Ua faato‘ā atoa le vaiaso talu ona see nisi o le au faifaatoaga ma le au faipoloka o le Maketi i Fugalei i le isi itu ala i le fanua o Toleafoa Faafisi, ae tulai mai ai foi se vevesi ina ua agai atu ni alii talavou ma tauai se fale i autafa o lea fanua a o iai faifaatoaga o loo faatau ai a latou meamata i lea nofoaga.
O se tauaiga maa na ta‘ua na mafua mai ona o vevesi o le faaiuga o le vaiaso ua tuanai, na agai atu ai se matai talavou Vaimoso e faatau sana taumafa o le poi i se tasi o faleaiga i le nofoaga lava lea i Fugalei, ae fasi ai e nisi alii e toaono.
Na vave agai ese nei alii ae taatia ai lea alii ma na ave i le falemai e tupulaga o le afioaga na maua mai o loo taoto atu i autafa lava o le maketi.
O aso la na sosoo ai na vaaia ai loa le amata agai mai o tupulaga o le afioaga o Vaimoso e saili poo ai tonu alii ia ua amata foi amio o le faapo o tagata o loo agai atu i lea nofoaga mo faatauga.
Na maua faamatalaga o ni alii o loo nonofo ai i autafa o le nofoaga fou lea ua agai i ai faatauga o fua o faatoaga ae e omai i le atu Fagaloa.
O lea la ua saili e leoleo ia alii ma ua agai foi leoleo i le afioaga o Vaimoso ma talanoa i le pulega a alii ma faipule ina ia tau taofiofia le agai mai o le tupulaga o le afioaga ma taumafai e faaleaga fua nofoaga nei ona o le lē fiafia i taulelea ia e tau saili, ma ua lē o toe nofo se isi i autafa o le maketi fou lea.
O le faafitauli tele lava lea na tulai mai i le po o le Aso Tofi na tea nei e tusa ma le ‘afa o le iva (9.30pm) i le po ae vaaia loa le sau o se solo tele a le tupulaga talavou mai i Vaimoso agai mai i Fugalei ma amata loa ona tauai fale nei e i autafa ane lava o le maketi fou.
Na vave oo ane le ofisa o leoleo ma lio le nofoaga lea o le taulaga ae taumafai e faafilemu le tupulaga.
Na sosoo ai ma le agai mai o le taavale tineimu ma iu lava ina tafana i le vai le tupulaga na vaovaogata lava i lea po.
O le faafetai a le ofisa o leoleo ona o lea e lei lavea se isi i lea tauaiga maa – ma na vave ona taape ese le tupulaga ae lē faaopoopo vevesi faasaga i leoleo.
O le tausaga na tea nei o luma ane i Matautu lea na tulai mai ai vevesi ma iu ina faaleaga ai ofisa ma taavale sa i luma o fale ma faletalimalo i le Vaisigano.
O loo faagasolo pea faamasinoga o tupulaga na faia ia uiga. O lea foi na matuā aafia ai nisi o malu o le malo ona o le tauaiga maa na tulai mai ai.
Ua iai talita uga ua faaaogā nei e Leoleo e pei ona vaaia i atunuu mamao, ma o talita nei na faaaogā e leoleo i le tali atu ai i vevesi na tulai mai i le vaiaso na tea nei, ma ua leai ai se malu o le malo ua toe aafia i maa na tauai i lea afiafi.
O lea ua ta‘ua ua faasolosolo manuia le matai Vaimoso lea na faaoolima i ai tagata nei ua mafua ai le tali mai i vevesi o le tupulaga o Vaimoso, ae e lei maua se faamatalaga mai i le Ofisa o Leoleo pe o iai la se isi o alii nei ua tuuaia i le faaoogalima ua taofia i le taimi lenei.
Faaalia e le au faifaatoaga le faateia i le tulai mai o nei vevesi, ae o lea foi faato‘ā taumafai e faamautu le nofoaga e faatau ai a latou oloa faatau ina ua agai ese mai i le isi ituala lea ua amata ai le galuega o le Maketi.
