Faatonu tusi saisai mo tamaitai ua tuuaia o talitane

Ua faatonu e le Faamsinoga Faaitumalo ni tusi saisai e aumai ai ni tamaitai se toalima o le aofai e toavalu ia ua tuuaia i faiga faatalitane i Samoa.
O lenei faaiuga na faia ina ua le oo atu tamaitai ia e toalima i le aso na tolopo i ai le faamasinoga. Na taua e Leoleo se toe valaau o le mataupu i le aso muamua (1) o Mati le Aso Gafua lea na tea nei, ae o lea la e lei oo atu tamaitai e toalima ma faatonu ai loa tusi e saisai mai ai ia tamaitai mo le isi taimi e tulai ai i luma o le Faamasinoga.
O lea ua ofo mai le tamaitai o Iuni Sapolu e tulai mo tamaitai nei e toavalu e pei ona auina atu i le vaiaso ua tea nei peitai e foliga mai e lei iai se fesootaiga a le tamaitai loia ma ia tamaitai. Ua mae‘a logo i nisi tamaitai se toalua lea manaoga o le tamaitai loia ina ia logo atu ia auā le isi laasaga o lenei mataupu ae e lē o iloa poo fea ua agai i ai lea feiloaiga.
O tamaitai nei na taofia uma e leoleo ina ua amata sailiiliga a leoleo i lipoti ua taatele ai faiga faatalitane i le taulaga o Apia.
O ni lipoti ua faasino ai lava nofoaga o loo faamautu ai nisi o nei tamaitai na agai ai loa leoleo ma maua mai ai ia tamaitai.
O le fanuatanu o le Ekalesia Katoliko i Savalalo na taofia mai ai le toalima muamua.
O le isi na taua e lipoti na maua i tua ane o le fale kalapu o le RSA.
O le isi vaega e toalua na la ta‘ua na ave sa‘o lava i laua e leoleo a o agai mai i lalo o le VBAR faatoa mae‘a tafaoga o le afiafi ae fesiligia loa i laua ma ave loa i le ofisa o leoleo i Apia. Na taofia uma e leoleo i Tafaigata nei tamaitai ona o le manaoga ina ia toe tulai uma lava pe a valaauina i luma o le Faamasinoga.
Na tulai faalua i luma o le faamasinoga ma talosaga pea leoleo ina ia taofia.
O le popolega o le Faamasinoga e pei ona fesiligia ai leoleo pe lē o iai ni nofoaga e agai i ai nei tamaitai poo ni o latou aiga foi.
O le tali a leoleo o nisi e leai ni aiga e nonofo ai ma o le mafuaaga lea o le maua mai i nofoaga faitele nei.
E ui i lea talu ai e lei faamautu uma moliaga a leoleo ma sa faaauau foi a latou suesuega, o lea na tatala ai loa i tua e le Faamasinoga nei tamaitai seia oo ina toe valaauina o latou moliaga.
Na tatala i tua nei tamaitai e saili ai ni a latou loia ae o lea la ua lē oo atu le isi toalima sei vagana ai tamaitai e toatolu.
O le a faapea ona toe tulai i luma o le Faamasinoga nei tamaitai i le taimi e saisai mai ai e leoleo.