O le lua tausaga talu ai na amata fuafua ma tapena mai ai se polokalame konaseti a le ekalesia Metotisi Samoa i Magele i lalo o le taitaiga a le susuga i le faafeagaiga ia Rev Logopati Mataafa ma lona faletua ia Lealofisa Mataafa e ala lea i le tapueina pea o le taleni a tupulaga talavou i totonu o le ekalesia.

Na tapenapena ma faufau le auivi o le faamoemoe ma tau sailiili se taimi paganoa e tatau ona faataunuuina ai lenei polokalame ona ua fai si pisi tele o polokalame a le ekalesia faapea ma le Sinoti, aemaise ai o avanoa e tatau ona maua mai e nisi o alo ma tamafanau a le ekalesia le aufaipese a le SOL3 MIO e auai faatasi ai i le polokalame lenei auā le toe lalagaina o taleni a tupulaga talavou.

I le faaiuga o le tausaga talu ai ia Tesema na iai se lagona o le susuga i le faafeagaiga ia Rev Logopati Mataafa ma le ekalesia ua tatau loa ona faatinoina ai lenei polokalame, peitai ane ua le fetaui foi ma fuafuaga a le sinoti aemaise ai o avanoa e maua mai e le SOL3 MIO, ma o lea na faataoto mai ai loa le fuafuaga ia Ianuari i le amataga o le tausaga nei e faataunuuina ai loa, ma ua fetaui lelei ma le maua mai o avanoa o alo nei ma fanau a le ekalesia.

O le fu’a taualuga o le finagalo o le susuga i le faafeagaiga i ana tamafanau nei o le SOL3 MIO, ma le susuga ia Paul Fagamalo ma Nyssa Collins e tatau ona auai mai i polokalame a le ekalesia, ona o totonu o le autalavou ma le aufaipes, e pei o i tonu le amataga ma le faavae o le taleni ma le meaalofa ua maua e nei fanau, ma e iai foi la lona lagona e tatau ona toe o mai fanau nei e faaauau pea le galuega o le talalelei i totonu o le ekalesia. Ma soo se mea foi ua valaauina ai e le Atau lo latou soifua e nonofo ma galulue ai e le mafai lava e fanau ona faagaloina lo latou tupuaga ma lo latou faasinomaga na fofoa ma faafailele atu ai le olaga auauna i le Atua.

O le autu o le polokalame “Ola mo le Atua” ao le fesili sa taoto mai i lenei autu mo fanau talavou e faapea, e faapefea ona ola mo le Atua? Tali: ia ola vivii, ola tapuai ma ia ola auauna. Ma o tali uma nei na agai ai loa le faatinoina o taga eseese na maimoa iai le toatele o le mamalu o le atunuu lea sa latou molimauina le polokalame i le Lesieli Tonga Auditorium i Magele. Sa fefiloi gagana ma lanu i lea po auā ua le gata i tagata atumotu o le Pasifika ae ua foi i palalagi ua lolofi atu foi latou e fia molimauina le tu ma le aganuu a Samoa.

E tolu vaega na vaevaeina iai le polokalame o le afiafi:

(1) O pese faaleagaga, faaevagelia ma tulafono, auā e iai tulafono na aumai e le Atua e ola ai le tagata.

(2) O faafiafiaga eseese ma vaaiga lautele i tiute ma galuega a le tama ma le teine tautua poo le aumaga i totonu o aiga. O le tama na faatinoina galuega i le faiga o le maumaga poo le galueaina o le eleele seia oo lava i le po ua ai le tino e namu. Ma o le aotelega o lea vaega na taualuga ai i le siva, o le ai e namu.

O tamaitai o le latou tiute i le aiga, o le saluina lea poo le faamamaina o totonu o fale o aiga, poo le maota o le galuega aemaise o totonu o le malumalu tapuai a le Atua, aemaise o galuega fai a le nuu, ma sa taualuga foi le latou vaega i le siva salu.

