Fonoifafo Mcfarland Seumanu – Miss Samoa NZ 2019

E lē o se tala lelei lenei mo le faafofogaaga a le atunuu i Niu Sila nei, le maua mai faamaumauga a le matagaluega o le Soifua Maloloina, o loo siitia pea i luga le aofaiga o i latou ua aafia i auga o le faama’i pipisi o le misela. 

I luga o faamaumauga a le Matagaluega o le Soifua Maloloina a Niu Sila, o loo faaalia ai, mai le aso 1 o Ianuari o le tausaga lenei 2019 seia oo mai ananafi, le aso 2 Setema 2019, ua faamaonia ai le oo atu i le to’a 963 i latou ua aafia i le misela i totonu lava o Niu Sila. Mai lena aofaiga atoa, e to’a 804 o i latou ua aafia, o ē o loo nonofo i Aukilani. O se aofaiga ua tatau ona lē toe manatu māmā i ai, ae ua tatau nei loa ona saili se fofo. Na maua se avanoa e faatalanoa ai e le tamaitai o Amanda Taimalelagi, o ia o le sui o le Highlight Team a le Radio Samoa le tamaitai talavou o loo tauaveina nei le pale o le Miss Samoa NZ, ae o ia foi o se tausi soifua faamaonia (registered nurse) le Tausala o Fonoifafo McFarland Seumanu. Ta’ua e le tamaitai tausi soifua, o le misela o se siama e vave tele lona pipisi, auā e mafai ona feaveai e le ea o loo mānavaina. O se siama a oo ina aafia ai se tasi, e matuā ma’i tigaina ai lava, o nisi e iu ina taofia ai i le falema’i mo ni togafitiga pe afai ua ogaoga aafiaga o le misela.

Na saunoa Fono, e faigofie tele ona e aafia i le misela pe afai o loo e iai faatasi ma nisi ua maua i le misela i totonu o se potu poo se vaipanoa ua e latalata atu ai ia i latou o loo mama’i ai, pe a oo ina fetalei pe mafatua foi.

O lenei foi faama’i e lē o taotasi i na’o tamaiti laiti ae mafai foi ona aafia ai tagata matutua, aemaise pe afai e lei faia muamua ni o latou tuipuipui e mafai ai ona puipuia mai aafiaga o lenei faama’i. Na fesiligia i āuga e iloa ai ua aafia se tasi, ma na ta’ua e Fono, e amata lava i le malosi o le fiva, mumu mata, ua tafe le isu ma kale, ma sasao mai le lalavevela pe pata mai foliga ma le ua, ma e vave lava ona aofia atoa ai le tino. Ma e fautuaina lava le vave loa ona vaai le fomai nai lo le taumafai e togafiti ai pea i tua.

O se fautuaga lelei e pei ona ta’ua e le tamaitai fomai, afai ua matua lou soifua ae e te le o mautinoa pe na fai ni ou tuipuipui a’o e laititi e puipuia ai oe mai le misela, e lelei loa ona e agai i le foma’i e siaki i ai pe ua uma ona fai ou tuipuipui; afai e lei faia, ua tatau nei loa ona fai. O le tuipuipui lea o loo faia nei mo tamaiti laiti pe a oo ina atoa o latou uluai tausaga, lea e mafai ona puipuia mai ai i lenei ma’i pipisi o le misela, ma isi ma’i e pei o le mami ma le rupela.

I luga o le upega tafailagi a le matagaluega o le soifua maloloina, o loo ta’ua ai le maua o le tuipuipui e mafai ona faia e aunoa ma se totogi mo i latou e lei atoa le 50 tausaga o le soifua, pe a agai i soo se fomai (GP) Ma o loo iai foi isi nofoaga laiti a le soifua maloloina ua faatulaga e nofosauni e faia na tuipuipui pe a oo atu le mamalu o le atunuu. O nofoaga e pei o le nofoaga faatau i Clendon Shopping Centre i Manurewa, o loo tatala mai le Aso Gafua i le Aso Faraile mai le 9am e oo i le 4pm i le afiafi, faapea le Manukau SuperClinic i Manukau e tatala i aso uma mai le 9am e o oi le 4pm i le afiafi.

Fautuaina foi i latou mai isi nofoaga poo isi atunuu o loo fuafua e fia asiasi mai i Aukilani, e tāua ona fai muamua le tuipuipui a’o lei malaga mai i Aukilani, lea o loo pepesi tele ai le misela.

O le faanaunauga lenei o le tamaitai Tausala Samoa, o loo naunau lava e faaauau ona momoli atu i soo se avanoa e mafai ona ia faatino ai ona tofi o le tausala, ina ia uunaia atili ma a’oa’oina o tatou tagata i auala faigofie ae aogā e puipuia mai ai i latou mai le aafia gofie i faama’i.

Ua amata foi ona asiasia e Fono nisi o aoga i totonu o Aukilani ma fai atu ni ana tautalaga e faamanatu ai i fanau aoga le tāua o lo latou soifua maloloina, aemaise lava i le taimi lenei o loo pepesi ai lenei faama’i poo le siama o le misela.

Ae mo le taimi nei, ua auai atu nei Fonoifafo ma le pulega a le Miss Samoa NZ i le atunuu i Samoa, mo le tauvaga e saili ai se tamaitai e fai ma sui o Samoa atoa, le Miss Samoa mo le tauvaga faaiu e saili ai le tausala o le Pasefika, Miss Pacific Islands i se taimi mulimuli ane i lenei tausaga.