Toe foi Israel Folau i le Lakapi Liki e taalo mo Tonga

O le a toe foi Israel Folau i le Lakapi Liki e taalo mo lona atunuu o Tonga. Ae ua fesiligia le faataunuuina o le faamoemoe a Folau ma lona uso John Folau ina ua faatea e le Palemia a Tonga Semisi Sika le Laulau-a-Fono a le Tonga Rugby League ona o le tetee o le TRL i le pulega a le Rugby League International Federation (RLIF).

O le a faataunuu ai pea le taaloga a Tonga ma Ausetalia ma Peretania i le tafatolu a le Lakapi Liki, e aunoa ai ma Israel Folau ma isi e iai Jason Taumaholo, Andrew Fifita ma le faiaoga Kristian Wolf. Na tetee le vaega lea e taaalo mo Tonga a’o tumau pea le taitaifono a le TRL George Koloamatangi ma le failautusi William Edwards i tofi.

O le po o le Aso Tofi ua tea nei na fai ai loa ma le filifiliga a le Palemia e faatea le TRL Board. O le avanoa ai o Israel Folau e taalo mo Tonga ua faate’ia ai le faiaoga fou a le ‘au Frank Endacott. Auā e lē o pasia e le RLIF le toe foi o Folau i le taaloga.  I ripoti mai Tonga ua ta’ua ai o le a toe tofia ofisa fou e pulea le aufili Mate Ma’a Tonga. O se tala lelei lea mo le NRL, auā e lei manao le NRL e taaalo Tonga i le tafatolu a’o faaletonu le Laulau-a-Fono a le TRL. Na faaalia ai foi e le NRL le toesea o Tonga mai le tafatolu pe a leai se suiga o lea faaletonu. 

E ui ua faatea e le Palemia le Laulau, ae e iai le aiā a le Laulau e apili ai le faaiuga a’o lei uma le fitu aso. Ua faamaonia foi le apiliina e le pulega o le faaiuga a le Palemia. O loo faatali le aso e fofogaina ai le tagi a le pulega i le faamasinoga i Tonga.  Ua matuā malepe le taaloga i totonu o le atunuu ona o le tetee i le pulega na iai. E 23 ‘au e lei taaalo i taamilosaga a le TRL ona o le tetee i le pulega. Afai e taunuu le auai o Israel Folau i le ‘au a Mate Ma’a Tonga o le a telē le avanoa e manumalo ai Tonga i le tafatolu ma Ausetalia ma Peretania. 

Ua faamuamua e le International Rugby League (IRL) le avanoa e tauva ai Tonga ma ‘au malolosi ona o le maoa’e o le ‘au fou na taaalo i le RLWC i le 2017. 

O le a faatali pe talia e le RLIF le toe faafoi ai o Folau i le taaloga. 

O le lavelave o le pulega ua faamalolo nei na manao ia Israel Folau e taalo mo Tonga. Ae tusa pe lē toe faafoi maia le pulega i o latou tofiga, o le a talia pea ma le fiafia e le ‘au le auai o Folau i le Mate Ma’a Tonga.