(3) Siva a le taupou i mea e ao ona tapena iai le taupou ma faaiu ai le tala i le mau lea sa masoe ai Tupua Tamasese i se manuia o Samoa, ao ana upu e faapea Samoa ia fifilemu, ia aoga le toto mo Samoa, ma faaiu ai lea vaega i le siva ia Tamasese.

O le taualuga o le faamoemoe na faatinoina ai e le autalavou le siva lautele a le atunuu e faamatala ai uiga o mea e pei o le sasa ma le mauluulu, aemaise ai o le tala Samoa ia Sina ma lana tuna, lea sa faamatalaina uma i le tapenaga a le fanau, ae o le taunuuga o le tala na maua ai le laau o le ola o le niu, lea sa fai ma toomaga o tagata Samoa i aso la e tautua ai aiga, nuu ma ekalesia. Auā e sali le popo, fua le popo ma faatau atu ona maua ai lea o nai seleni e ola ai aiga i lea vaitaimi. O le auivi lea na faataoto iai le faagasoloina o le polokalame o le afiafi sa faatinoina ma faailoa uma ai le tagata ua ola mo le Atua.

I totonu o polokalame na vavae ai foe o vaega taitasi nei i faafiafiaga poo pese a alo ma tamafanau a le ekalesia e pei o le susuga ia Paul Fagamalo ma Nyssa Collins ma le aufaipese lauiloa a le SOL3 MIO, ma o latou foi ia sa fai ma fofoga o le po. O le taualuga na latou lagiina ai loa le pese 132 a le ekalesia Metotisi e faapea, “Ou te tuu atu lou ola.”

Ekalesia Metotisi Samoa i Magele i le latou koneseti mo tupulaga talavou

Ekalesia Metotisi Samoa i Magele i le latou koneseti mo tupulaga talavou

O le taimi muamua lenei ua faatinoina ai se polokalame i totonu o le ekalesia Metotisi i Magele, ao le agaga fiafia o alo ma fanau o le ekalesia ma aiga lotu i lenei uluai faamoemoe, o le faauuga a le Atua na faaaogaina ai fanau i le faatinoina o vaega eseese o le polokalame.

O le toatele foi o tagata sa auai i lea po, ua latou iloa tino ma malamalama o le aufaipese a le SOL3 MIO sa fofoa atu ma faafailele atu le latou taleni i totonu o le aoga aso sa ma le autalavou i Magele.

O le vaitaimi o le tuuaga na a’o ai le tele o polokalame, ona o le naunautaiga o le susuga i le faafeagaiga ma le faletua ia faaaoga taimi nei o le tuuaga e taofiofi mai ai fanau talavou o le ekalesia i le o i tafaoga ma taaga a tupulaga ae tatau ona faaaoga lelei avanoa nei e ola auauna ma ola vivi ai i le Atua.

E 3 tausaga agai atu i luga i le autalavou matutua sa pau iai le mamafa o le faatinoina o le faamoemoe, ma e 3 ma le afa vaiaso na tapenapena ma a’o ai e fanau le tele o nei sauniuniga.

Pei ona saunoa le susuga i le tausi matagaluega ia Rev Logopati Mataafa, e ui i le faigata le taimi na aoaoina ai fanau ma tau tuufaatasia le faamoemoe ae na faigofie mea uma ona o le faatasi mai o le Agaga o le Atua faapea ma le lagolago o aiga lolotu, ma le komiti filifilia o le polokalame.

O le susuga i le faafeagaiga na saunia le sauniga lotu e tatala aloaia ai le polokalame, ae o ni matua faaleagaga foi o loo iai le maeaalofa ma le taleni o musika mai le Atua ua faafaigofie ai ona tuufaatasi le tele o musika ma pese na faagaioi ai le faamoemoe.

O le feau momoli i le amataga o le tausaga ia Faaauau pea galuega o le Talalelei i totonu o tupulaga talavou. Ua tele foi le sootaga vavalalata a le aganuu ma le talalelei a le Atua i lenei polokalame.

O loo iai le dvd a lenei polokalame o loo iai, e mafai ona fesootai i le 02102725365/(09) 257 0107 i le susuga i le faafeagaiga ia Rev Logopati Mataafa ma le faletua ia Lealofisa Mataafa.