E sapai le faifeau ae toso le a‘oa‘o ma tagata lotu
E matuā fesiligia e le ekalesia EFKS a Dominion Road i Mt Roskill, poo fea tonu o iai le amiotonu o faaiuga fai a le Ekalesia Aoao, aemaise ai le lē manino, a o fea tonu e vase ai le tuaoi o le faavae ma le matautia o le malosi ma le pule o loo umia ai e toeaiina o le matagluega ma Pulega a Aukilani le taitaiina o ana faaiuga fai.
O le faavae o le ekalesia e faatonutonu ai faaiuga fai, poo le malosi ma le paoa o loo uu i aao o toeaiina o le pulega ma le matagaluega? O le mea moni ua sapai e toeaiina le faifeau sa agai i ai le mataupu, ae toso le susuga i le a‘oa‘o ma matou tagata lotu sa sulufai atu mo se fesoasoani.
E matuā feteenai lava le faaiuga ma le faavae o loo taitaiina ai ma fofoa ai faaiuga fai a le EFKS.
O ni fesili tetele ia ua tulai mai i finagalo o sui o le aulotu i Mt Roskill, ina ua mae‘a le tofiga a le matagaluega i le faaiuga o le lua vaiaso talu ai, ma ua lē tauga malie ai se faaiuga sa tolaulauina e le sui o le komiti a toeaiina o le matagluega. O le tofiga sa faia sa faailoa ai nisi o faifeau ma le aufaigaluega, ua aveesea poo ua faamaloloina mai o latou tofiga, ona o ni faafitauli sa aafia ai, ma ua lē o gatasi ai ma le tulaga o loo faataoto ai aiaiga ma le faatulagaina o le galuega mo le lumanai.
O le a‘oa‘o o loo nafa ma le galuega i Mt Roskill i le taimi nei, sa faapea ona aafia ane ai i le lisi o le au malolo, ma ua lē toe faaaogāina ai lona tofiga a‘oa‘o, ma ua lē toe agavaa ai foi mo le vaaia ma le faatauuina o tiute i totonu o le lotoifale o le ekalesia i Mt Roskill, aemaise ai o le ekalesia aoao. O se faaiuga ua matuā lē talia ma teena e le aulotu i Dominion Road, ma ua faaleo ai se lagona faanoanoa ma le tiga, talu ai e faitau le ekalesia, ua lē amiotonu lea faaiuga, pe a fua i le fua faatautau o loo taoto ai le faavae o le ekalesia EFKS.
Na taua e sui o le aulotu i Mt Roskill i se feiloaiga ma le Samoa Times, ua aliali mai i lea faaiuga sa tolaulauina, le taui masui o le komiti i le latou faaiuga sa faatea ai le auauna a le Atua sa latou faafeagai i le lua masina talu ai. E talitonu le sui o le aulotu ua see ese le komiti mai le mataupu sa tuuina atu e fia maua i ai se tali mautu. O le mataupu sa tālia se faaiuga, ona o le faifeau sa faatea ese ma le galuega ona o le soli faavae e tusa ai ma aiaiga o le faavae, peitai ua tali mai le komiti, ua lē āfaina le faifeau ae aafia ai fua le a‘oa‘o e leai se vaega o le faavae na ia solia, pe na sese ai foi.
Ua lē ese ma le upu e masani ai le atunuu, ua lavea fua foaga ae lei fai misa. O le faatauanauina ia fai se faaiuga i le tagata solitulafono, ae tali mai ua tietie le avega i le isi uso auauna, ae ufiufi pea le agasala a le faifeau e lē afaina i finagalo o toeaiina.
Ua lē malamalama poo fea le tusi faavae e fofoa mai ai le faaiuga ua faia, ona ua matuā feteenai le faapa‘ū o le tofi o le latou a‘oa‘o o loo fitaituga i le galuega mo lenei taimi, ma le agaga sa tuuina ai le mataupu mo le fono a le au toeaiina. O le isi itu sa faaleo ai le lē fiafia o sui o le aulotu, ona e foliga mai, o le malosi ma le paoa o loo i toeaiina, e fai pito tasi ai lea faaiuga le talafeagai, ae lē o limataitaina i le tusi faavae a le EFKS.
Mafuaaga e teena ai le faaiuga a le komiti a toeaiina
O loo faapea mai toeaiina ua mafua ona aveese le tofi a‘oa‘o o le susuga ia Neemia o loo vaaia le galuega, ona o lona taloina o le fonotaga a le ekalesia, ma lona taitaiina o le faiga palota, sa palotaina ai le faatulai ese o le faifeau ma le galuega, a o feagai ai ma le malologa.
E talitonu le aulotu i Mt Roskill, e matuā vaivai tele lea mafuaaga na faavae ai le faaiuga ua faia, ona e leai se vaega faapea o loo iai i totonu o le faavae o le ekalesia aoao.
O le isi itu, e teena ai le faaiuga ona e malosi le mau a le aulotu, e lei taloina e le a‘oa‘o se fonotaga, e lei ta‘ita‘ia foi e le a‘oa‘o se faiga o le palota, o le failautusi lava o le aulotu sa faataunuuina uma ia tiute, auā o lana lea matafaioi, o le logo ma tala‘i i le aulotu se faiga faapea, pe afai e tulai ni faafitauli ma ua manaomia ai se fofo.
Sa ta‘ua foi e sui o le aulotu lava i Mt Roskill, o le latou mataupu foi, sa tuuina i le komiti a toeaiina, ina ia ave i totonu o le fono tele i Malua i le tausaga nei, e tusa ai ma faiga faavae a le ekalesia. Peitai na lē oo i totonu o le fono tele, ae ua manatu le komiti e fai lava e latou le faaiuga, lea la sa faalauiloa i le tofiga talu ai nei.
