Na masii mamao mai se vaega o le Kolisi faafaifeau i Malua faatasi ma nisi faia’oga ona o le fia auai i le aso fiafia o le susuga i le a’oa’o faai’uaso, le susuga ia Geoff Petaia Fuimaono faapea lana manamea o Daphne Safata Tupu Tuia. Na faataunuuina le sakalameta o le faaipoipoga i le Aso Toonai aso 26 o Ianuari, i le ekalesia Metotisi lea na faatumulia i tau’aiga, uo faapea le ekalesia Metotisi ma le EFKS. E lē gata i lea o auauna a le Atua sa faisao ma molimauina lenei aso faapitoa mo le ulugalii fou. Na lagiina viiga e le ekalesia Metotisi.
Na taitaia le sauniga e le afioga i le Sea o le Sinoti a Kuinislenai ia Rev Kolani. O le susuga i le toeaina ia Rev Lance Tautiepa o le Pulega EFKS Sisifo sa molimolia talosaga ae o le susuga i le faiaoga mai Malua Rev Taipisia Leilua sa faitauina Afioga Paia a le Atua ma saunia se upu folafola mo le aiga fou.
O tuaa o le faato’afaiava o si ona tamā o Galumalemana Aki Fuimaono Naoia mai Fagalii faapea si ona tina o Itulua Fuimaono mai Nofoalii. O tuaa o le tamaitai faaipoipo ia Daphne Safata, ua failagi le folauga a si ona tamā ia Fuialii Sola Pisaimalo Tuia (Vaiee, Tiavea & Fagalii) ae ua totoe nei si ona tina o Esi Tupu Tuia mai (Vaigaga & Malie).
O grandparents o Daphne o auauna a le Atua sa iloga foi i le ekalesia Metotisi i aso ua mavae. E ui ina momoe mai tiasa, peitai e olaola pea o la taimi i le tele o alalafaga sa tala’i ai le finagalo o le Atua, ma e tai uiga tutusa ma le tulaga ua iai nei Daphne, ua tuua lava le Ekalesia Metotisi ae liliu mai i le EFKS ona o le galuega a le Atua.
O le faafeagaiga ia Tupu Tuia o le Metotisi ae o le faletua ia Siniu Tupu Tuia o le EFKS peitai na avea i laua o auauna a le Atua i le ekalesia Metotisi pei ona silafia e le toatele.
O le faatasia la o le susuga i le a’oa’o mai le Laumua ia Geoff Petaia Fuimaono faapea le tamaitai o le ekalesia Metotisi e le faigofie ona tau fesootai lagona i tapuaiga peitai ona ua tasi i la’ua ia Keriso, o le ala lea ua autasi ai o la finagalo, ua avea ma tino e tasi o fitafita malolosi foi i laua e tau mo le galuega ale Atua.
O le tausaga faaiu lenei o le susuga i le A’oa’o i le kolisi, ma ua alagatatau lenei avanoa ua faasoaina ai o ia auā le tauina o le taua faaleagaga, e lē gata e faamalosia i le itu faaleagaga ae o le itu faaletino ia paleni.
Ua sauni atu nei le susuga i le a’oa’o ia Geoff Petaia ma le faletua ia Daphne Safata Fuimaono e malaga atu i Samoa e faamae’aina a’oa’oga o le toe tausaga ma sauni ai mo le galuega folafola i se lafumamoe o le a valaauina ai i laua. Na fesui foi manogi o le lolo i le faafofoga a aulotu e pei ona faia felaugaiga a susuga i a’oa’o mai le kolisi o Malua i nisi o falesa, a’o lei tuuvaa atu mo Samoa.
O le tofa ia Tolu Pisa sa tu tootoo i faaaloaloga a’o Loli Levu sa fai ma sui o le auvalaaulia, o ia foi le sui o le matagaluega Metotisi a Akesa e faafetaia aiga na lua ona o le matagofie o tapenaga uma o le aso o le ulugalii fou, faapea le taumafataga na saunia e le Uncle Sam’s Catering (Toleafoa Papalii Poulava Sam ma le faletua ia Lona Matautia).
