‘E lagona le agaga faafetai i le Atua, auā o si amataga faatauvaa mai nai o matou mātua ma le la taleni sa tausi ai si o matou aiga, ae o lenei ua fofoa mai ai lenei pisinisi ua matou sapi ai i manuia i lenei taimi.’ O nisi na o lagona sa faaleo mai e le tamaitai o Regina Etuale-Coffin, o le pule o le pisinisi su’isu’i ma mamanuina laei eseese o alii ma tamaitai Samoa, ae ua lalaga i ai ma isi sikaili eseese faaneionapo ina ia atili matagofie ai nei laei mo soo se tasi e laeiina.

O le Aso Faraile, 20 Setema 2019, na muai fai ai se faalauiloaga aloaia o ituaiga eseese o laei o loo su’iina ma mamanu e le faleofu o le Lalelei, e pei ona tumutumu atu i ai le toatele o le mamalu o le atunuu i le hall a le Livingstone Evangelism Ministries Inc i Magele. O se vaaiga na matuā maofa ai le toatele i le matagofie o laei eseese na faaali i lea afiafi, e fai o su’iga i sikaili ma fua ua moomia ma alumia i nei ona po, ae o le matagofie o lanu o loo mamanuina i nei laei.

I se faatalanoaga ma le tamaitai pule o le Lalelei, Regina Etuale Coffin, na ia saunoa ai, o le Lalelei e moni lava o laua ma lona uso laitiiti o Virginia na amata maia, ae o le taleni su’isu’i ma le mamanuina o laei, na fofoa mai lava e o latou mātua mai Samoa a’o lei autovaa mai le aiga i Niu Sila, lea ua faasolo atu isi i Ausetalia. O le manatu o Regina, o lenei ua sapi ma la faaolaolaina ma lona uso se ‘oa itiiti sa faaputuputu mai e nai o latou mātua mo latou -le tomai e mamanu ai ma su’i ituaiga eseese o lavalava.

‘O si tamai pisinisi sa fai a matou mātua a’o matou ola a’e i Samoa. O lo matou tina e lelei tele lana su’isu’i, ae o si o matou tamā lava e valiina lavalava i soo se mamanu. Ona la’u lea i le flea maketi i Apia e faatau ai, faatasi ai lava ma tagata e gasolo atu i lo matou fale ma su’i ai e lo matou tina o latou ofu.

‘O se vaaiga lena sa masani ai o matou mata mai lava a’o laiti, ma taumafai e puepue maua le auala sa faatino ai le tomai o matou mātua. Ae atonu o le vaaiga sa sili ona matou manatua, o si a la tamai pisinisi lena sa tausi ai matou i le itu faaletino. Sa totogi ai a matou aoga, tausi ai le aiga i mea manaomia o aso taitasi, e lē gata o matou le fanau e to’a 11 (toafitu tama ma le toafā teine), ae sa tausi uma ai ma le matou aiga lautele e nai o matou mātua.

O le tausaga e 1999 na siitia mai ai le aiga i Niu Sila, sa faapena lava ona faaauau le su’isu’i a si o latou tina, le faletua ia Iemaia Etuale; e lē gata o le su’iina o togiga a le latou aulotu, ae sa naunau foi le tina e faaaogā le taleni e faatino ai lana tautua lotu, e ala i le su’iina o laei o le latou faifeau ma lona faletua. I le taimi e tasi, sa amata lava ona faasino i lana fanau le auala e tipi ma su’i faapipii ai le puletasi ma isi ituaiga lavalava.

Amataga o le Lalelei

O le tausaga e 2016, na malaga asiasi ai le tina ai Ausetalia ae tuu ai le fanau lea e iai Regina ma lona uso laitiiti o Virginia. Sa mafaufau tamaitai nei se’i fetagofi loa laua e faataitai ona su’i ni o laua lava ofu ma vali, ae ua faaaliali le faiga atoa i luga o le fesootaiga a le facebook. O la moemitiga nei ma lona uso laititi auā o ia e fiafia i le su’isu’i, ae o Virginia e fiafia le tamaitai e fesuisuiai ana sikaili e lē gata i lavalava, ae o le faiga o ulu ma vali foliga. Pe a aumai se ofu e toe talepe lava e laua ae sui le sikaili ina ia tusa ai ma fua faaonaponei lea ua fiafia i ai. Na la maofa i le toatele o tagata na matamata ane i le facebook ma faaleo mai o latou manatu sa fiafia i le la faaaliga lea na fai.

O iinā na totogo ane ai loa lagona lototele i lenei auso, atonu o le la taimi lenei ua tatau ona faatino loa mea sa na’o le moomoo ma moemiti i ai, ae o lea e foliga e la te mafai ona faia, auā ua vaai atu i taulelei o le moomia o lenei tomai e le toatele o tagata.

O le tausaga lava lena, 2016 na lesitala faaletulafono ai loa le pisinisi su’isu’i ma le mamanu a le Lalelei, ma sa taufai pulupululima faatasi uma i ai latou ma si o latou tina, e fesoasoani foi o la tuagane i le valiina o lavalava. Talu mai lena taimi seia oo mai nei, ua matuā pisi lava le aiga i le taumafai e faatino uma manaoga o tagata ua lolofi atu mo lavalava e fia fai. Ma e lē o natia le moni o lena mea i lenei taimi, i le toatele o i latou ua laei mai i lavalava a le Lalelei. Ta’ua e Regina o le isi mea lea ua sili ona pisi ai o lavalava o laina o faaipoipoga i Niu Sila aemaise foi i Samoa.

