O le alii fai ata tifaga iloga ia Oscar Kightley mai afioga o Faleatiu ma Poutasi i Falealili ua lausilafia i Niu Sila ma le lalolagi i lana ata tifaga na autu mai ai ma isi alo o Samoa i le Sione’s Wedding.
O le vaiaso talu ai na malaga mai ai i Sini nei e faaali la latou taleni o le Drama/Play poo tala faamatala e pei o ni ata tifaga.
O le igoa o lea Tala o le ‘TAUTAI’ na tusia ma faatonutonuina e Oscar Kightley ma le isi alo iloga i le Naked Samoans ia Shimpal Lolesi ma Iaheto Ah Hi.
E toalua isi sui fou ma na sagisagi fiafia le aumaimoa i le faatinoina o le tala o le soifuaga o se tama talavou Pasefika na soifua ane i Niu Sila ma alu i taa‘iga ma amio solitulafono a uo talu ai le utiuti o le mafutaga ma mātua o loo galulue ma pisi i isi tulaga.
Na momoli mai i lea feau le tausia pea o va o mātua ma fanau aemaise le faaaloalo aemaise le sasa soo. Na faalia e Oscar Kightley i le Samoa Times, “Ua tatou masani lava tatou i le tuputupu a‘e ma aoao i upu ma le sasa e faatonutonu ai, e lē gata i lea o le mataalia e faafiafia tagata i Siva ma pese pe a faatonuina e mātua ma tagata matutua.”
O itu nei na fausia mai ai le agavaa o Oscar Kightley i lona tuputupu ane mai Samoa ma malaga ane ai lona aiga i Niu Sila.
“O le tāua foi lea o lenei malaga mai i Sini i le Casula Powerhouse e faaali ai le TAUTAI mo po e lua, e lē gata e faafiafia ai tatou tagata Samoa ma le Pasefika aemaise le Una‘i ai o tama ma teine talavou e fia tuliloaina avanoa fai ata tifaga ma tala faamatala faapenei,” o se saunoaga lea a Oscar.
Na faatumulia le po muamua o le Aso Tofi faapea le Aso Faraile e pei ona faailoa e le sui o le Pasefika i Casula ia Lalau Leo Tanoi. O tau o pepa sa faatauina ai e $20 ma e tusa ma le itua ma le ‘afa le umi o le Faaaliga. O loo fuafua e toe taliu mai i le tausaga fou lenei vaega mo se isi ata Fou o loo galulue ai.
