Flying without wings, from wings of Air NZ to fitness in Kuwait
Soo se faanaunauga lava ia auiluma taualumaga o lea aso ma ona savaliga, soo se sitepu e fia laaina, tatou te tulimatai pea ina ia fua mai e ui ina vaapiapi ma umi le ala, e lē faavaivai auā o se faamalosiau lea ma se fiafiaga i lou loto finau e a‘e mauga ifo vanu ina ia maua.
Ua faapena le taumafai o le alii o Suli Robert Tuitaupe, 33 tausaga o lona soifua o Kalaiesetete, lea ua tuua lana galuega sa auauna ai i tausaga e sefulu mo le kamupani vaalele a le Ea Niu Sila, ae malaga i Kuwait mo lana galuega faiaoga mo faamalositino i le Kamupani a Les Mills i Kuwait.
A o galue o ia i lana galuega cabin crew i totonu lava o femalagaiga i Niu Sila, sa sema ma maua lona taimi e galue ai i le Les Mills i Kalaiesetete mo le trainer/instructor i le faamalositino mo tausaga e valu, ma e maofa ai le mafaufau i le sogasogā tauivi o lenei alo saili malo.
Na ia ta‘ua foi i le tusitala lona fiafia i lana galuega ua tuua, ae talu ai ona o se lagona sa ia moemiti i ai, e fia laaina se isi sitepu ma oo atu i Kuwait e fesoasoani i tagata o lea foi itu o le kelope i le mataituina o le soifua maloloina e ala i le faamalosi tino e pei ona iai lona tomai ma le taleni ua faaagavaa ai o ia e le Atua.
Sa fesiligia lona saogalemu i Kuwait ona o le felanulanuai o tagata o loo soifua ai e pei o Arapi, ae sa lototele pea o ia ma ta‘ua o lona foi lea valaauina mai le Atua, o Ia o lona malosiaga. O lona taimi muamua lenei i Kuwait, ma e tasi le tausaga o lana konekarate ua ofoina mai e le Les Mills, e faamautu o ia i le nofoaga o Alcorniche e tulata lava i le Bible Society o le a lotu ma feiloai ai foi ma tagata o lea atunuu.
E tapuai o ia i le Ekalesia St Pauls Trinity Pacific Church o loo ia umia ai le tofi taitai o le a‘oga Aso Sa, o ia foi o le tiakono i lalo o le taitaina a le faifeau, le susuga ia Lapana Faletolu, ma o le a misia lava le mafutaga ma si ana aulotu e pele ia te ia.
Ua iai le faamoemoe e maua pea lona avanoa e toe galue ai mo le Ea Niu Sila pe a taliu mai Kuwait, talu ai o se alii galue faamaoni tausaafia i le va ma tagata, e faagalo gata foi ona uiga lelei ma le agamalu.
O le masina foi o Aperila i le tausaga nei na malaga atu ai o ia i Samoa mo le tatalaina o le lālā fou o le Les Mills; pe tusa ma le 13,000 le aofaiga o lālā i le lalolagi atoa.
Na ta‘ua e si ona tina, afioga Vui Tuitaupe mai le afioaga o Leauvaa, o se taimi muamua lea ua motusia ai le la mafutaga, o se mea faigata ia te ia ae ua momotu lava ona o le manao o Suli e tulitulimatāgau lana miti, ua ia opogi foi i ai faatasi ma le alofa laveai o le Atua.
O le faamalosiau a Tuitaupe mo tupulaga lalovaoa o le atunuu, aua ne‘i faavaivai e laa sitepu, tauivi, finau ma faafiafia i lou loto, uumau i avanoa e maua ma ia tuuavanoa i le Atua na te faatonutonu i ou ala, ma o Ia lava o le malosiaga i lalo o ou apaau.
