E silia i le toaafe usugafono a le ekalesia Aso Fitu Tutoatasi Samoa poo le SISDAC sa tumutumu i Samoa i le vaiaso o le Kilimasi ma le vaiaso o le Tausaga Fou 2016 ona o le fonotaga tele e ta‘ifā tausaga ma usuia a le ekalesia aoao i le lalolagi. O le tumutumu ai o le taulaga i Apia i usugafono ona o le fia molimauina e tagata lotu o le galuega tele e fitu miliona lona tau atoa, le Malumalu tapuai autu ma isi maota tetele o le ekalesia ua fausia ma faatuina i lona nofoaga autu i Saleufi i Apia.
“O le galuega lenei sa tagi lava i lima o le ekalesia i matagaluega eseese,” o le finagalo faaalia lea o le Taitai Aoao le susuga i le faifeau o Uili Papu ina ua maua se avanoa e faatalanoa ai. O le tasi lea o itu sa molimauina i le ola o le ekalesia ona o lea ua faaalia e le taitai aoao ua lima afe ma sili atu le aofaiga atoa o tagata lotu o le ekalesia i Niu Sila, Hawaii ma Amerika, o Amerika Samoa, Ausetalia ma Samoa.
O le fonotaga ua usuia i Samoa e lē gata ina maimoaina ai e tagata lolotu le galuega sa tigaina ai e saili tupe, ae sa talanoaina ai nisi o mataupu i le lotoifale o le ekalesia i lona faagaioia ma le pulea.
O le tupu ma le ola o le ekalesia ua faaopoopo ai ni Matagaluega lea ua tolu i Upolu ae tasi Savaii ona fā lea o matagaluega i Samoa. “Ou te talitonu lava a‘u e lē o se tagata ua mafua ai ona faatuputeleina tagata e auai i lenei tapuaiga, ae o loo galue le agaga o le Atua i tagata”, na saunoa mai ai le taitai aoao.
“O le ola galulue foi o tagata o loo faavae i le ola talitonu i aoaoga a Iesu i le tausi ma usiusitai i le faia o le sefuluai”. O le fonotaga i Samoa sa mafai ona mafuta ai foi tupulaga talavou o le Ekalesia Aso Fitu Tutoatasi Samoa e lē gata i Samoa a o usugafono mai fafo.
O le molimau a le susuga Uili Papu o le lumanai lea o le ekalesia o tupulaga talavou ma o le naunautaiga foi lea o le galuega ia faatalaleleiina olaga o tama ma teine ina ia mafai ona savavali i le Upu Moni ma le tapuaiga moni a le Atua.
Na vaaia i le taulaga i Apia i le Aso Gafua ua mavae i le taeao, le lanumeamata o toniga a Au talavou a le ekalesia mai Matagaluega eseese na auai ise savali umi mai le nofoaga tutotonu o le fuimu agai atu i Saleufi i le nofoaga autu o le ekalesia.
Sa auai tupulaga talavou i polokalame faaleagaga faapea taaloga sa faia i se tasi o fale taalo i le malae taalo o le Faleata sports complex. O le saunoaga a le taitai aoao o le ekalesia, o le tausaga e 1980 na faatuina ai le ekalesia asofitu Samoa tutoatasi ma ua 35 nei tausaga.
