele lo tatou atunuu na faaseā ma lafo ni faaupuga le manuia i le au faasalalau i luga o se tasi o leitio faasalalau ona o le lē fiafia i faasalalauga o lapataiga o le sunami, ua vevesi vale ai tagata ma fememeai ae leai se mea na tupu.
Na faamatala se tasi o sui faasalalau matua o le leitio Polenisia i le alaleo o lea ualesi faasalalau o le Talofa FM, e le gata ina avatu faaseā ae o le laulauvale o tagata na valaau atu.
O le mea e faafetai ai e leai se isi o tagata ia na maua se avanoa i luga o le ea.
O le vevesi o tagata i le fia oo i nofoaga maualuluga na amata i le te‘a o le tasi i le vaveao ina ua amata faasalalauga o lapataiga, e le gata o le 2AP ae o le Talofa FM ma isi ualesi faasalalau.
O le faigata o tapenaga a tagata ona o le valuapo na amata ai ona lapataia le atunuu, ma e toatele foi na teitei vale ma lē mautonu ma fememeai ai le mafaufau.
E le gata ina faaseā tagata i leitio faasalalau ae o le ofisa o le vaaitau.
O lapataiga sa aofia uma ai vaega maualalalo o Upolu ma Savaii, Manono ma Apolima peitai na faaalia e se tasi o alii faipisinisi iloga o le atunuu, susuga Papalii Grant Percival, sa manino lava le vaega o le atunuu e aafia ua na o nuu i le itu i Saute ae le aafia le itu i matu.
O le faaseā a lea faipisinisi ona sa tatau i le ofisa o le tau ona faailoa i le atunuu le vaega tonu e ono aafia i le sunami ae le o le faalauaitele o lapataiga ua vevesi solo ai tagata ma lē malolo ai le feoai o taavale i le valuapo o loo tofafa le toatele.
Peitai ua faaalia e le sui ofisa sili o le vaaitau le afioga Mulipola Ausetalia Titimaea o loo vaaia le vaega o le vaaitau, na mafua ona aofia uma le atunuu i lapataiga ona o fautuaga sa tuuina mai i le vaega tutotonu o suesuega tau mafuie ma sunami i Hawaii lea na aumai ai le lapataiga.
E ioe Mulipola i le finagalo o Papalii Grant Percival, ae peitai o le galuega a le vaaitau e faalagolago i faatonuga sa tuuina atu e lima taitaina ai le latou galuega.
Faaalia e se molimau na mafua ona aofia uma le atunuu i lapataiga ona o se fautuaga mai le taitaifono o le Fono Faatonu o galuega laveai i taimi o faalavelave faafuasei.
Ae ui ina faapea sa le tatau ona lapataia fua isi vaega o le atunuu, peitai o le mau a le toatele sa fesiligia ni o latou finagalo, e sili le mao i mea lelei.
O le poto foi o le tagata e alualu gata, ae a sau le sunami e le tao tasi i se itu o le atunuu ae alu soloatoa e fua i lona malosi, o le a ono aafia ai soifua o ni tagata se toatele.
