E ui i lagona mafatia ma tulaga lē mautonu o loo oia ai pea faavae ma le soifuaga masani o le mamalu o le atunuu o loo aumau i le aai o Kalaiesetete talu ai aafiaga o mafuie tetele na taia ai le aai, ae na lei mafai ona taotaomia ai le lagonaina o leo o le olioli ma le faamalieina, o upu o le faamalo ma le faafetai, a o sauni aiga, o uo ma ē masani, e faafeiloai ma faamalo atu i le to‘a 16 o i latou na faauuina mai le polokalame a le Get Ahead Skills (GAS), lea sa faatini i se taumafataga matagofie i le afiafi o le Aso Lulu, aso 20 o Iuni i le faletaumafa o le Lone Star Riccarton i Kalaiesetete.
Pe ā na le to‘a 60 i latou sa auai atu i lenei faatasiga o le faauuga. Na matuā momoli le faamalo i le aufaauu, ona o le agaga finafinau na mafai ai pea ona onosaia siomaga ma tulaga lē sologa lelei i le tele o taimi, a o feagai ma a latou suesuega, seia oo ina tau lau o le faamoemoe, lea na mafua ai lea afiafi o faamanuiaga.
Sa avea ma Fofoga o lena afiafi le susuga ia Pale Sauni (Pasifika Education Consultant for The Open Polytechnic of New Zealand).
Sa aofia i le polokalame ni lauga na fofogaina e lē gata mai le au aooga, ae faapea foi i susuga i faiaoga, aemaise le tufatufaina o tusipasi i tomai tau faatinoina o galuega a le Get Ahead Skills:
(1) National Certificate in Employment Skills ma le
(2) Open Polytechnic Certificate in Career and Self-Development.
Sa momoli le faafetai a le taitaifono o le Lavea’i Trust Inc, Feagaimaalii Leuga Vaipou Saluni i le aufaauu ma o latou aiga ona o le filigā ua mafai ai ona faamae‘aina lelei le aoaoga e pei ona sa feagai ai ma ua ausia ai o latou moemitiga sa tulimatai mai nei aso e tele.
Na faamamafa i le saunoga a Feagaimaalii le tāua o le faaauau pea ona filigā e a‘oa‘oina mea fou ma tomai eseese a o malaulau le malosi o le tino, ma ala le mafaufau e suesue mo nisi tomai ma agavaa fou (“Learning is a life long journey, you are never too old to learn and you are still rowing your boat”).
O le polokalame a le Get Ahead Skills, o loo faatautaia ai ni aoaoga e fesoasoani mo le faaleleia atili o le tele o le mau tomai autū eseese, e pei o le faitautusi, tusitusi, atamai i mataupu tau fuainumera, auā o tomai e aogā tele i le faatinoina o galuega, ina ia lelei e fesootaiga i le gagana ma isi tagata faigaluega aemaise pule o galuega, ia malamalama i le auala e faaaogā ma faasoa ai tupe, ia malamalama i taiala uma e puipuia ai le soifua saogalemu a o iai i galuega, aemaise foi ia malamalama ma iloa ona iloilo ma faia soo se filifiliga i le sailia ma faatumauina se galuega.
O le vaega a le Open Polytechnic, na amata ona galulue faapaaga ma le Lavea’i Trust Inc. talu mai le tausaga e 2009.
E tele avanoa e mafai ona fetuunai ai le aveina o ni mataupu e aoaoina, aemaise le tulaga lelei o alaga‘oa o loo faaaogā mo aoaoga. Toatele foi faalapotopotoga, o aiga ma vaega a ekalesia ua latou faaaogāina le fesoasoani mai le Pasifika Model of Care.
O le misiona tauave a le Lavea’i Trust, ina ia silia ma se to‘a 1000 ni tagata Pasefika e mafai ona latou faaaogāina ma manuia mai lenei polokalame tau aoaoga a le Get Ahead Skills, e pei ona toatele foi isi aiga ma a latou fanau ua taulau manuia ai, e ala i le faauu mai ma tusipasi ua faigofie ai ona maua ni galuega totogi lelei ma mautu, o isi ua sauni e toe faia nisi aoaoga mo ni tomai atili, auā lava le sologa manuia o le soifuaga i tulaga tau galuega.
