Pe a ma le NZ$100,000, se tau aofai o ni meaalofa ua tauaao i ai se tasi o alo o le atunuu o loo aumau i Niu Sila, e ala mai i lana fale faigaluega o le Plumbing World, poo se tasi o faleoloa iloga i lea atunuu, e faatau ai totoga ma meafaigaluega tau palama, ua foaiina atu mo le afioaga o Lalomanu faapea isi nofoaga na aafia i le faalavelave faalenatura o le sunami i le tausaga na sei mavae atu.
O lenei alo o le atunuu o le susuga ia Robert Lefale, o loo malaga faatasi mai ma le alii pule o lenei kamupani i Niu Sila, le susuga ia Kevin Smith, ma ua tauaaoina lenei foai e ala mai i le Matagaluega o Galuega, Felauaiga ma Galuega Tetele.
O le afioga i le Minisita Lagolago o le Matagaluega, le afioga ia Aiono Tile, na taliaina aloaia nei meaalofa, ua faapusa mai i ni container, ma ia faafetaia le alii pule ma le kamupani, faapea lenei alo o le atunuu.
Na faaalia foi le agaga faafetai o le Taitaifono o le komiti faufautua o faalavelave faalenatura ma faalavelave faafuasei i totonu o le atunuu, le (DAC) Disaster Advisory Committee, le afioga ia Taulealeausumai Lavasa Malua.
Taua e Malua, “Ou te talitonu o le fesoasoani ua foaiina mai e le kamupani o le Plumbing World, e tele lava se fesoasoani mo galuega o loo feagai nei ma le komiti i le fausia ma le toe faaleleia o maota ma laoa na faaleagaina i le sunami.”
O nei mea faufale e tele i meafaigaluega palama, e pei o paipa, o tapu zinks ma nofoaga o fale lē ta‘ua. Taua foi e Malua, o loo faagasolo pea le polokalame a le komiti i le toe faaleleia o fale na faaleagaina e le sunami i le atu Aleipata ma nofoaga uma na aafia.
I se saunoaga a le susuga ia Robert Lefale, na taua ai, “E toa 11 tagata o lo‘u aiga i Lalomanu na maliliu i le sunami, ma e lagona lo‘u agaga fiafia tele i lo‘u oo mai ai i Samoa e avatu se fesoasoani mo si o‘u alalafaga, ma ou te talitonu o le a tele lava se aoga e le gata mo Lalomanu, ae faapea foi isi nofoaga na aafia.” O isi nofoaga ua mae‘a ona faaoo atu i ai nisi o ia fesoasoani, o le afioaga o Manono-tai.
Taua e le pule sili o lenei kamupani o le Plumbing World le susuga ia Kevin Smith, e 46 lala o le kamupani i totonu o Niu Sila, e toatele tagata Samoa o loo faigaluega ai, ma ua alagatatau ai lava le faaoo o lenei fesoasoani i Samoa.
