“O a‘u pese uma e fatu mai lo‘u loto”
Ua leva ona aave tala o Vaniah Toloa le tamapese Samoa/Tokelau, ae o lea ua iu lava ina maua taitaia e le toatele le avanoa e feiloai ma lululima ai ma Vaniah, ma momolitino ai a latou faafetai ma faamalō, ona o le mananaia tele o fatuga a lenei alii talavou.
O le CD fou a Vaniah lea ua amata nei ona faalauiloa i Aukilani ma isi itumalo uma o Niu Sila, e mautinoa le matuā alumia o ana fatuga o loo momoli mai ai. E 10 pese o le CD, e 3 pese i le gagana Tokelau, ma pese e 7 i le gagana Samoa. E iai pese o loo pepese faatasi ai Vaniah ma lona tuafafine o loo fai faatasi a la musika, le tamaitai o Jewel Toloa, a o isi pese o loo pese ai na o Vaniah.
Ua anoanoai fatuga matagofie i lenei vaitau ona o le maualuga ua oo i ai tomai o alo ma fanau o Samoa i lenei lava faiva o le musika, peitai o fatuga a Vaniah talu lava ona amata mai, e tutasi lava i le faalogologo, ona e ese foi le auala e faatulaga ai lona siufofoga, ma e faigofie foi ona ia fetuunai solo ina ia maua pese e tosina i ai tupulaga talavou o aso nei, a o isi foi pese o loo toe maua mai ai siuleo o o tatou augatamā a o usuina a latou fatuga i aso anamua.
Ina ua faatalatalanoa e le sui o le Radio Samoa le susuga Vaniah e tusa o lana galuega lenei, na ia ta‘utino ai, o ana pese uma lava e pese mai lona loto, ma e tatau ona faamaonia lana mau lena pe a faafofoga toto‘a lava i upu ma faaupuga o loo ia faaaogā. O le isi foi lea mafuaaga e alu ai se taimi o tapena sana lipine, ona e matuā faato‘ato‘a lelei ona feliuliuai ona lagona, ina ia oo ane i le taimi ua mautu ni manatu e tusi i lalo, ae mautinoa o upu o le a lē gata e logomālie i le fafofoga, ae o loo loloto se feau momoli o afifi mai ai.
Na fesiligia le alii pese i sona lagona i le faafitauli ua tele ina afaina ai foi le tautua pese i lenei vaitaimi, ia i latou o loo fiafia e faatalitali lipine, ona tamomoe loa lea e toe tipi e fai kopi o CD ma faatau atu mo so latou lava polofiti, ae galo ai ua latou faagaoi le meatotino a le isi tagata. Ae manaia foi le manatu na faaalia e Vaniah. Fai mai a ia, e na te lagolagoina le tulafono ua faataatia e puipuia ai meatotino mai ia i latou o loo faia faasolitulafono nei gaioiga, peitai e muamua ia te ia le aano moni na fai ai ana musika – ina ia oo ai ni feau tāua o loo manao ia manuia ai nisi latou te ono faaaogāina pe a faalogologo i ai.
Ia te ia la, o le gaioiga o loo fai e na tagata, e moni e solitulafono, ae a tuu mai i le mafuaaga muamua o ana fatuga, lona uiga o lea ua penefiti o ia, auā ua atili lautele ai le oo atu o ana musika i nisi itu o le lalolagi na semanu e lē oo i ai lana tala‘iga.
Peitai o lana auala e fai e pei ona sa ia faia i se tasi o uso Initia sa faia lea faiga i nisi o ana lipine i Amerika, e talanoa muamua i lea tagata; afai o le mea lea ua mafaufau e fai, ona vavae mai lea o sana seleni ae ave foi se latou seleni, auā o le isi lea auga tāua o lana ia foi taumafaiga, ia aogā ana musika i olaga o tagata, ma ia maua mai ai foi se seleni. Se‘i vaganā la ua faafitauli se isi ma lē fia talia lana ofa, ona faato‘ā agai loa lea i le ooooga o na foi gaioiga faasolitulafono, e pei ona taatia mai ai le faamasinoga.
O pese uma i lenei CD fou, e tofu lava ma le faamatalaga o le mafuaaga na tusia ai, ae mātele lava musika a Vaniah, i lona toe tepa ai i le olaga moni o tama tane Samoa, i le olaga mai lona aiga ma le faiga o le fatuaiga, le tautua aemaise le tausiga faamaoni i mātua, o tuafāfine, o le aiga lautele, totonu o le nuu, ekalesia, ma soo se vala e au i ai le tautua a le tama tane Samoa, o inā o loo iai lona faasinomaga na soifua ma ola mai ai.
O le faaiuga o le vaiaso talu ai, na amata faatau atu ai i nisi o taulaga faatau i Aukilani le CD fou a Vaniah, ma o lana molimau, na maligi ona loimata a o vaai atu i le lolofi mai o le atunuu, e fai o fanauiti, o le tupulaga talavou, ae o nai tamā ma tina matutua, na oo atu lava i le mea sa faamautu ai i le taulaga faatau i Magele (Aso Faraile), Otara (Aso Toonai), ma Avondale (Aso Sa), ona o le fia feiloai ma faamanuia atu ia te ia, ma faatau a latou CD.
Ua amata ona toe tau saili le CD a le Tofi o Tama Tane i totonu o Samoa lea na amata mai ai le faatauina, ae ua amata foi ona toe galulue Vaniah ma lana vaega i le toe tipiina o nisi CD ona ua tele le manaoga iinei lava i Niu Sila, aemaise ota ua amata alu atu i Ausetalia, Amerika, e oo lava i Falani ma Siamani; lea o loo iai i latou e faamautu atu foi i ai le lipine mo le tufatufaina.
E iai le talitonuga o se isi itu sili ua alumia ai lenei CD, auā e lē na o tagata Samoa e mafai ona faalogologo, ae faapea foi i o tatou uso tuaoi o Tokelau, auā o loo faaaogā uma e Vaniah ana gagana e lua, le gagana Samoa a lona tina, ma le gagana Tokelau a lona tamā.
