E iai le talitonuga o le pulega a le Super City a Aukilani, o le a uigaese ma tele atu ni vaaiga mo le faaaliga o tu ma aganuu a le Pasefika, poo le Pasefika Festival o le tausaga nei 2011, nai lo le tele o isi tausaga ua mavae talu ona amata mai lea foi faaaliga tele.
O loo vaai mamao i latou o loo faatautaia lea foi faamoemoe, e ono oo atu i le 200,000 tagata o le a tumutumu ma agai ane e maimoaina ma molimauina tapenaga o lenei foi tausaga.
Ua 19 ai lea o tausaga talu ona faagasolo mai lea fuafuaga, ma sa tauavea pea mai ma lagolagoina malosi e le pulega faaitumalo a Aukilani (City Council), a o lei suia i le Super City ua iai nei.
O nisi o molimau, ma faamatalaga sa faamatuu mai e le pulega o le itumalo e ala i se pepa o faamatalaga, o loo ta‘ua ai le maualuga o tapenaga ua sauni i ai mo lenei tausaga.
E lē gata i lea, ae ua iai foi lo latou talitonuga, ua sili atu ma faateleina nisi o kamupani tetele ma pisinisi, ua mafai ona ofoina ane fesoasoani ma le tele o vaega moomia e lagolago ai le faamoemoe o tagata Pasefika.
E fai o le tele o kamupani i le lagolagoina i le itu tau i le seleni ma oloa ma isi, ae ua faapea foi ona siitia le fuainumera o faalapotopotoga, ma tagata taitoatasi o aufaafiafia ma tagata eseese o le a auai ma lagolago i le tulaga o faafiafiaaga ma taleni.
O le itu tau i kuka ma le gaseseina o taumafa i totonu o nuu taitasi ma atunuu, sa faaalia foi o le a matuā ese se vaaiga o le a iai, ona o le toatele o i latou o le a faaalia le kukaina o ituaiga taumafa eseese a o latou lava atunuu i lea aso.
O le tulaga i galuega taulima, laei ma mamanu a atunuu eseese, ua faapea foi ona faailoa mai o le a matuā felanulanuai, ma tele mea eseese o le a silasila ma tagai i ai.
O nisi o lipoti o loo ta‘ua ai foi, e iai nisi o suiga laiti i le polokalame autū lava latou ia.
A o totonu lava o nuu ma atunuu taitasi, o le a faitalia lava le komiti a o latou lava atumotu, mo le faapolokalameina o fuafuaga i le aso atoa.
Faailoa foi se fingalo lagolago o le alii pulenuu o Aukilani, Len Brown ma ia ta‘ua ai, o le Pasefika Festival o se avanoa tāua tele mo tagata Pasefika e faalauiloa ai a latou tu ma aga masani, aemaise ai o le faamanatuina o le tele o lo latou sao, mo le atina‘eina o le aai o Aukilani.
O le aso 6 o Mati ua fuafua e amata ai sauniga faapitoa mo lea faamoemoe tele o le aai.
E amata i se tuufaatasiga tele o le a faaaogāina ai le Aotea Centre, mai le Aso Sa, aso 6 e pei ona ta‘ua, ona faasolo ai lava lea seia oo ina faamae‘aina i le Aso Sa aso 13 o le isi vaiaso e sooso ai.
O le Aso Toonai, aso 12, o le aso tele lea o le a faataunuuina ai le anoano o vaaiga eseese i Western Spring e pei ona masani ai i tausaga taitasi, a o le Aso Sa e sosoo ai, e faamae‘a ai fuafuaaga uma ma faatofa atu ai i le Festival o le tausaga 2011.
E oo mai i le taimi nei, e lei faalauiloaina mai se fuafuaga ma se polokalame o le nuu o Samoa mo lenei tausaga.
