Ua iai nei le fuafuaga o se aso o le masina o Tesema 2010 o le a aloaia ai le amataga o le atinae tele o se faletalimalo o le a fausia i Savaii e se kamupani mai Amerika e ta‘ua o le South Pacific Development Group, o loo taiulu ai se alii papalagi Amerika e suafa ia Jesse James, lea ua faaee iai le suafa matai o Tupaisina.
O afioaga o Fagaee, Sasina, ma Letui o le a fausia ai lea atinae faatasi ai ma se malae tapolo, o se uafu ma se falemai. Ua toe taulimaina e ia afioaga le isi vaega tupe e $120 afe tala Amerika o le totogi o le lisi o o latou eleele o le a fausia ai ia atinae ma o le faatolu ai lea ona tuuina atu ia seleni o le lisi talu ona sainia i le aso 8 o Iulai 2008, se feagaiga i le va o lea pisinisi mai Amerika ma ia afioaga. Ua lua nei tausaga atoatoa talu ona osia lea feagaiga e ala i se maliega na sainia ma le Minisita o le Matagaluega o Punaoa Faalenatura ma le Siosiomaga le Afioga Faumuina Liuga lea sa auai sui o nei afioaga faapea le afioga i le Palemia.
O le mae‘a o lea sainigalima mo le lisiina o le 600 eka o eleele o Sasina, Fagaee ma Letui mo le umi e 120 tausaga, na faaalia ai e se tasi o matai le afioga Leasi Vainuupo Nuusa, o se tasi lea o atinae o le a manuia ai afioaga aemaise o le motu o Savaii pe a oo ina mae‘a ma tino mai.
Sa tele manatu faaalia i lenei atinae peitai ua mae‘a ona faamautu mai e le Malo faapea le afioga Laauli Leuatea Polataivao, o se matai ma o le faipule foi lea o le itumalo o loo aofia ai Fagaee Sasina ma Letui, e mae‘a lava le 120 tausaga o le lisi toe foi eleele o ia afioaga.
O le naunautaiga lea o le Malo, o le aumai o ia ituaiga o atinae e fausia ma faatutū i Samoa auā e lē gata manuia ai nuu ma afioaga i le itu i galuega ma isi atinae e pei o faiga faiva ma faatoaga, ae o le a siitia ai le atinae o tagata tafafao ma siitia ai foi ma tupe maua mo le tamaoaiga o le atunuu. O se miti poo se faalepo a le alii Pule Sili o Tupaisina Jesse James, le fausia o se faletalimalo tu matafaga i Savaii, ma o lea o le a amata vaaia foliga o lea atinae pe a aulia Tesema o le tausaga nei e tatala aloaia ai.
O loo iai nisi atinae faapea o loo fuafua foi e fausia i le afioaga o Pu‘apu‘a i Savaii lava, ma o se isi lea vaaiga mamao i le faagasolosolo mai o tagata ma kamupani mai fafo e susue le laueleele o Samoa o loo taatia e lē faaaogāina e faatutū ai nei faletalimalo auā se manuia o tagata uma ma le atunuu.
