O le taeaopo o le aso ananafi, na toe auina atu ai le alii o AJ Kavini Maninoa e valu tausaga le matua i Middlemore mo le aveeseina o filo o lona manu‘a. O le itula e fitu i le taeao o le Aso Sa, o ananafi lea sa toe manaomia ai e fomai faapitoa sa fonoina ma togafitia le manu‘a o le atalii, ina ia toe faafoi ane ai Kavini mo le talaiina o filo sa su‘i ai le manu‘a.
O se lipoti a fomai sa latou faia togafitiga, o loo ta‘ua ai le laki tele o le alii o AJ, ona o le mafai ona vave faamamulu le alafau o le atalii i le taimi na mau ai le u, pe na tapuni ai le gutu o le taifau. Ona e talitonu fomai i Middlemore, o le ituaiga taifau lea na ia faaooina manu‘a ia Kavini, e umi se taimi e u ai ona nifo, ma e faigata tele ona toe tatala lona auvae sei tulou pe a oo ina u ma tapuni le gutu.
O le tulaga lea sa fesiligia ai le atalii sa aafia, pe faapefea ona faigofie ona toe faamamulu e le taifau le vaega o lona alafau sa matuā mau lelei ai le u. O le tali a le alii o Kavini, sa ia ta‘ua ai na pau le gaioiga sa ia manatua, sa ia tu‘i le auvae o le taifau ma sa vave matala ai, ma maua ai loa lona avanoa e alu ese mai ai, ma tamoe lona i lona tina e ta‘u i ai le mea na tupu.
O le faamatalaga a le tina o AJ Kavini, le tina ia Lynn Misa, sa ia tautino ai e lei talitonu e tugā le u a le taifau i si ana tama, ona e lei tagi, e lei iai foi se tulaga popole o le atalii i le taimi na tamoe ane ai ma faailoa ia te ia. Na pau foliga sa ia vaaia o le lima o Kavini sa pupuni ai lona alafau ma faapea ane ia te ia, Mum vaai mai foi i o‘u foliga. Peitai o le taimi na aveese ai le lima o le atalii, sa ia te‘i ai i se vaaiga sa ia vaai i ai.
O le taunuu ane o le taavale a le falemai, na faatopetope ai loa le atalii i le falemai. E oo foi i le atunuu ai i le falemai e lei lagonaina lava se leo o AJ, ae na o le talanoa ane lava ia te ia, e pei lava e lē o āfaina i se manu‘a tugā. E lei faigofie le taotoga mo le togafitiga, ona sa iai vaega sa faaeteete i ai fomai ina ne‘i avea ma auala e lē toe faafoisia ane ai le malosi atoatoa i le atalii. Ae ui lava i lea, sa manuia taumafaiga ma ua avea foi lea ma faamāmā avega i le tamā ma le tina o le aiga, aemaise ai o aiga ma uo a le alii o Kavini.
O se feiloaiga foi ma le tamā o lē na aafia, le tamā ia Andy Maninoa, sa ia faafetai ai i le Atua ona e ui ina faigata le lagona sa oo i ai ona o le vaai atu i lona atalii, peitai ua pule alofa le Alii, ma toe faafoi le malosi i le atalii. Sa ta‘ua e le tamā e faapea o Andy Junior Kavini, sa latou mafuta i le faaiuga o le vaiaso ma le faamoemoe e toe momoli i le taeao o le Aso Gafua na sosoo ai. O le po o le Aso Sa, sa faapea ane ai lona atalii pe mafai ona toe nofo mo se isi aso se tasi, ae sa ia fai i ai e malie o loo manao mai lona tina e toe foi atu i le Aso Gafua e pei ona malilie i ai.
O le taeao lava lea o le Aso Gafua na tupu ai le faalavelave, ma sa momomo lona loto ina ua alu atu i le falemai e vaai lona atalii ae faapea ane le tala a AJ ia te ia, ‘Ua e vaai la i ai, ana ou nofo lava mo le isi aso semanu e le ‘ai a‘u e le maile’. O se atalii lototele ma le lē fefe, auā e tiga lava ona tigaina, ae lei faaalia ane lava ni ona uiga e iloa ai o loo mafatia. O le atalii foi e fiafia tele i fagafao, aemaise lava taifau, soo se mea lava e vaai ai AJ i se maile, e taumafai lava e pa‘i i ai ma milimili ma faauo i ai.
Sa ta‘ua foi e le tina o AJ e faapea o le taifau a se tasi lava o lona aiga, ma e na te lē o tuuaia foi le taifau ma lona matai, poo lē ana ae ona o le faalavelave lava ua tupu. O le taifau foi e seāseā lava ona taufeai, pe iai ni ona uiga e lamatia ai tamaiti ma soo se tasi lava peitai ua faateia i le tulai mai o lea foi faalavelave. E ui lava la ina toatele tagata o loo faitioina le taifau ma lona matai, peitai o ia lava ia ma lona manatu, e na te lē tuuaia pe faitioina lea tulaga.
O le taifau foi sa ia faaooina manu‘a tuga i le atalii, na aveesea foi e leoleo i le aso tonu lava o le faalavelave ma le faaupuga e faapea o le a ave e faalalo ma tape. E oo mai i le taimi nei e lei toe maua ane se isi faamatalaga pe na faataunuuina lea fuafuaga pe leai, peitai na faamaonia mai e le tina, na aveese lava i le aso o le faalavelave. E lē o faigofie foi ona faamatuuina e leoleo lea mataupu e aunoa ma se suesuega e faia i ai.
O le taifau sa iai se lapataiga sa tuuina ane i ai e le matagaluega e vaaia meaola, le Animal Welfare, ina ia aveesea i se tasi o aso muamua atu a o lei oo i le aso na tupu ai le faalavelave. Peitai e lei mafai ona faataunuuina lea faamoemoe, ona e faapea na taunuu atu le vaega lea e ave, ae ua leai mai le nofoaga o le aiga e ona le maile. E molimau nisi sa aveeseina le taifau ma tuu i le isi tuatusi ona e lē faigofie foi i le aiga ona talia le faaiuga e aveese ai le taifau.
O se fafagu foi lenei faalavelave mo tatou uma aemaise lava o mātua o loo iai fanauiti, auā o le natura lava lea o tamaiti e manao lava e tagotago, ma fia iloa soo se mea e vaai i ai. Aemaise lava foi i meaola, e fiafia tele i ai tamaiti, a o le tiute lea o mātua, o le taumafai e puipui ma faasino i ai mea e tatau ma vaega e lē tatau ona latalata i ai e ono āfaina ai fanau i faalavelave tutupu.
