E suamalie le manumalo i le amio tausaafia, usitai ma le amio pulea
O le ipu autū mo le autalavou ‘Amio Pulea’ ma le ‘Usitai’, sa faamanuiaina ai le aulotu a Mangere Bridge i le taamilosaga kirikiti sa faataunuuina i le tausaga talu ai, a le pulega a Maugakiekie a le ekalesia EFKS.
O le tuufaatasiga ina ua mae‘a lea taamilosaga tele, na tasi ai ma iu le faaiuga e sola ma tuuina atu le faailoga ma ipu taualoa e pei ona ta‘ua mo le autalavou ma le aulotu a Mangere Bridge.
O le ipu sa saunia e le susuga i le toeaina o le pulega, le susuga ia Rev Pouniu Faamausili. E lē gata i le ipu autū e pei ona ta‘ua, ae sa toe faamanuiaina foi i isi ipu e lua ina ua maua le tulaga lua mai ‘au e lua. O le ‘au a alii sa mauaina le tulaga lua, faapea ai ma le ‘au a tamaitai, sa toe tulaga lua foi i le latou tauvaga.
O vaega tetele ia sa lē tuumāmāina ai e le susuga i le taitai o le ekalesia i Magele, le susuga ia Tone ma le faletua, ae taumafai loa e faia se pati tele, ma se fiafia e faailoga ai taumafaiga sa ausia e lana autalavou mo lena tausaga ua mavae. E ui lava ina manaia ma matagofie le taalo manunmalo ma le tausinioga sa faia i ai tulaga, peitai na saunoa manino le faifeau, e leai se mea sili nai lo le amio tausaafia ma le usiusitai lelei.
O se ata manino lea o le faatinoina o amio ma a‘oa‘oga tāua o loo fautuaina ai, ma faamanatu pea i aso uma e sauni ai mo le faamoemoe.
O le lelei ma le a‘oa‘oina tatau i totonu o le lotoifale, e faapena foi ona faatinoina i fafo atu, mo le tosina ai ma le va fealoaloai ma tagata lautele ma isi aulotu, o se a‘oa‘oga olaola ma le matamata tetele lea i loto ma finagalo.
O le ta o le fā i le afiafi o le Aso Toonai na tea nei, aso 26 Fepuari na faia ai ma tuufaatasia le fiafia tele a le faifeau ma lana aulotu i le paka tele i Magele lava, e faamanatu ai, ma toe manatunatu ai i le tuanai ai o lea foi faamoemoe. Aemaise ai o le faamanuiaina e ala i le samiina i ipu sa manumalo ai.
E leai se isi lagona o lea aso, sa na o le fiafia ma le olioli, ona o le agaga o le manumalo e saili gata, ma e lē faigofie foi ona maua. Peitai o le taulimaina o ia faailoga o le a lē mafai ona galo mo le agai i luma.
Sa ta‘ua foi e le faifeau le susuga ia Tone e faapea, e lē iloa pe toe maua se isi taimi faapea e lana autalavou, aemaise o faailoga sa faamanuiaina ai. Peitai o lea avanoa, ua matuā pepese ai ma alagaina le viiga o le Atua ona o taleni ma le faaeaina.
Ia faamanuia atu foi le Samoa Times mo le faamoemoe o le autalavou, ma le tatalo ia puipui lelei ma taofi le faailoga ma le ipu ua umia mo lenei tausaga, mo le agai atu i taaloga i le faaiuga o lenei tausaga 2011.
