Ua faaalia le agaga faanoanoa o se tasi o sui tuai o le Olopeleki a Niu Sila ma le Manu Samoa foi, le susuga Fesolai Vaaiga Tuigamala i le faaiuga a le Fono Faatonu o le Iuni Lakapi a le Lalolagi le World Rugby e pei ona faasala ai nei sui e toalua o le Manu Samoa ia Rey Lee Lo ma Motu Matuu e lē toe taaalo ai mo taaloga e tolu a le Manu Samoa o loma ai nei.

I se feiloaiga a le tatou nusipepa ma le susuga Tuigamala na ia faaali manino ai le lē amiotonu o lea faaiuga ma ua atagia ai le lë sa’o o faaiuga fai a le Komiti o pulea taaloga lakapi a le lalolagi. 

Ta’ua e Tuigamala, na faia lava le faaiuga i totonu o le malae i le taimi o le taaloga e pei ona pepa samasama ai Matuu ma Lee Lo, lea foi na taaalo 13 ai le Manu Samoa, sa tatau lava ona gata ai iina lea faasalaga ae o le toe faaopoopo i ai o lea iloiloga ma faasala ai mo vaiaso e tolu, ua matuiā tele.

E matuā lē lagolagoina e Tuigamala lenei faaiuga, e foliga mai ua afaina ai ma le avanoa o nei sui e toalua mo taaloga o totoe o le Ipu a le lalolagi aemaise ai o taumafaiga a le Manu Samoa. Afai nei la e lē saofagā le Manu Samoa i le Quarter Final o le Ipu autu, o lona uiga e nao le ta’i tasi lava taaloga na mafai ona taaalo ai nei sui iloga o le Manu Samoa, ma ua lē aogā atoa ai le miti sa taumafai mai ai i le fa tausaga talu ai, o le fia auai lea i le Ipu o le lalolagi, saunoaga manino lenei a Tuigamala.

O le toe iloilo ai e se komiti faapitoa o faasalaga mo tama taaalo ae ua uma le taaloga sa faasala ai i totonu o le malae, o se faiga faalēalofa ma le lē amiotonu lea. Ma ua manino mai ai le leai o se tāua ma se aogā o le faaiuga na faia e laufali ma TMO i totonu o le malae i le taimi o taaloga. Ae maimau foi pe ana faapea e faasala mo na’o se taaloga se tasi, ae o le tolu taaloga ua matuā lagona ai le faanoanoa i faiga a le World Rugby e faatatau i ana faaiuga fai. 

O le taaloga lenei o le lakapi, o se taaloga e faatautino peitai e foliga mai ua avea le manatu o le World Rugby i le saogalemu ma le malupuipuia o tama taaalo ma auala ua tau suia ai le faagasologa o le taaloga e pei ona sa amata mai ai. 

Sa tatau foi ona silasila i le ituaiga pue na faaaogā e tama o le Manu Samoa ona o le talitonuga o Tuigamala, e leai se naunautaiga o Matuu ma Lee Lo e pue leaga ina ia lavea ai se isi o tama taaalo a Lusia, peitai na manino lava le ‘alo i lalo o le tama taalo a Lusia lea na foliga mai ai ua maualuga le pue, ae leai se agaga ia pue maualuga ma pue solitulafono.

O le tolu taaloga o le a lē mafai ona taaalo ai Lee Lo ma Matuu o se faanoanoaga tele lea mo le Manu Samoa pe a fua atu mai i ana taaloga ua mae’a, o nisi nei o ana tama taaalo faatuatuaina i le laina i tua ma le laina i luma. Talosia le faamoemoe o le ‘au a le atunuu mo ana taaloga o totoe ai nei mo le Ipu a le lalolagi ia a’e manuia ma saofagā atu ai i le Quarter Final o le Ipu a le lalolagi i totonu o Iapani, faaaliga lea a Tuigamala.

O le susuga ia Vaaiga Tuigamala o se tasi o alo o Samoa na taalo muamua ai mo le Olopeleki a Niu Sila i taaloga faavaomalo e 19, mulimuli ane na liliu ai ma taalo i le taaloga o le lakapi liki e pei foi ona sa filifilia ai i le Toa Samoa mo taaloga faavaomalo e 2, na taalo foi mo le Manu Samoa 15 e pei ona sa taalo ai mo taaloga faavaomalo e 23. 

E lua taamilosaga o Ipu a le lalolagi na mafai ona taalo ai Tuigamala, o le Ipu o le lalolagi i le tausaga e 1991 sa taalo ai mo le Olopeleki a Niu Sila ma le 1999 na taalo ai mo le Manu Samoa. I le taimi lenei ua nofo ai ma faamautu i Samoa le susuga ia Fesolai Vaaiga Tuigamala.