O iai sou faamoemoe e te faamavae ma le HRPP?
E puupuu lava le fesili ma sa faapea e na’o e tali mai lava i le Ioe poo le Leai a le alii Faipule.
Peitai e lē o le tulaga lea na iai, talu e lē o se mataupu e faata’eta’e aluga le tofa o lolote ai mea nei tau i upufai a malo. Aemaise ai lava o lea ua oia Pule ma Salafai, ae o lagona o se toalua o lana autau (faipule) ua matuā lagona ona ulufia i le tiga.
Aemaise ai lava i le faipule o Gagaifomauga Numera 3, le susuga a Laaulialemalietoa Leuatea Polataivao Fosi Schmidt, o Fagaee, Sasina , Letui ma Aopo. O itumalo uma lava o loo aafia i le suiga fou lea, o le tulafono o faigapalota pe a oo ina pasia nei.
Ae na’o le toalua lava faipule o Salafai na faaleo faalauaitele i le Palemene a la finau malosi e tetee i le pili lenei, e aofia ai ma le afioga Olo Fiti Vaai, poo Levaopolo Talatonu o le itumalo o Salega.
Ae o isi faipule o Salafai o loo olo lava le fua ma alu i le faiva a Tautai o le faalologo i le foe mua. O le isi vaega o le tulafono lenei, e aafia tele ai itumalo o Salafai, ona o le tetele o lola palota a itumalo o Savaii, e tele atu le numera o a latou tagata palota e maua atu i fale palota i Upolu i le taimi e faitau ai faaiuga o palota, nai lo le aofai o tagata palota i falepalota i Savaii.
Ae o le suiga fou la lea o le a aafia ai faipule o Savaii, ona ua faamalosia ai e le tulafono fou lenei, le tagata e palota i le itumalo o loo nofomau ai, o Upolu poo Savaii. O se faiga o le a aafia uma ai lava faipule, ae o itumalo faapalota mai itumalo faaalalafaga na iai.
O lea faiga fou, e taofia ai faiga amioletonu o le palota o tagata e nonofo mau i Upolu i le faipule o Savaii, poo tagata Savaii e nonofo mau i Upolu e palota mo se faipule i nuu i tua poo le taulaga foi.
O itumalo o Gagaifomauga Numera 2, le isi itumalo o Savaii, e tele tagata o lana lisi e nonofo mau i Upolu. O le itumalo lea e aofia ai Paia, Samauga, Lefagaoalii, Matavai, Faletagaloa ma Fatuvalu.
O lona uiga ua atagia i le tulafono fou lenei, e faataga ai na’o tagata ua iai suafa matai e nofo mau i Upolu poo Savaii, e palota i o latou itumalo. Ae o isi tagata uma e leai ni suafa matai i lalo o le tulafono, e te palota lava i le mea o loo e nofo mau ai.
O aafiaga tele na o faipule o Salafai faatasi ai ma le aveese o le isi ana sui faipule mai le maota, ae faaopoopo ai le faipule o Upolu.
Tali a Laauli
O le soisoi masani lava a Laauli na amata ai lana tala. “O lea lava ou te i le HRPP. Ma ou te lē faamavae. Aisea o le a ou faamavae ai fua na tuli mai a’u e lo’u itumalo, ou te sau i le HRPP (Human Rights Protection Party)? O le vaega faaupufai e puipuia aiātatau a tagata. Ma o le ala foi lena o la’u finau o le aiā lena a lo’u itumalo e faaleo ai o latou lagona i le mataupu na talanoaina.
Fesili: Ae ua avatu se tala a le taitai o le vaega faaupufai, le Palemia e te alu ese ai ma le HRPP?
Na atili ai ona leotele le soisoi a Laauli ma ia faapea mai, “E leai se tala poo se tusi ua oo mai ia te au. Ma ou te iloa lelei lava afai ae ou faamavae, o lona uiga ua leai se sui o lo’u itumalo i le Palemene, ae o lea ou te alu i Savaii i le vaiaso fou, ou te fesili i lo’u itumalo i so latou finagalo.
