Ua tatala aloaia taaloga o le Pasefika XVI i Apia Park i le afiafi o le Aso Sa. O se vavega na faatino ai faaaloaloga ma faafiafiaga o le taligamalo a Samoa i atunuu uma o le Pasefika, auā na mamafa le to’ulu o uaga ma le agi o matagi i le ta o le tolu agai i le fa i le afiafi ma foliga mai ai o le a faapea ona faaleaogaina ai tapenaga a le Komiti Faafoe mo le tatalaina o taaloga.
Peitai, na agai ese ao paauli na ufitia ai le atunuu a’o lei amatalia le ulufale o malo faaaloalogia ma atunuu eseese atu i totonu o le Apia Park. O le tatalaina aloaia o Taaloga na faasalalau atu i atunuu eseese i fafo e maimoa ai latou i le matagofie o Samoa ma ona tagata.
Na faatumulia le malae i Apia Park i le toatele o tagata maimoa mai atunuu eseese. O le Afioga i le Palemia, Afioga Tuilaepa Sailele Malielegaoi le taitai o le Malo na fofogaina Upu Tomua o le lua vaiaso o Taaloga a le Pasefika. Na ia ia ta’ua ai ma faamamafaina le taua tele o aafiaga o taaloga i se soifuaga ma olaga manuia o tagata taitoatasi. Na ia faafetaia ai le Komiti Faafoe o le Pacific Games i se galuega maoa’e ma lelei i le 14 masina talu ai ona opogi e Samoa le faatinoina o taaloga lea na tuu e fai e le Malo o Tonga.
Na momoli foi le faafetai a le Palemia i Pisinisi tuma’oti ma Matagaluega a le Malo, faatasi ai ma A’oga ma Ekalesia i le galulue faatasi mo le faatinoina o le XVI Pacific Games. I le mae’a ai o le saunoaga a le Palemia na tatala aloaia ai e le Ao Mamalu o le Malo o Samoa, afioga Tuimalealiifano Vaaletoa Sualauvi II, taaloga a le Pasefika i Samoa.
I le mae’a ai o ia faaaloaloga na maimoa ai loa ma le ‘au matamata ma tagata taaalo i faafiafiaga na faatinoina e le 3,000 tamai a’oga mai a’oga e 16 a le atunuu. O lenei tautua na tu malosi iai le Matagaluega o A’oga, Taaloga (MESC).
O le ulutala o nei faafiafiaga na toe faamatala ai le tala-tuu a le atunuu ia Leatigoie ma lona tama o Feepo. Na faamatala e tuu faatasi iai ma le taaloga anamua a le atunuu le Aigofie. O lenei tala e tasi i le agaga o faamanuiaga na faaee Feepo i lona atalii o Leatigoie a’o sauni atu le tama e taalo i le Aigoife.
O le tala e patino lea i le tupuga o Samoa ma le Talalelei a Iesu Keriso ua avea nei ma ivitu o le soifuaga o Samoa. E le gata ilea o le aganuu mamalu a Samoa ua iloa ai i le atulaulau. Ona momoli atu ai loa lea o Sulu o Taaloga lea na soo ai Upolu ma Savaii o faatamo’e ai mo le lua vaiaso.
O le sulu lea na faatamo’e faataamilo i le atunuu na faaiu ane i Apia Park ma faatamoe faataamilo ai, ma faaiu atu i le tamaitai o Ele Epeloge, o ia na tutu ina le sulu o taaloga.
O se vaaiga matagofie le palasi atu o le sulu i totonu o le tanoa ava, ma ola ai le sulu tele na fausia faapitoa mo taaloga. E mataina lea vaaiga ma lagona ai le agaga mimita o soo se Samoa.
I le mae’a ai o le polokalame na fanaina ai i le lagi o Mea Faapapa Malolosi ma manaia na faapupulaina ai le po o le Aso Sa. E atoa le 20 minute o faaauau pea lava le felelei o mea faapapa mataina i le ea, ma faaiu i le mea faapa mulimuli na tusia le igoa o Samoa i le vaninonino. O le nofoaga na fanaina ai nei Fireworks na tuu i le malae lakapi a Moataa i Taumeasina. Ae na pei lava na pipii i le Apia Park le nofoaga lea i le maoa’e o lea Mataaga na lauiloa mai itu e fia o Anoamaa, Vaimauga, Faleata ma Tuamsaga. Ua tatala aloaia ai le XVI Pacific Games.
