Afioga i le alii Palemia Tuilaepa Sailele Malielegaoi

Afioga i le alii Palemia Tuilaepa Sailele Malielegaoi

E teena e le taitai o le atunuu, le susuga Tuilaepa Lupesoliai Sailele Malielegaoi, faamatalaga e faapea i lona faumalo i le faagasologa o le fono usu a le malo. Faaalia e le Palemia e sese lea faamatalaga, ona e mafua ona faauilavea soo i faipule o le fonotaga a le Palemene o le tau faatonutonuina o alii ma faipule o le maota i le faagasologa o le fono.

“E ala ona ou faauilavea soo ona o le toatele o faipule o le maota, e omai i le fono, e aunoa ma le faitauga o pili ma tulafono, la e faaulu mai i le Palemene mo lona faatalanoaina.” O le mea lena e ala ai ona ou faauilavea, o nisi e agai mai e na’o na faitau ae leai ma se malamalamaaga i pili ma mataupu la e faitau, o le ala lena a ala ai ona ou faauilavea, e faasa’o se mataupu o loo faatalanoa.”

“O le mea matagā o le malamalama o tagata la e faalogologo mai ma faauiga le pili, ae leai ma se malamalama o latou sui faipule o loo omai i le Palemene.” “O le aogā foi o le mataupu lenei ua laga, ou te fia ta’u atu ma faailoa atu i le atunuu, e lē o se faumalo, ae o lea ou te taumfai e fafau ni taitai lelei mo le atunuu i le lumanai.”

O le vaiaso na tea nei i le fono a le Palemene, na oo lava i le Fofoga Fetalai ua faatonu atu e le taitai o le atunuu, i le fesuisuia’i o ana faaiuga, e lē gata i lea o le faauilavea soo i se finagalo o se faipule.

“E lē o toe pei fono o aso nei i fonotaga a le Palemene e pei o aso ia, a fai se fono e fai ai lava e seāseā faauilavea, auā foi la e malamalama lelei sui a faipule i se pili poo se tulafono e pasia e le Palemene, e leai se mea e ala ai ona faauilavea.”

“Manatua lelei, e toaitiiti lava sui faipule tuai o loo totoe, e aofia ma a’u, a’o isi e fou uma, o le fautuaga lava ia o le malamalama lelei, ma ia teu fatu o le mafuaaga e ala ai ona faalavelave, ia ta’u atu e faasa’o, a lelei ona malamalama, o le taitai lelei lea mo Samoa mo le lumanai.”

O le taimi muamua lea ua fai ai e le malo le valaauina o pulenuu ma sui o nuu mai afioaga i Upolu ma Savaii e auai i taualumaga o le fonotaga a le Palemene.

“O le mea tonu lava lena ua valaaulia ai pulenuu ma sui o le nuu, se’i omai se’i mata’itu ma faalogologo i manatu ma finagalo faaalia a latou sui faipule i totonu o le Palemene, poo fai ni manatu mo le lelei o latou nuu pe leai foi.”

Saunoa le Palemia o le isi lea fautuaga na ia tuuina atu i pulenuu ma sui tamaitai o nuu, ina ia silasila toto’a i le filiina o latou sui e fai ma sui o latou afioaga ma itumalo i le Palemene.

“E aogā le filiina o tou sui i le Palemene e aumai manatu ‘anoa, e iai le mafuaaga e ala ai ona sau i le Palemene, e tatau ona sau e finauina le lelei o atina’e o le nuu, ae lē na’o na sau e faalue i le nofoa ma faamalulu i le ea malulu ae leai se mea e faia.” O le finagalo o le pulenuu o le afioaga o Vavau, na ia faaalia manino, e sa’o lelei le saunoaga a le Palemia, i lea itu, o le filiina o sui faipule, ma e lē o se itu e faatamala iai, auā o le mea moni lava ia, o loo faafofoga le atunuu, ma e iloa gofie le faipule e tapena lelei, iloa gofie le faipule e leai sana tapenaga pe a faafofoga mai iai.

“O isi sui faipule e mae’a lelei le fonotaga e leai ma sona finagalo faaalia, e na te lē iloa pe aisea.”

O le tausga na tea nei lea na faaulufale ai mo le taimi muamua se a’oa’oga faapitoa mo faipule o le maota i tulaga tau tulafono i lona malamalaga aemaise o lona faauigaina i le Iuniveste Aoao o le Pasefika i Saute. O le aano o le a’oa’oina o mataupu tau tulafono i totonu o le tausaga, ma e oo lava i se tasi o alii loia, na auai ai i le a’oa’oga lea. Saunoa le Palemia o fuafuaga uma na e lelei mo sui faipule o le maota e fia agai mai i upufai a le malo.