O loo laumanu‘ia i tala ma molimau e faapea, o le po o le Aso Tofi ua mavae le aso 7 o Ianuari 2016, na faia ai e se alii leoleo sa tiute po i le vaega o taavale afi se gaioiga matagā i se tamaitai.
O le molimau a se alii leoleo na ia faaalia ai o loo suesueina e le ofisa suesue le CID (Criminal Investigation Division) le mataupu ina ua faaulu se tagi a le tamaitai. Ua ta‘ua foi e le molimau o ata mai meapueata o loo iloa ai vaega uma o le lotoā ma ofisa o le nofoaga autu o leoleo i Apia, o loo iloa ai nisi o alii leoleo sa tiute ai i le po lea, o loo maimoa i le gaioiga na faia.
O le a lē faailoaina le gaioiga matagā o loo tuua‘ia ai le alii leoleo lea sa ia faatonu lē ua tagi nei i leoleo, e faia ia te ia, seia mae‘a suesuega ma ni moliaga i le faamasinoga. O le tasi lea o mataupu faasino i ni amioga solitulafono ua tuua‘ia ai se Malu o le Malo i le amataga o galuega ma tautua o lenei tausaga fou, e ese mai i se isi mataupu ua faamalolo lē tumau ai ni alii leoleo se toatolu.
O le masina faaiu o le tausaga ua mavae atu nei na faailoa ai e le Komesina le afioga Fuiavailili Egon Keil, le faamalolo mo se taimi lē tumau o ni alii leoleo sinia o le isi o loo umia le tulaga o le leoleo asiasi, ma le isi o se satini. O le isi alii leoleo e leai se taai poo se rank ae ua na o se leoleo (police constable).
O le mafuaaga o le faamalolo oi latou ia e lē o manino ae faatoa iloa tonu le mea na tupu ma mafua ai moliaga o le aafia i ni gaioiga faaalatua poo le official corruption pe a tutulai i le faamasinoga.
E lē o iloa se aso e valaau ai o latou moliaga ae o le talitonuga o le amataga o lenei tausaga fou e fofogaina ai.
O le tiute masani a leoleo o le Kerisimasi ma le Tausaga Fou ua faailoa e le Sooupu le susuga Maotaoalii Taupa‘u Kaioneta, e iai ni leoleo ua molia i moliaga masani faaleoleo ona o le lē usitaia o aiaiga ma taiala e faatino ai o latou tiute. Peitai ina ua fesiligia i le mataupu o loo suesueina ai se alii leoleo o le vaega o taavale afi, e lei mafai ona mautali le Sooupu i lana saunoaga e lei oo atu i lona ofisa se mataupu faapea.
O le nofoaiga a le alii Komesina ua iai nei, ua molimauina e lē o toe masepu se savali ma se nofo a le vasega o leoleo mai lava ia i latou sinia e oo i le vaega o leoleo e leai ni taai.
O le mafuaaga foi lea o le masua i fafo i le faaiuga o le tausaga na tea nei o se tusi ua faailoa ai le lagomia o finagalo o nisi o leoleo matutua i le pulega o le Matagaluega ma ua latou tuua‘ia ai le alii Komesina i le fai faamiliteri o ana faatonuga ma faaiuga.
Na faaalia e se tasi o leoleo sinia, o le lē fiafia o nisi leoleo ona ua latou vaaia e lē o toe iai se avanoa e tuuina atu e le Komesina pe a iai ni faaletonu e aafia ai le auaunaga faaleoleo, e lē gata i totonu o le lotoifale o le matagaluega ae faapea foi i le va i fafo ma le atunuu lautele.
O le saunoaga a le Komesina e leai se eseesega o le faamiliteri o pulega faaleoleo ma pulega faamatai sa ilitata ai nisi o finagalo ma faapea ona saunoa ai le Minisita o Tina ma tamaitai le tofa
Tolofuaivalelei Falemoe Leiataua e leai se sootaga o pulega e lua ona e lē faafitafita pulega a matai.
Na tapa ai e le minisita se faatoesega a le alii Komesina. Peitai ina ua fesiligia le Palemia i lana talanoaga masani ma tusitala i le amataga o galuega o lenei tausaga fou, sa ia saunoa o lana mātau i le saunoaga a le Komesina e ese le vaega o loo faasino i ai poo le context. Saunoa le Palemia e lilifa le finagalo o le alii Komesina i le faamiliteri o le faamatai ona o le itu i le tausiga o le filemu aemaise o le malu o le puipuiga o pulega a matai.
