Ua savali nei le lua o tausaga talu ona faamamalu le agai o fanau laiti mai i le lima (5) tausaga seia oo i le 14 tausaga le matutua i aoga, ma ua folafola foi le faasala o mātua e maua pea a latou fanau o faatau o loa i le taulaga i le taimi e tatau ona iai fanau i aoga. O loo iai lava fanau o loo faia lea tulaga ae e le o toe toatele.
Ua agai mai foi le Toomaga mo ē Puapuagatia e tali atu i fanau e le o fia foi i aoga masani a le malo poo aoga a lotu.
O lea ua iai le aoga mo fanau nei ona ua tele tausaga e le o toe aooga, ina ia faamasani ma ia maua se nofoaga e mafai ai ona faaauau aoaoga.
O lea e faamalosia e le Ofisa o Leoleo lenei tulafono ma ua galulue faatasi ai ma le Matagaluega o Faamasinoga atoa ai le Ofisa o Aoga ma le Vaega o Atina‘e o Nuu a le Matagaluega o Tina ma Tamaitai.
E ui o lea o loo iai lava fanau o faia lea tulaga e ui ua agai i aoga, ae e foliga mai ua faaavanoa loa po e faatino ai le faatauina o oloa eseese mai i sei, o ula, o pinesulu o lauulu, mea vilitaliga, afitusi ma isi mau oloa ua mafai ona unai solo e le fanau.
E lalafi mai i Leoleo ma o le toatele ua vaaia i nofoaga ia e iai fale faafiafia i Matautu e faafesagai ma le Uafu i Apia.
Ua agai le fanau i le uafu o vaafaila aemaise o isi lava vaega o le taulaga ua mafai ona ‘alo ‘alo ese mai ai ma le ofisa o Leoleo.
O luga o le taligali i le sa‘oga lea e agai ai i Matautu-tai ua vaaia ai fanau nei ma e oo lava i le leva o le po o loo feoai.
Na fesiligia nisi o fanau ina ua iloa o se auuso e toatolu o le isi e fitu tausaga ae o le isi e 11 tausaga, ae o le tali, o le tupe lea e maua e ave i mātua auā le tausiga o i latou i aso taitasi.
Ua lē lava le tupe maua a le latou aiga, o le la faamatalaga lea ina ua fesiligia. Na mumusu e ta‘u mai igoa ae o le tama laititi na iu lava ina mafai ona talatalanoa mai ma ta‘u mai ai igoa o ona mātua ma e nonofo i Leonē.
O le faamatalaga e agai lava i le aoga i aso uma ae e tuua loa le aoga ona avatu loa lea e o la mātua o oloa nei e agai i soo se nofoaga o le taulaga o Apia e faatau ai.
E vaaia le unai o le fanau i oloa ma na taumulimuli solo lava i le afiafi na asia ai lea nofoaga, i tagata tafafao mai i fafo.
Na uma ona tauanau le isi ae e le o fia faatau papalagi, mālōlō lea o le laititi ae agai atu le alii matua ma na fai i ai le ulugalii papalagi e le o moomia ni mea faamanogi poo ni pinesulu ae taumafai lava tamaiti e unai i ai oloa nei.
E le galulue mātua ae e agai i faleoloa o Saina ma aumai ai oloa nei e agai le fanau laiti e faatau.
Na maua ai foi se teineitiiti e fitu foi tausaga e mai Leonē foi, ma na ia ta‘ua o a lava tupe na te maua i le po e faatau ai ana oloa nei, o le tupe lea e ave i lona tina mo le latou meaai.
Na fesiligia pe iai se isi o toalua i lana galuega ae ia faapea mai e na o ia. Na masalomia lava o loo iai mātua i nofoaga nei e agai i ai fanau ae e le ta‘ua mai e tamaiti ina ua fesiligia.
Na musu foi le teineitiiti e ta‘u mai lona igoa ona na ia faaalia o loo faasā e lona tina le talanoa fua i isi tagata aemaise tagata e iai meapueata.
O lona uiga o loo manino aoaoga ua faia i fanau. Fai mai le teineititi lea e na o ia e faamoemoe i ai se tupe maua a lona aiga ma e fefe nei agai leoleo i lona tina i le faafaigaluega ai o ia.
Faaalia e le sui sooupu o le Matagaluega o Leoleo, o le lapataiga e ave i le taimi muamua e maua ai fanau nei o loo faatau oloa i taimi e tatau ona iai i aoga pe maua foi o feoai solo fanau laiti nei i le taulaga ae e le tatau ona feoai faapea.
“E manumanu tele leoleo i le saogalemu o fanau nei ae e foliga mai o loo solomua lava i o latou mātua le lē mamafa o le saogalemu o fanau ia e faatauina nei oloa ae a maua e faasala lava mātua,” o se faaaliga lea a le Komesina Lagolago o Leoleo.
Faaalia foi e Leaupepe o le a amata nei ona toe agai leoleo i ia nofoaga ae e mautinoa lava le lalafi o le fanau i taimi e agai atu ai asiasiga masani a le Ofisa o Leoleo i nofoaga faitele.