O se faiga e piopio tele ma lē talafeagai i le silafaga a le Atua, aemaise ai o le faavae o le Ekalesia Aoao. O le fesili o ai e afisi ma sapai, a o ai e toso ma faasavali?
O saunoaga a sui o le ekalesia e faapea, ua fai si o latou ofo tele i lea faaiuga, ona ua mautinoa foi e iai le isi toeaina o loo utuina pulu sese i le fana, ma ua fai ma auala o le faapa sese ai e le komiti le fana. Ona o le toeaina lea e talitonu sui o le ekalesia i Mt Roskill, sa matua lē fiafia ina ua latou tuli ese le faifeau sa iai muamua, a o le faifeau foi lea e matuā mafanafana le la kegi ma le toeaina o le pulega. Ua amanaia ai la e toeaiina faamatalaga sese sa fautuaina ai e le isi toeaina, ae ua leai se manatu e fesiligia pea le aulotu mo se faamatalaga sa‘o ma le atoatoa.
Fesiligia poo ai na tofia le a‘oa‘o, a o ai foi e umia le pule mo tofiga a‘oa‘o
Sa fesiligia sui o le aulotu i Mt Roskill, poo ai na tofia le latou a‘oa‘o o loo feagai nei ma le galuega. O le tali na tofia lava e le aulotu, ma o le a‘oa‘o foi o le sui faavae o le aulotu mai tausaga e tele ua mavae, e mulimuli tofia i le tofiga a‘oa‘o, ae ua leva lava ona tautua ma auauna i le galuega. O le isi fesili pe faapefea le puleaina o le tofiga a‘oa‘o, ma lona faaaogāina i totonu lava o le aulotu. Sa ta‘ua e sui o le aulotu, o lea ua mae‘a ona faalauiloa le faaiuga a le komiti a toeaiina, ma o le a se‘i fono le aulotu, ona iloa ai lea pe usitaia ma amanaia lea faaiuga, pe o le a faaauau pea ona faaaogā le susuga i le a‘oa‘o i totonu lava o lo latou falesa, auā e pulea lava e le aulotu lo latou lotoifale.
O le a tulituliloa pea mo le lumanai se faaiuga o le a oo i ai mataupu i le va o le a‘oao, ma le ekalesia aoao, aemaise ai o totonu lava o le lotoifale o le aulotu i mt Roskill. Sa maua foi se fesootaiga ma le susuga i le aoao ua faamalolo nei, ma sa fesiligia foi i sona finagalo i le faaiuga a toeaiina o le matagluega. Sa ia faaalia manino, o le a sei vaavaai pea iai ona faailoa mai lea o sona finagalo i se taimi mulimuli mai.
Sa taumafai foi ina ia maua se feiloaiga ma le toeaina o le pulega, aemaise ai o le toeaina o le matagaluega e ala lea i le telefoni i taimi faigaluega, peitai e lei manuia ma e lei taliina mai le telefoni. O le a faapea foi ona taumafai atili pea mo le vaiaso nei ina maua pea se finagalo mai komiti a toeaiina, i so latou finagalo e uiga i le faaiuga e foliga mai e le o talia e Mt Roskill.
Ona o le mataupu a Mt Roskill e fai lava si tele, ma e le mata tasi foi, ae fai si felefele, ma ua le faamalieina le aulotu i le tali ua tuuina mai, ma ua faailoa ai finagalo o tamalii o le aulotu, e le o le mutaaga la lea o le mataupu, ae o le a toe saili pea se isi auala ina ia taoto ma faamaileina itu e lua i se tali o lea faafitauli. Sa faailoa foi e sui o le aulotu, ua leai so latou faatuatuaina o le komiti a toeaiina, ona e foliga mai e manaia tele le laugaina o le upu folafola i le pulelaa, ae matuā faigata tele ona faatino ma mulimulitai iai.
Ua manatu sui o le aulotu a Mt Roskill, o le a faaaogāina pea le Samoa Times, e faalauiloa uma ai ma auiliili vaega uma o le mataupu ua aafia ai le latou a‘oa‘o. Ua amo e le a‘oa‘o le faaiuga sese, ae ua lē pa‘ū tonu le samala i le ulu o le fao e tusa ai ma le talitonuga, o le mafuaaga foi lea ma le aotetelega o le mafuaaga o le gasegase o le ekalesia mai lava i le amataga.
Ua taulimaina foi pepa ma tusi uma lava sa tuuina e le ekalesia agai i le toeaina o le pulega, atoa ai ma fesootaiga sa taumafai le aulotu ina ia maua ai se fofo o le gasegase, a o lei oo ina totō tiga, ma tulai ai loa le feseeseaiga.
E matuā faitioina lava e le aulotu i Mt Roskill, ma tuuaia le toeina o le pulega, atoa ai ma le toeaina o le matagaluega, ona o le manatu mama ma le faatauvaa i mau sa faavae ai tuuaiga uma e faasaga i le auauna faifeau ua tuua le galuega.
O le vaiaso fou o le a toe agai ai tusitusiga e pei ona talosagaina e le aulotu i tuuaiga e fa sa faavae ai le latou mau. Ma atonu o inā foi o le a manino ai lau faitau i le amataga mai o le mataupu a le ekalesia i Mt Roskill, i le va ma le faifeau sa iai muamua, aemaise ai o le va ma toeaiina o le pulega ma le matagluega.
