O le toe fausia o le ulugalii o se aiga malosi i le Atua, toe fuataina le va o le tina i le tamā, sitiia le aiga ise isi laasaga fou i manuia o le Atua ma toe tatalo i le faaipoipoga ina ia avea ose feagaiga mausali i le Atua, o le auga lea o aute o le polokalame a le ekalesia o le Sound of Praise Ministry lea sa faatinoina i le faaiuga o le vaiaso ua mavae i le latou malumalu tapuai i Papatoetoe.
E lua aso o lenei polokalame, o le afiafi o le Aso Faraile sa faasoa ai le auauna a le Atua, le Perofeta ia Rev Viliamu Kenese i le upu mai le Afioga Paia a le Atua e tapena ai loto o ulugalii i le faamoemoe o le Aso Toonai. Na faamamafa i le lauga a le Perofeta faiga a le tiapolo ua lepetia ai le mafutaga i le va o aiga poo ulugalii ua mafua ai ona tetea le tele o ulugalii. Ua leai se alofa ina ua sosofa e le tiapolo le feagaiga na osia i le taimi o le sauniga o le faaipoipoga, ma o le ala lea o le lotulotu atu o le tele o ulugalii i le afiafi o le Aso Faraile se’i toe faalogologo i le upu a le Atua ina ia toe maua se aiga mauaa ma mausali i le Atua. O ulugalii matutua e iai tina ma tamā matutua, seia oo i ulugalii laiti sa tumutumu ai le malumalu ma ua lagona foi e tagata uma le tāua o le toe fafagu mai o le Perofeta ma le ekalesia i mea o loo tutupu i lenei vaitaimi.
O le taeao o le Aso Toonai na faapitoa lea i le sauniga mo ulugalii uma sa auai i lenei polokalame, o le sauniga e toe faafou ai le mafutaga i le va o ulugalii, aemaise i ulugalii ua leva ona nonofo ae lei faaipoipo ae sili ai o le aso tāua mo se tasi o ulugalii o lea faatoa nonofo ma faaipoipo i lea sauniga. E latalata i le 30 ulugalii na toe tatalo ai le Perofeta ia Rev Viliamu Kenese i luga o latou mama faaipoipo faatasi ai ma le tatalo e puipui ai le ulugalii ina ia aua ne’i iai se avanoa a le taipolo na te osofai ma lepeti ai le mafutaga a aiga.
Faailoa e nisi o ulugalii sa auai i lea sauniga e faapea, e ese foi lagona o lea polokalame ina ua auai atu i ai. Ua latou faaigoaina o le polokalame e toe faaolaola ai le mafutaga ma faafouina ai se faaipoipoga, ae ua latou iloa foi o le taimi o le Atua e toe tapue ai le ola faaleagaga o tagata i mea o loo tutupu.
O nisi o ulugalii e ese ekalesia o galulue ai ae ua latou faaaogāina lenei avanoa e tulituli ai manuia o le Atua mo le aiga. Na fai lelei le keke o le faaipoipoga lea sa auauai uma ane i ai ulugalii e faamanuia ai lo latou aso fiafia ma faaiu ai loa i le taumafataga na saunia e le ekalesia o le Sound of Praise.
O le taimi muamua lenei ua faatinoina ai se polokalame faapenei i totonu o le ekalesia ae ua maitauina ai le tele o ulugalii o loo galala i le toe faafouina o mafutaga e ala i faaipoipoga.
