O le agaga faagaeetia ma le faafetai i le Atua ua ia tauia loimata a o feagai ma le taua o mafaufauga. E lei faaofi gofie le tapuaiga a mātua ma aiga auā sa mataugalu pe tua ma ni ā le tausinioga ae o lea ua sao i manū ma iu manuia, ia ave la le mua i le Atua e ou ona manuia ua tatou tapisa ai nei.
O le afiafi o le Aso Toonai aso 1 o Tesema na alo atu ai alo ma fanau Pasefika sa aoaoina i le Iunivesite a Grifith i se taumafataga tele e fiafia ai ma i latou ua faauu ma iu manuia tausinioga i lenei tausaga e aofia ai ma nai o latou mātua, aiga ma uo.
E faia i tausaga uma lenei faamoemoe e tapenaina e le Asosi a alii ma tamaitai tuai sa aoaoina i le Iunivesete. E pei o a latou mau tauave a faauu se alo Pasefika e faauu uma ai foi ma le aiga atoa auā e lagona le agaga olioli ma le faafetai ona o le tele o nisi o i latou o uluai alo ma fanau ia ua maua lea laasaga i totonu o aiga.
O le auga o aute o lea taumafataga tele e faamanatu ai tu ma aga faapasefika ma o se lu‘i tele lea i nai isi alo ma fanau o taualo pea o latou sa ina ia faamalolosi pea aua le faavaivai ae filiga ile tatalo. O se po na matuai faatumulia e pei ona auai le tele o faafeagaiga faapea taitai o faalapotopotoga, tupu ma e’e o le atunuu na opogi le faamoemoe.
Sa amataina i se sauniga lotu sa taitaia e le susuga ia Rev Ionatana Faaiuaso o le faafeagaiga EFKS i Logan City ona faagasolo lea o fuafuaga o le po fiafia. Ua faamoemoe o le vaiaso fou o le a alo atu ai i latou nei e tauaaoina o latou tusipasi o faailoga tikeri ma e saga viia pea le Atua i soo se mea.
Momoli le faamalo ia i latou e tusa ma galuega fita aemaise foi o alo sa aoaoina i le Iunivesite ua a‘e se finagalo e tuufaatasi i latou ma aiga ma uo e pei ona iai le po anapo.
O nisi o alii ma tamaitai Samoa ua faauu i lenei tausaga:
Mathew Afoa; Renee Chong-Nee; Caroline Feauai-Sautia; Tyrone Girle; Victoria Lealaitafea; Dinah Lews-Boucher; Tusipepa (Sandra) Lilomaiava; Stacey Misa (Maori faaipoipo i le Samoa); Senetenari (Nari) Tamala; Emma Tanuvasa.
