E lē mafai ona galo i tama ma teine tuai o le Kolisi o Samoa o loo nonofo i Niu Sila le aoga sa faafailele mai o latou olaga a’oa’oina i Samoa le Kolisi o Samoa. O le upu moni poo fea lava e lele i ai le toloa e maau lava i le vai.

O le ala lea o le latou faamoemoe i le sailiga seleni sa faia i le faaiuga o le vaiaso i le Fale o Samoa i Magele o le sailia lea o se seleni e fesoasoani ai i le totogiina o Textbooks a le aoga a le Kolisi o Samoa sa faatau atu i NZ nei.

Mo le silafia ua sui le faagaioiga o le aoga ua le o toe faatinoina e le Matagaluega o Aoga a le Malo o Samoa ia vaega, ae o lea ua i lalo o le Samoa College Board of Trustee. O le mafuaaga lea o le galulue faatasi o sui o le SCOPA i NZ nei faapea le Komiti Faatonu i Samoa i lenei faamoemoe.

E na’o le 20 laulau sa taumafai i ai ona sa fua i le telē o le fale sa faatino ai le sailiga seleni (Maota o Samoa). E momoli ai le agaga faafetai i pisinisi, ma paaga faapea sui o SCOPA NZ sa auai e lagolago lenei faamoemoe. O le susuga ia Tauiliili Alpha Maiava sa fai ma fofoga o le po ma sa ia tuufaatasia faafiafiaga o le po e pei ona fesoasoani mai ai i latou nei:

• Mema Wilda and Jason Slade (ex Samoa College students)

• Waina Lei Ieremia (ex Samoa College student)

• Soul Brown

• Tejit Records

• Saia Sola

• Punialavaa (ex Samoa College students) Sa faatoai mai le talosaga a le Samoa College Board of Trustee i Samoa i nisi o sui o le SCOPA NZ ma sa tofia ai le komiti galulue e faagaioia le TextBook Drive campaign e pei ona iai Martin Anae (Bluwave), Peseta Sio Isara (Digicel), Tauiliili Alpha Maiava (The Growth AcadeMe), Nanai Viellani Lale Peteru (Punialavaa) ma Leaupepe Talai Jr Lene (Digicel). Na amata mai lava ia Aperila 2019 lenei polokalame seia oo mai i le Corporate Dinner lea sa faatinoina i le Aso Faraile na mavae atu nei ma fai ai le foai e NZ$12,000 i sui o le Komiti Faatonu o le Kolisi o Samoa (Papalii Reupena Rimoni ma Asiata Ulugia Fala Anamani) sa auai mai i le faamoemoe. 

E momoli atu le faafetai tele a le SCOPA NZ i Kamupani uma lava faapea Aoga sa fesoasoani mai i le faamoemoe o le Textbook Drive a le Kolisi o Samoa. E lē gata i lea o sui taitoatasi o le community a Samoa i NZ nei faapea i latou sa auala mai ai fesoasoani i luga o le upega tafailagi. Faafetai foi i le Afioga i le Konesula Aoao o Samoa i NZ nei ia Faolotoi Reupena Pogi mo lana lagolago i le faamoemoe faapea le Afioga ia Galumalemana Tai Galumalemana (GMANA), Muliagatele Faimalo Allan Stowers (PacificEzy Money Transfer), Paulo Arona (Letasi Limited), Lautofa Tulagalua (House of Decor Limited), Ese Aumalesulu (TeJit Records), Mao Gladys Reed Youssef (Food International Limited), Blue Rose Cafe and Catering, Pacific Business Hub, Samoa Business Network, Samoa Barbarians ma le Miss Samoa faafetai tele i la outou lagolago ma ia faamanuia le Atua ia outou pisinisi faapea galuega o totoe o lenei tausaga.