Ae ou te faatali i le isi faigapalota oi luma (2021) poo le ā le finagalo o lo’u itumalo i le mea e tatau ona fai. O taualumaga o fono a le Palemene i le vaiaso na tea nei, i le po o le Aso Gafua na agiga ai le mataupu lenei i le tulafono o faigapalota.
I le saunoga a Laauli na lologo ai Samoa atoa: “Faafetai mo le avanoa, sa olo pea le fua ma faalogologo i taualumaga o mataupu tāua o lenei afiafi, ae o le talosaga, e tuusa’o i le minisita ma le taitaifono, ua maitau ma le faanoanoa tele, ona e leai leai ma se teuteuga e tasi na apoapoai atu ai le komiti o talia e lau afioga i le Minisita. Lea foi sa matou faaleo o matou manatu mafatia, sa matou faaleo o matou lagona e telē le aafiaga o matou, e lē faigofie o loo faalogologo mai le atunuu , ae ua maitau i le afiafi lenei lea o le a soloia le tulafono, leai se mea e tasi o avatu na lagona, toeitiiti fā masina o fono le komiti, ae o lea ua maitau i le tulafono i le po lenei, e te lē amanaia se matou tuualalo. O fea o lafoai iai o matou manatu ma lagona? Fea o lafoai iai manatu o le motu na omai, sii mai le fala sii gata ia Salafai atoa? E lē faigofie le mea lenei, o le aveese o le sui o Salafai ae faaopoopo le …
Faauilavea le taitai o le malo: Lau afioga i le Fofoga Fetalai, o le tulaga ua iai, ua sau lava le lipoti ma fai iai le faaiuga a le Kapeneta, ma fai i totonu o le Palemene. Ia a faapefea nei ona toe sa’i, ua pasia le tulafono? O uiga lava ia, a’o tulai mai foi le sui o le taitaifono, sa faapena foi mea na tutupu. Ae o le mea e agai iai tulaga o tulafono faataoto, o le mea lava lena ua iai.
Laauli faaauau: “E lei faigofie mea nei, ta lē lavā ma, i lenei nofoaiga na matou omai o atoa matou, ae o le a matou foi atu ua lē atoa sui o Savaii, ae o lea ua leai se aogā o fautuaga na avatu.
Palemia faauilavea: “O teuteuga nei e faagasolo nei, o teuteuga o faigapalota ua 28 tausaga talu ona faagasolo. Na faia iinei na teuteu ai ma le faavae, ua tatala ua lē na’o matai, ae ua tatala ia avanoa faifeau, o tausi, o tagata ua 21 tausaga e palota. O le suia o le aofai o le kapeneta mai le 9 i le 13 e pei ona saofai ai lē na saunoa nei i le kapeneta.
Na fesiligia ai pe tatau ona lua ni maota o le Palemene, ae ua tasi lava i le maota lenei. Mai le tolu i le lima tausaga, o tatou nofoaiga, ia lava le taimi e faia ai galuega. O le toe faatulaga o itumalo, mai le lua o faipule o itumalo tetele ae tasi itumalo laiti. O lea ua tasi le itumalo tasi le faipule.
Ua tasi le faipule tasi le palota tasi le itumalo, ma le suiga mulimuli lenei o le tagofia ai o le mataupu lenei ua iai nei, ma laa ai loa le malo e fofo le mataupu lenei i le teuteu o tuaoi, e lē aafia ai tuaoi faaleaganuu. Ae o tuaoi faapalota lea ua teuteu. Laauli: “A faavasega i le faigofie ua aveese le faipule o Savaii…..” Palemia: “E lē o ni vale na faataotoa le tulafono, e telē le galuega sa fai…” O le aso 12 o Mati e toe usu ai le fono a le Palemene.
