Na tumutumu nisi o le atunuu, o malo valaaulia, o aiga ma uo o sui tauva taitasi faatasi ai ma sui o kamupani ma faalapotopotoga na lagolagoina le faamoemoe lenei o le sailiga o se lalelei mo le asosi o Faafafine Samoa i lenei tausaga 2019, e pei ona sa faia ai i le fale taalo numera tasi poo le gym 1 i Tuana’imato i le po o le Aso Toonai na tea nei.

E to’afitu faafafine na tausinio i polokalame o lenei tauvaga e pei ona sa faagasolo ai mo le vaiaso atoa, na amata mai lava i le sauniga lotu na faia ai i le malumalu tapua’i o le Katoliko i Mulivai i le Aso Sa, 25 o Aokuso, ona faagasolo ai lea o polokalame taitasi i le Aso Gafua na sosoo ai e pei o le tauvaga lauga mo sui tauva. O le autu o lenei tauvaga mo lenei tausaga, “O le Taofia lea o Sauaga, tau-faaleaga ma faailogalanu.” Na galulue faatasi ai le Asosi o Faafafine ma le faalapotopotoga o Malo Aufaatasi e unaia ai lenei manulauti e pei ona faatatau uma i ai le tauvaga lauga mo sui tauva e to’afitu. O nisi o tauvaga na faagasolo ai e unaia ai le faamoemoe autu lenei a faafafine, o se tauvaga poster e lomia ai le autu poo le theme, faatasi ai ma le itu tau taaloga e pei ona auai ai sui tauva e lagolagoina ai le faataua mo le soifua maloloina o tagata Samoa. 

Na faapena foi ona malosi le faia o faalauiloa e sui nei e to’afitu o auala e puipuia mai ai i le faama’i oti o le HIV ma le AIDS.

I le po mulimuli e pei ona taualuga ai lenei tauvaga i le Aso Toonai na molimauina ai le faatumulia atoa o le Gym 1 i Tuanaimato. Na mataina le tapenaina o lenei faamoemoe ma le maualuga na iai lona faatinoina atoa e pei ona sa gafa ai lava ma le asosi lenei o faafafine a Samoa.  O le faaiuga la lenei na iai vaega taitasi o le tauvaga.

WINNER: Honey Solofa (Queen of the North)

1st runner up: Celine Hunter (Queen of Dragons)

2nd runner up: Sandora Obama Poai (The Lion Queen)

3rd runner up: Berta Aliipule (Queen of Flowers)

4th runner up: Petra Travis (Queen of the Ocean)

MAIN AWARDS

Best Queen Attire: Honey Solofa

Best Swim Wear: Honey Solofa

Best Talent: Malingling Tima

Best Evening Gown: Honey Solofa

Best Interview: Honey Solofa

SPECIAL AWARDS

Miss Internet: Honey Solofa

Miss Photogenic: Honey Solofa

Miss Personality: Malingling Tima

Best Speech: Sandora Obama Poai

Best Poster Presentation: Malingling Tima

Sports Faafafine Award: Berta Aliipule

O le sui na manumalo ia Honey Julia Schmidt Solofa, o se alo e faasino i se tasi o tamalii o le atunuu ua faiilagi lana foaluga, ae na tele ni tausaga sa galue ai i le leitio faasalalau a le Malo, le 2AP, le susuga ia John Solofa.

Mai le tauvaga atoa i lea po na molimauina ai e le tatou nusipepa le faafiafiaina o le mamalu o le atunuu, auā o le toatele lava sa naunau e matamata i lenei tauvaga ina ia maua ai le ata i taga mālie a sui tauva. 

E lei faatagaina ona maimoa ai le fanau laiti i lenei tauvaga ona o nisi o vaega e faaalia ai le fai mea malie o sui na tausinio i lea po. O le sui lava ia na ave ia i le silasila a le atunu i le agamalie ma le faaluma, o le susuga lea ia Sandora Obama Poai.

I le taualuga ai o le tauvaga lenei a faafafine na faafetaia ai e le Peresetene ma le asosi le lagolago a le Malo faapea ai ma nisi o pisinisi ma kamupani o loo mafai ona o latou galulue i tausaga taitasi mo le faataunuuina ai o le latou faamoemoe. 

O le masani a le asosi lenei o faafafine i tausaga taitasi pe a maea ai le latou tauvaga, e molimoli ai le latou meaalofa mo le nofoaga o tagata matutua i Mapuifagalele. 

O le tauvaga lenei a faafafine e manatua ai foi se tasi o sui iloga o lenei asosi ua faiilagi le folauga le susuga ia Sooalo Roger Tootooalii Stanley, o se tasi sa taulamua mai i le tele o tausaga ua mavae e tuufaatasi lenei faamoemoe. 

O loo iai le naunautaiga o le Peresetene ma le Asosi o Faafafine ina ia iai se isi suiga o lenei tauvaga i le tausaga fou ma ia tele foi sona sao tāua i le taumafai lava lea e taofia sauaga matagā, o le taufaaleaga ma le faailogalanu.