O le tulai mai o le Samoa Barbarians Rugby Club e faamaopoopo le Corporate Dinner mo le Manu Samoa i le vaiaso ua mavae na maitauina ai le malosi o le lagolago a le mamalu o le atunuu o Samoa i lenei faamoemoe lea sa faataunuuina i le Ellerslie Convention Centre. O le uluai taimi lea ua galulue ai le Samoa Barbarians e tuufaatasi se faamoemoe faapenei mo lana Manu Samoa ae sa iloga le faaalia o laufofoga fiafia o le mamalu o le atunuu mo lana ‘au le Manu Samoa.

E fitu vaiaso sa taumafai ai lenei sailiga seleni, ma le faamoemoe maualuga o le Samoa Barbarians o le tupe e maua ai e tuuina atu lea i lima o tama taaalo auā a latou tapenaga mo le Ipu o le Lalolagi lea e faia i Iapani i le faaiuga o Setema ma le amataga o Oketopa. O le titifaitama o le atunuu na iloga ai le tele o saasaaga ma siva a aiga, o kalapu ma mafutaga sa tauala atu lea i ana tamafanau, aemaise ai o nisi o kalapu o lea ua iai o latou sui i totonu o le Manu Samoa. 

O le mafuaaga lea o le lotulotu atu o le Samoa e lagolago lenei faamoemoe ona e lē mafai ona aveesea le toto ma le tino o le tagata Samoa moni. 

O le tele o tama tuai o le Manu Samoa sa auai, aemaise o alo ma tamafanau o Samoa sa taaalo i le All Blacks lea foi sa faaalia lo latou alofa tulai i le faatauina o latou laulau aemaise o tupe sa tauaaoina. Sa faapea foi ona faatasi atu i ai le afioga i le Minisita o tagata atu motu o le Pasifika ia Aupito Tofae Su’a William Sio, o le afioga i le Konesula o le malo o Samoa ia Faolotoi Reupena Pogi, o sui o le Iuni lakapi a Samoa faapea nisi o susuga i faafeagaiga lea sa maualuga ma matagofie ai le faamoemoe mo le Manu Samoa.

Faaalia foi le tali alofa atu o le Manu Samoa i le tapuaiga a le mamalu o le atunuu e ala lea i le latou siva Samoa faatasi ai ma le latou siva tau lea sa maimoa i ai le tapuaiga a le atunuu ae lei masii atu mo le latou taaloga faitaulia ma le ‘au malosi mai Ausetalia le Wallabies ona tuuvaa atu loa lea mo Iapani mo le Ipu a le Lalolagi.

Pei ona faailoa mai e le Samoa Barbarians Rugby Club e $22,400 le tupe ua tuuina atu nei i lima o tama taaalo o le Manu Samoa auā a latou tapena. O le aofaiga lea o le tupe ina ua uma ona aveese le tupe sa faaalu i tapenaga o le faamoemoe e pei ona iai i le vaiaso ua mavae.

O le loto ma le agaga fiafia o le atunuu o le taumafai lava ia lagolago i le ‘au a le atunuu, auā o le ‘au o loo fai ma avaefu’a ia Samoa i taaloga o le lalolagi, ma ua siitia ai foi le igoa o Samoa i le lalolagi atoa. Soo se sailiga seleni lava e fai e ta’ua ai le Manu Samoa e le taitai faavaivai pe faafiti ai le atunuu i lana lagolago. O le afiafi foi lea sa iloga ona tele ai faamanuiaga a le mamalu o le atunuu sa tuuina atu lea mo lana Manu Samoa auā ana taaloga mo le Ipu o le Lalolagi.

Faaalia le agaga fiafia ma le loto faafetai o le pulega a le Manu Samoa ma lana ‘au atoa i le titi faitama o le atunuu ona o le lagolagoina o lenei faamoemoe ua faapitoa mo i latou.