E lei mae‘a suesuega a leoleo ma e lei faamautuina foi moliaga faasolitulafono faasaga i tagata Satapuala lea e aofia ai ma le faipule, Afioga Toesulusulu Cedric Schuster, o le mafuaaga o le toe tolopo o le mataupu lenei i le aso 6 o le masina fou o Novema, e aunoa ma le tuuina atu o ni tali a i latou uma e toasefuluvalu, mai lea afioaga o loo molia e mafua i le polokaina o se vaega o le alatele o le Malo, e lata i le malaevaalele faavaomalo i Faleolo i le masina o Aukuso.
O le Aso Lua 9 Oketopa 2012 na valaau ai mo le taimi muamua moliaga o i latou nei i le Faamasinoga Faaitumalo, lea sa tulai ai le alii loia, Susuga Papalii Li‘o Taeu Masipa‘u mo se vaega toatele o tagata Satapuala, ae o le alii loia, Afioga Tuala Karanita Enari mo nisi tagata.
E lē o iai se loia a le alii faipule ae ua faaalia e se molimau, e faato‘ā iloa le tulaga lea pe a toe valaau le faamasinoga i le masina fou. O le valaauina o moliaga e na o le toa sefulutolu na oo atu i le faamasinoga.
O le isi toalua e lei maua tusi faamaonia e logoina ai o la moliaga ma le aso o le faamasinoga, ma ua toe faaopoopo aso e sailia ai e leoleo i laua ia. O le isi toatasi e lei oo atu ae ua maua le tusi faamaonia ma ua poloaina ai se tusi saisai e taofia ai i le vaaiga a leoleo e faatalitali ai le aso o Novema.
O moliaga o loo molia ai le faipule o Aana Alofi numera 3 ma nisi o matai o le afioaga faapea ni taulelea ma se tamaitai e toatasi, e aofia ai le lafo o upu faamata‘u i leoleo, faaoolima, umia o ni auupega ma le faamoemoe e faatupu ai se faalavelave, ma le faalavelave i tiute o leoleo.
Pe a matau i ai i moliaga e fesootai uma ma le gaioiga a le nuu na poloka ai le alatele ma le gaioiga a leoleo na agai ai e aveese le poloka o le auala. O matai o Satapuala o loo molia, o loo afia ai se tuagane o le tina o le faipule, Afioga Muagututi‘a Leao Akeripa To‘alepai, o Ga Sakaria lea ua aveese ma faamuta e le malo lona tofi Pulenuu, ma le tofa Vaili Mimita.
Sa oo uma atu i latou i le faamasinoga i le Aso Lua ua mavae. Sa faatumulia le maota faamasino i lea aso i aiga ma tagata o le nuu, faapea le au lagolago ma le au tapuai.
O loo iai le faamoemoe o le faamasinoga, e toe valaau le faamasinoga i le masina fou pe a mae‘a suesuega a leoleo ma faamautu moliaga faaiu.
