O le tau faaiuga o le tausaga 2018, na valaauliaina ai le Pulega Faatonu o le 2FS-Radio International ma o ia foi o le Sui Taualoa o le Samoa Times i Sydney NSW, i le tatala aloaiaina lea o se poloketi a uso Apoliki o le nuu o Wilcannia o le Ituaiga (tribe) ua faaigoaina o Barkinji poo ‘Tagata o le Vaitafe’.
O se mafutaga ua atoa nei le lua o tausaga ona amataina, i se fesootaiga na afua i le leitio faasalalau pei ona ta’ua i luga. O le vaitaimi lea o tulai ai se manatu o nisi o loo galulue ai, ina ia maua se avanoa e maua ai se mafutaga a le Fono Samoa, e feiloai ai ma tagata Wilcannia, ma se’i latou molimauina ai le tāua o lo latou silafiaina, poo ai moni i latou.
Ona o le Pulega Faatonu o ia o le ta’ita’i o le Komiti Faafoe o le ‘SAMOA DAY’, o lea na ia tuuina atu ai loa lea mataupu tāua i le Fono Samoa NSW, e avea o se Sini Autu o a latou galuega, ma avea ai o so latou sao tāua tele iIe toe fagufaguina lea i loto ma lagona o nai o tatou uso Apoliki, ina ia toe tata’i lo latou loto i le tāua o i latou ma latou toe faatāuaina ai a latou Tu ma Aganuu Masani.
Ina ua lape le fuafuaga a le sa Ta’ita’ifono i lea taimi, o lea na toe manatu ai le pulega a le leitio, e toe faaauauina pea lea fesootaiga ma Apoliki o Wilcannia, e ala lea i lana auaunaga sa avea o se tulaga vavalalata na maua ai pea lea fesootaiga.
E ui lava la i le tele o taimi e le o malamalama ai latou i le tatou gagana Samoa, ae na avea lava lea ma vaega tāua na lu’itauina ai pea i latou i le toe taumafai lea e toe faatāuaina la latou gagana, ae maise ai o a latou Tu ma Aga masani.
O se polokalama fesoasoani sa tapenaina lea e le tamaitai Samoa ia Foketi ma lona to’alua ia Kelvin ua silia ma le 20 tausaga o galulue ai pea ma toe tau tapu’eina lagona ma agaga o tagatanuu o Barkinji Tribe, lea na latou valaauliaina ai loa ma le pule-faatonu o le Foafoa Samoa o le sui foi o le Samoa Times i Sydney, mo lea aso faapitoa.
O le faamoemoe, ona e silia ma le selau tagatanuu o Barkinji (tuaa) ua leva ona maliliu, ae leai ni faailoilo (maa-faamanatu) mo i latou. O lea na taumafai ai loa Foketi ma Kelvin ina ia faia se polokalama e galulue ai pea nei tagatanuu Apoliki i le faatinoina o maa-faamanatu e manatuaina ma faaaloalogia ai nai o latou matua ma matua o o latou matua ua leva ona maliliu.
O se polokalama na vaaia ai le lagona loto mafatia ma le loto momomo o nei tagata, ona o le tulaga ua le amanaiaina ai i latou ma tuulafoaina ai pea e le Malo o Ausetalia.
O Wilcennia e tu i le tuaoi o setete e tolu o Ausetalia, ae i le li’o o le setete tele o New South Wales. O le ituaiga foi o tagata Apoliki e ola faalagolago i le vaitafe, e pei ona latou ola mai ai i le silia ma le 2000 tausaga ua tuanai.
Ae paga lea ua latou le toe maua lea faamanuiaga, ina ua polokaina e papalagi ma Saina faifaatoaga le suavai ma tataiese atu ia latou faatoaga, ae matamatafua ai loa nai tagata nei. O le ituaiga lenei o Apoliki ua faaigoaina o le Tagata Brkinji poo lona faasamoaina, o ‘Tagata o le Vaitafe’.
I lea valaaulia na tuuina mai ai le avanoa mo le sui, ina ia faia ai se tautalaga e faatatau i le ‘Tāua ma Sootaga o Tu ma Aganuu’. O se lu’itau foi lea na tuuina e le sui i uso Barkinji ma ona Ta’ita’i i lea aso.
O se vaega sa ese foi sa latou silasila i ai, ona sa manatu le sui ina ia momoliina le Feau i lea aso i tulaga mamalu faasamoa, i le lavalavaina lea o le siapo, ulafala ma le fue lauga, na avea ma tulaga na sui ai lagona ma faalogona o tagata Apoliki o Barkinji, ma alu ai lava le afiafi o tuufesilisili lava i le uiga o teuga ma laei faasamoa.
Ona o lo latou fiafia ma le faagaeetia, o lea na lauga ai le Tagata matua lava o le Ituaiga, ma ia folafolaina ai le amataina o le mafutaga faaleaiga a Barkinji ma Tagata Samoa, ma ua latou folafolaina foi e leai lava se vaega e toe fefefe ai o tatou tagata i le taunuu atu i Wilcannia, aua ua malu puipuia uma soo se Samoa i lalo o lea saunoaga.
O loo ua taoto nei le aso o le Faaleleiga o le 2019, e avea ma aso o le a toe feiloai ai le sui ma nisi foi o tagata Samoa o le a mafai ona malaga atu, mo le faatinoina aloaia faaleaganuu o lea Feagaiga Faauo a Barkinji Tribe ma Samoa.
O Wilcennia sa tuuina atu ele Malo Ausetalia se vaega tupe e $6 piliona i le tausaga 2010, mo le atiinaa’e ma tapu’eina o le soifua o nei tagata. Ae peitai na taaalo ai agents a papalagi ae leai se tupe e tasi na mauaina pe atiina a’e le soifuaga o tagata. I le tausaga e 2017 na toe tuuina atu ai le silia ma le $100 miliona, ae na faapena foi ona leiloa poo le Council poo agents o folo molemoleina ia tupe.
I se lipoti o le tausaga talu ai, o loo toe faataoto mai ai le $30 miliona e faamatuuina atu mo Wilcannia mo le tausaga lenei. O se fuafuaga o loo popole tele i ai le finagalo o le Ta’ita’i o le Tribe, le tamaitai ia Monica.
