Tama fanau a Amaile Aleipata i Aukulani

O le mafutaga a le afioga o Amaile i Aleipata i Aukilani ua leva ona faavae mai, ma galulue fesoasoani mo le nuu ma le ekalesia i Samoa i mea o loo manaomia mai ai le fesoasoani a alo ma tamafanau a Amaile i Niu Sila nei. O le toatele foi o tamā ma tina matutua seia oo i fanau o loo latou faamaopoopoina lea mafutaga ua mafai ai ona toe fesootai aiga uma o Amaile i totonu o Aukilani.

O Amaile i Aleipata e masani ona fai a latou lotu faamanatu i tausaga uma i Samoa, ae o le tausaga ese lenei i totonu o le mafutaga a Amaile i Aukilani, ua mafai ai ona latou faamanatuina le lotu lea a le latou nuu i Aukilani i le tausaga nei i lona taimi muamua. 

O le lagona o i latou o loo taitaiina lenei mafutaga o le tāua o le lotu faamanatu ina ia faamausali ai pea le mafutaga soosoo tau’au a alo ma tamafanau o le nuu i Aukilani, ma ia aua foi ne’i faagaloina le lotu sa tapu’e ma faafailele mai ai le olaga faaleagaga ma le ola faatuatua.

O le aoauli o le Aso Sa, na tumutumu ai le malumalu o le ekalesia Katoliko Christ the King Parish i Mount Roskill i tamafanau uma a Amaile i Aukilani e faamanatu faatasi le lotu o loo faamanatuina i Samoa i totonu o le afioaga. O le faamoemoe ua leva ona fau ao fau po, ma sa tuu foi i le Atua ina ia taunuu ma le manuia, peitai o le sauniga i le Aso Sa ua vaavaai ai le afioaga o Amaile i Aukilani i le toatele o ana tamafanau o loo aumau i Niu Sila, ma o le lelei lea o le Atua ina ua avea lenei lotu ma auala e toe fuifui faatasi ai lupe i le futiafu e tasi. 

O le taulaga o le Misasa Paia sa amata ai le sauniga. 

E eseese tovine o loo galulue ma lolotu ai tagata, ae ua tasi le loto, tasi le tino, tasi le agaga i le Aso Sa ina ua tuufaatasi agaga o tagata uma e apogi le lotu faamanatu a le afioaga lea ua faamanatuina i Niu Sila. O le afioga ia Patele Mosese sa ia taitaiina le sauniga o le Misasa ma sosoo ai loa ma le taumafataga.

Tasi o auga o aute o le lotu, ua mafai ai ona feiloai le mafutaga a Amaile Aleipata ma le tamaitai ia Agnes Loreta Loheni lea o loo avea nei ma faipule o le Palemene o Niu Sila. 

O le tina o Agnes Loheni e mai le afioaga o Amaile ma o le fiafiaga sili foi lea i tamafanau a Amaile i Aukilani nei o loo iai so latou sui i totonu o faalagamaea a lenei atunuu. 

Ua saunoa foi le afioga i le faipule ia Agnes Loheni ua mitamita lona loto e vaavaai atu e ese le toatele o lona nuu i Niu Sila nei, e faafetai ai lona loto i le Atua ona o le galulue faatasi o tagata matutua seia oo i fanau i le faamaopoopoina o le mafutaga, ma ua iai foi lona loto ma lona lagona e fia tautua mo lona nuu. 

Soo se mea lava e fai i le mafutaga o le a latou galulue faatasi lava auā se manuia o le ekalesia ma le nuu i Samoa aemaise o alo ma fanau a Amaile i Niu Sila nei. O le loto atoa foi o le mafutaga i Aukilani, o le a tuu atoa le latou lagolago ia Agnes Loheni i lona tulai mai i le tofi faipule i totonu o Niu Sila ina ia faaauau ai pea lana tautua mo upufai o le atunuu. O le lagona foi lea o tuaa o Agnes Loheni sa iai i lea aso o le fia tautua lea mo le latou nuu i Samoa i soo se mea e fai.

Ua iai le faamoemoe o le mafutaga a Amaile Aleipata i Niu Sila e faaauau pea le lotu faamanatu lea a le latou nuu i totonu o Niu Sila i tausaga taitasi.