O se tasi o matua o se tasi o tama aoga sa tatau ona faafiafia i faafiafiaga o le tatalaina aloaia o taaloga o le Pasefika na molimauina le tutulu ina ua ia faamatala le faanoanoa tele i le faaiuga ua faia e le Komiti o Aoga a le Ekalesia i le taofia o le auai o tamaiti aoga a le Ekalesia i le tatalaina o taaloga a le Pasefika.
O le matua lenei o le faifeau EFKS peitai e musu e faailoa lona suafa ona na ia faaalia e faaono iai sona aafiaga pe afai ae iloa lona suafa. Peitai na ia faaalia, na muliga foi le faamafanafanaina ma faalototele o le tagata ua maliu sē e pele i lona loto i le taumafaiga e ave fautuaga ma faamafanafanaga i lona atalii.
“Sa ia te au le manatu ailoga e aafia tele peitai, na matuā faate’ia a’u i lo’u vaai atu i le tagi o si o’u atalii, ina ua faasā Maluafou o lana aoga o loo aoga ai nei.”
“Atonu ua ala ona tagi si o’u atalii, ona ua leva ona tapena, faalalā mai ina ua ta’u atu o latou e faafiafia, ae lea ua te’i lava ua tipi faafuasei, leai ma se faamalamalamaga e ave i tamaiti, ua matua pe aisea.”
“E lē gata i lea, o le aafiaga foi o matou latou ia, o mātua, e pei o ma’ua e tuai ona matou o i le fale, ona e faatalitali se’i uma tapenaga ma a’oga mea la e fai, ona faatoa o lea.”
“O meaai o penisini, aemaise o le tapuaiga auā e lē na’o ma’ua e tapuai i aso uma, e toatele foi isi mātua na tapuai, a’o lea ua te’i lava ua kipi moku faapea.”
“Lea lava ua faaopeopea ai lea mea.” Mai i le 3000 o tamaiti aoga na faafiafia masalo o le ‘afa o lena faitau aofai o tamaiti lotu EFKS ae o loo aooga i isi aoga. O lona uiga o la lava e faafiafia e ui ina manino mai le saunoaga a le Failautusi Aoao o le EFKS Vavatau Taufao, e lē faatagaina le faia o soo se galuega poo soo se feau lava i le Aso Sa.
O le faia o galuega i le Aso Sa, e aofia ai ma siva faaevagalia o le soli Aso Sa.
Peitai e lē o le manatu lea o le alii aoga i le Kolisi o Samoa, o Junior Amataina ina ua fesiligia.
O Amata, e lotu EFKS o loo aoga i le Kolisi o Samoa, ma o ia e lavea i totonu o tamaiti aoga e 300 ia na toe aumai i totonu e sui tulaga i tamaiti aoga a le Ekalesia lea na taofia le toe auai i faafiafiaga o le tatalaina aloia o taaloga.
“O a’u ou te lotu EFKS, o le po lenei o se po tāua lea mo a’u, auā o le talafaasolopito foi lenei o Samoa i lana taligamalo, ou te lē iloa pe ou te toe aulia atu se isi taligamalo a Samoa, ae o le tausaga lenei o le a mafai ona ou manatua pea sa ou siva ai i le tatalaga aloaia o le faamoemoe lea.”
“E tāua foi ia te au le matou talitonuga ae o le a tāua foi ia te au le faamoemoe o Samoa.” E iai le faamoemoe o le a auai pea tama ma teine aoga o le ekalesia i faafiafiaga o le tapunia aloia o taaloga ona e pa’ū tonu i le Aso Toonai.
