Ua faagasolo i le amataga o le tausaga taumafaiga a sui tauva o le faigapalota i le faalauiloa ai o o latou tagata i le mamalu o le au faipalota. Ua tele tausaga o vaaia faalauiloa e ala i ata faailoa ma isi pepa faailoilo ae o le faigapalota tele lenei ua mafai ona molimauina ai i Samoa i le tatala ai o faalauiloa mo le faigapalota tele a le atunuu i le aso 4 o Mati i lenei tausaga.
O vaaiga i le taulaga o Apia i lenei vaitaimi ua pipii solo ata o sui tauva i tua o taavale, o faleoloa ma ofisa eseese i le taulaga ma isi nofoaga o le atunuu e agai i ai le toatele. Ua faapipii faalauiloa i tafatafā ala ma ua leiloa le ituaiga lapoa, o le tagata lava e tele le tupe ma tele le lagolago o loo maua, o le tele foi ia o ata ua vaaia ma le lapopoa foi lea auā e faatino lava e le tagata ma ana komiti faalauiloa.
Ua lē gata i lea ae ua iai nofoaga ua ola faasolo atoa ai faasalalauga faapisinisi i TV tetele ua faatutū i luma o ofisa ua vaaia foi le ave ai i luga o ata o sui tauva ma a faapea e $100 i le minute o loo faaalu ai ata nei, e mautinoa lava le faitau afe ma afe o tala e alu i nei faasalalauga i le mae‘a ai o faalauiloa o le Palota, ae mo nisi ua leai lava manatu i lea tulaga ona o le manaoga ina ia iloa ma malamalama le aupalota i sui ua tauva i nofoa o o latou itumalo.
O nisi ua unai faatalatalanoaga i luga o leitio ma faamanuiaga i luga o televise i le manaoga lava ina tele palota e maua i le faiga filifiliga tele a le atunuu.
O se tulaga lelei mo atinae poo pisinisi o loo feagai ma le tuufaatasia ma le unaiga o faalauiloa ma ua fautua foi le ofisa o le Komesina o Faigapalota e tāua tele le faatino o faalauiloa ae aloalo ese lava ma auala e iu ai foi i le faamasinoga o faigapalota e pei ona vaaia le toatele na aafia ai tofi faipule i le faigapalota lea na mae‘a atu i le lima tausaga talu ai.
O le toatele o nisi o sui na faapea ona sao atu i le Palemene na toe aveese lava o latou tofi ona o le faamaonia ai o faiga faaalatua.
O oo ia sa masani ona faataga i tausaga ua mavae i le agai ai o faipule e faatino faalauiloa i afioaga o itumalo faaalalafaga na tauvā ai, ua lē o toe faatagaina i le tulafono. O le oo o le sui tauva o le a faatoa faataga i le taimi e manumalo ai ma agai loa i afioaga na lagolagoina o ia.
O se faiga na finauina lava i tausaga ua mavae, o le faa-Samoa peitai o lea ua faatulafonoina le taofia seiloga ua mae‘a le faigapalota a le atunuu.
O faalauiloa lelei e pei ona ta‘ua e le Ofisa o Faigapalota lea e faataga e pei la ona vaaia ai ata nei ua pipii i soo se vaega o le atunuu aemaise o faatalatalanoaga i luga o le ea mo soo se sui tauva lava e fia faamalamalama mataupu o loo ia unaia pe a tulai mai i le faigapalota a le atunuu.
O le aso mulimuli lava o loo faataga ai faalauiloa nei, o le aso a o loma ai le faiga filifiliga a le atunuu o lona uiga o le aso 3 o le masina o Mati e tatau ona oo atu i ai ua i lalo uma faalauiloa nei mai i soo se nofoaga i totonu o Samoa.
