Le toatele sa auai i le faamoemoe o le Country100 FitClub

Le toatele sa auai i le faamoemoe o le Country100 FitClub

O le ola soifua maloloina o tatou tagata Samoa ma le Pasefika, o le sini autu lea o le taula’iga o le vaai ma le silasila alofa a le faletua ia Ana Leota-Lu Uisa ma nisi o tina Samoa na latou amataina le Zumba i le tausaga talu ai, i le pitonuu o Mt Druitt.

I se saunoaga a le faletua ia Ana, na ia ta’ua ai le lei faigofie ona tau faaofiina lea lagona i loto o o tatou tagata, ona o le vaaiga faaletagata. Ae sa lei faavaivai ai lava le finafinau o le faletua, ona o lona vaavaai lea ma le alofa i le maua ai pea o o tatou tagata i le tele o faama’i aemaise lava i le tulaga o le soona puputa tele.

Na ia faafetaia ai nisi o tina talavou, ona o lo latou faatāuaina ma talitonuina o vaega uma e pei ona ia finau ai pea. Aua ua avea lo latou talitonuina o sana taumafaiga, ma auala e tosina mai ai loto o nisi o tina mai isi atumotu pasefika, ma faapea foi nai a latou fanau tamaitai.

O le afiafi la o le Aso Faraile 18 o Ianuari, na toatele nisi o uo ma aumea ae faapea foi aiga o tina o le Contry100 FitClub, sa faatasi atu i ai, ona o le fia molimauina lea o le taualuga o a latou polokalama faatinoina, ma faaaloalogia ma taualoa ai foi ma latou o e na latou mauaina tulaga muamua i vaega taitasi o le faaleleia  lea o lo latou soifua maloloina.

I latou na lautogia i faailoga taualoa. (Piilagi Aiatia, Kelly Abraham, Faletua Fili Pauli)

I latou na lautogia i faailoga taualoa. (Piilagi Aiatia, Kelly Abraham, Faletua Fili Pauli)

O nisi o latou na mauaina tulaga muamua o vaega taitasi e aofia ai le tamaitai Maori o Kelly Abraham na aveesea mai lona tino le 51cm. O le tamaitai ia Piilagi Aiatia na ia mauaina le tulaga muamua o le tele o le ga’o aveeseina mai lona tino. Ae o le faletua o le faafeagaiga AOG ia Fili Pauli na ia mauaina le manumalo i le aveesea lea mai ia te ia o le tele o kilo poo le mamafa. O le faletua ia Lima na ta’ua e Ana, o se tamaitai na avea ma lu’itau ia te ia, ma o se tina na maualuga lana vaai i ai.

I le taualuga o lea afiafi na faatinoina ai e nisi o tamafanau a Samoa ni faafiafiaga siva, aemaise o se taumafataga matagofie na tapenaina lava lea e tina o le Zumba mo malo ma valaaulia i lea afiafi.

Ua toe tapena nei la le kalapu faamalositino, mo le faaauauina o lea taumafaiga lelei, mo lenei foi tausaga 2019 ina ua siitia mai ai le toatele o tina ma tupulaga ua auai ai i lea faamoemoe lelei. E momoli ai le faamalo i le faletua ia Ana Leota Lu ma le vasega o faiaoga o le Zumba, ona o le galuega lelei o loo latou tapenaina mo le soifua maloloina ma lelei o tagata pasefika.