O le Aso Sa ua tuanai 27 o Ianuari na faamanatuina ai le Aso faapitoa mo Tupulaga a le ekalesia EFKS a Southwest Brisbane. Ua fuafua faatoa faamanatu le aso faapitoa o Tupulaga e le Pulega i le Aso Sa a sau nei, aso 3 o Fepuari.
Sa masani ona faamanatu lenei aso tāua i le Aso Sa lona lua o Fepuari ae pe a ma se lua ni tausaga talu ona sui mai i le faaiuga o Ianuari. O se aso foi e sili ona tulimatai iai le tele o tupulaga auā o se aso e faapitoa mo latou.
I le Ekalesia lava a Southwest Brisbane, o tupulaga e i lalo o le faamalu o le autalavou lea o loo Peresetene ai le afioga ia Mataafa Samuelu Mataafa, Failautusi Sulufaiga Fatu ma le Teutupe o Vao Matautia.
E faalogo uma le autalavou ma tupulaga ia i latou ua avea ma taitai aemaise le Peresetene, ae ua tuumavaevae lava ia tofiga o le galuega a le Atua.
O se vaitaimi pisi foi lenei ona o loo faia pea sailiga seleni e faatupe ai pasese a Tupulaga Talavou auā le latou soo ma le Ekalesia EFKS a Vaitele ona faatasi atu lea auā a latou faafiafiaga tuufaatasi ma isi tupulaga a le Matagaluega EFKS a Kuiniselani lea o le a faafiafia ai i le fonotele i Samoa i le aso 18 o le masina o Me o le tausaga nei.
Na faalologo ma sioa tupulaga i se feau saunia lelei ma le logomalie sa tapenaina mo latou e le susuga ia Rev Dr Aukilani Tu’iai, o lē sa avea ma faiaoga i Malua lea ua valaauina mo se ekalesia EFKS i Brisbane.
Ua mae’a le lotu o Tupulaga a nisi o ekalesia e aofia ai le ekalesia EFKS Southwest Brisbane ae o le Aso Sa o lumanai, ona tuuaofai lea o le Pulega ma ua tapena mamao foi faaevagelia, viiga o le Atua ma vaega uma auā le Aso Sa faapitoa o tupulaga i le vaiaso a sau nei.