Filifiliga o le Igoa – Lalelei

Na filifili mo se igoa, ona tasi ai lea o le a faaigoa le pisinisi o le Lalelei. O le faamatalaga a le tamaitai pule, E tele mea e puna mai ai le manaoga e faaaogā lenei igoa. E mafaufau i le amataga mai o le galuega a si o latou tina, ma le auala sa taumafai ai ia matagofie ma aulelei le su’iina o soo se laei e moomia. O mamanu foi o loo latou taumafai e lolomi ma vali ai ie o loo su’i ai laei, e ave lava i tua i mamanu o measina a Samoa ina ia faaofi i totonu o latou mamanu o loo vali e ui ina tuu faatasi ai ma nisi mamanu faaonapo nei. O le auga lava ina ia matuā aulelei pe lalelei le laei o le a ofuina e se tasi, ma ia lagonaina ai le fiafia a’o malie lona loto i le laei ua saunia. 

O se lu’itau foi la lena sa ta’ua e Regina, talu ai ua tele faleofu poo falesu’isu’i o laei Samoa i lenei vaitaimi, e lē gata i Niu Sila nei, a’o Samoa foi, lona uiga e tatau ona mafaufau loloto latou i nisi sikaili ma nisi mamanu e ese mai ai foi a latou lavalava nai lo le taotasi ai lava i mamanu ma sikaili o ofu e pei foi ona iai isi faleofu.

Ina ua faalautele lana saunoaga sa ia ta’ua ai e iai taimi e o atu nisi ma ni ata o sikaili e mananao e fai ai o latou ofu. Mo ia o loo gaosia lea ofu, e tatau ona ia tilotilo i le fuaitino o le tagata, ma le fuafuaga foi o loo moomia ai le ofu. 

Ma e ui o se pisinisi o loo ia faia, ae e lē taulai lana tilotilo i le tau ina faataunuu le galuega ma maua mai le tupe mai le customer, ae manao afai o le a ofu e le tagata lona laei na su’iina i le Lalelei, ia mautinoa e faamalieina le loto, i le fua o le ofu, le lanu o le mamanu ua valiina ai.

I se isi faaupuga, e moni e tatau ona faamalie le manao o le customer, ae iai lava lona naunautaiga ia faaofi sona manatu pe afai na te iloa, atonu o lena fua e lē fetaui ma le fuaitino o lea alii poo lea tamaitai. Ona ave lea i ai o se fautuaga aemaise lava lona naunautaiga ina ia faamalieina le tagata faatau i le auaunaga a le Lalelei.

O lea po sa faalauiloa ai laina eseese o lavalava e pei o le Gindinia Adorable, o le laina lea o lavalava mo tamaiti, o le igoa o loo tuufaatasi uma i ai igoa o le la fanau teine e toatolu, o Valengina, Adina, ma Virginia. 

O le laina o Puletasi, Muumuu ma isi ituaiga o ofu e masani ai tamaitai Samoa mai aso ua mavae, lea sa faaigoa i si o latou tina, o le fatu lea o lenei pisinisi, le tina ia Iemaima Etuale. 

O le laina o laei mo Faaipoipoga. O le laina o laei faasamasamanoa poo ofu tafao i se isi faaupuga, faatasi ai ma le faalauiloaina o le Lalelei Sister, o laei ia o loo mamanuina ma su’i e le uso laititi o Regina, le tamaitai o Virginia lea ua faamautu nei i Sini i Ausetalia.

Ma na faailoa e Regina, o se pisinisi a le aiga, auā e telē foi le fesoasoani a ona tuagane i le valiina o ata poo mamanu o laei, faapea ma si ona toalua, le susuga Perelini Coffin lea ua la galulue faatasi nei i le faagaioiga o le pisinisi, le Lalelei i Aukilani.

Saunoa Regina, o loo amatamata mālie lava le pisinisi e na’o le latou aiga, ae pe a tusa ai ma le finagalo o le Atua e maua pea le malosi ma le tomai, e tilotilo le Lalelei e fia faalautele atu foi lana tautua i le tulaga, e maua mai nisi masini tetele e faatino ai le valiina o lavalava ma faaopoopo nisi tagata e galulue ai i le pisinisi. 

Ae o na fuafuaga uma, e talitonu maumaua’i Regina, o lugā lava e aumai ai le tali, e pei foi ona sa la faia ma si ona toalua a’o tau amata lenei pisinisi, sa anapogi ma tuu atu i le Atua i talosaga lenei pisinisi e aumai lana faasinomaga i le mea e tatau ona fai ina ia taulau manuia.

O mātua o lenei auso tamaitai ua amataina le la pisinisi su’isu’i, o si o la tamā o Fagalilo Sini Etuale mai Papa i Sataua i le motu tele i Salafai ma Taufusi i Apia, ma lo latou tina o Iemaima Etuale mai afioaga o Falefa ma Tuanai i Tumuā.