E lē o tuua le aapa mai pea o Malo i fafo e faaleleia ma siitia le auaunaga tau i le puipuiga o le malaevaalele o Samoa, e ala i ni a‘oa‘oga mo tagata faigaluega o nafa ma lea pitolaau tāua.
O ni alii popoto faapitoa mai Ausetalia i ia tulaga sa latou faatino se a‘oa‘oga mo le Matagaluega o Galuega ma Felauaiga ina ia mautinoa le faatumauina pea o le saogalemu o vaalele e afea Samoa. O se polokalame faalea‘oa‘oga na auai foi sui o puipuiga tau femalagaiga ma felauaiga a le Malo tele o Amerika.
Sa fitoitonu le a‘oa‘oga i le vaaia lelei ma le siakiina o vaalele mo le saogalemu ma o se faaopoopoga i tomai o le aufaigaluega a le Malo o feagai ma lea tiute tauave.
Faaalia e le Faatonu o galuega tau vaalele sivili a le Malo o Samoa le afioga Magele Hoe Viali, lona agaga fiafia ma le faagaeetia i le fesoasoani e lē aumaua ua mafai ai ona faaleleia le tomai o le aufaigaluega a le Matagaluega o Galuega ma Felauaiga.
Faaalia e le alii Ausetalia o loo galue faufautua i galuega tau puipuiga o vaalele i Samoa o Mathew Fleming, o se taimi muamua lea ua toatele ai ni tagata e iai poto faapitoa i lea matata ua malaga mai i Samoa e faia se a‘oa‘oga, ma o se laasaga lelei tele lea i le pitolaau a le aufaigaluega. O se taimi muamua foi lenei ua aumai ai e Ausetalia se tagata e maualuga ma sinia lona tulaga i ia galuega e faia le a‘oa‘oga. Ua faaopoopo i ai ma se alii poto faapitoa mai Amerika ma ua saga matagofie ai le mafutaga.
O le siitia o galuega faalepuipuiga mo vaalele e afea Samoa, o se matafaioi tauave a le Matagaluega o Galuega Tetele a le Malo ma Felauaiga o loo iai le pulea o galuega tau vaalele sivili i le atunuu. O le alii Hai-Komesina o Ausetalia i Samoa, o Matt Anderson na ia saunia se taumafataga o le afiafi e faamae‘a ai le a‘oa‘oga ma faamavae atu ai i alii ofisa popoto faapitoa mai Ausetalia ma Amerika sa faatautaia le a‘oa‘oga.
O Samoa le isi atunuu pito lelei le puipuiga o ona uafu ma malae vaalele, ma ua ausia foi tulaga faavaomalo mo le itu tau i le puipuiga o ia nofoaga e ulufale mai ai tagata i fafo aemaise o oloa.
