Ua tu fa Samoa i le tuuga ‘aau mamao o le Pacific Games i Mulifanua. O uluai taaloga lenei e tauaao ai pine o le XVI Pacific Games. O le tagata ‘aau mai Tahiti na aveina le Pine Auro. O le Pine Siliva ma Apa Memea na maua uma e New Caledonia. 

Mai le amataga na pipii Sitivi i le to’atolu lea. Ae na pa’u i tua ae e lei uma le li’o muamua o le feausiga. 

Ona aau ai lava lea na’o ia ae o tutusa lava le toatolu mai Tahiti ma New Caledonia seia oo i le tini. O foliga ia o le tuuga i le taeao o le Aso Gafua i Mulifanua. 

O isi tagata ‘aau a Samoa o Ronnie Iosefatu mai Saoluafata ma Andrea Schuster mai Vaoala. 

Na malosi le agi o le matagi mai matu na feagai ma le tuuga. Na matuā sou ai le vasa i gataifale o le Sheraton Resort. 

O le manumalo na kolosi i le 1-itula 1-minute, tu lua 1-itula 1-minute ma le afa sekone (1:01:30) ma le tu tolu e 1:02:22. A’o Sitivi na kolosi i le taimi 1:08:33. Na mamao i tua le tu lima ma le isi vaega o le tuuga na sili atu le mamao i tua le latou feausiga. 

Na vaai taulai Sitivi e maua sana pine i le tuuga lenei. Na taumafai ma le malosi ae peitai o tagata ‘aau muamua e tolu e toleni ma fe’ausi i Falani. O le tulaga lea o taaloga faapenei e malolosi tele au aau mai atunuu nei.   O tuuga muamua ia o le Polokalame ‘Aau, ae o le’a liliu atu i le fale ‘aau i Tuanaimato le Polokalame ‘aau mo le Pasefika atoa.