Maketi Salelologa o loo i luga o fanua o loo finau ai nei ma le malo

O le fesili o loo fesiligia ai e le atunuu le eseesega ua faatino ai e le malo le aofaiga o le seleni ua o latou ave i fanua o Salelologa mo le taulaga i Savaii ma fanua ua o latou ave mo le malae vaalele i Tiavea ua tali ai le ta’ita’i o le atunuu, Tuilaepa Lupesoliai Sailele Malielegaoi.

O fanua o Salelologa lea ua ave e le malo e tusa ma le 2,800 eka. 

Ona toe faafoi lea e le malo o eka e 2,400, ae faaaogā na o le 400 eka, lea o loo fai ai nei le taulaga i Savaii. E 4 miliona tala ua maea ona totogi e le malo ia Salelologa mo fanua uma nei e 2,800 eka.

O le mataupu la lenei lea ua taoto nei i le faamasinoga, ma e le o mautinoa se aso tonu e faagasolo ai suesuega a le faamasinoga. O le afioaga o Tiavea, e 4 miliona tala na totogi e le malo mo fanua o aiga i Tiavea, mo le 29 eka lea ua fai ai nei le malaevaalele. O le fesili aisea ua eseese ai, ae tele atu fanua o Salelologa nai lo Tiavea.

Na faaalia manino e le Palemia, o le tau amataga mai o le atina’e lenei, na afuafua mai i fuafuaga ao avea le afioga Luamanuave Eti Alesana ma Palemia o Samoa. 

O le miti a lena foi ta’ita’i o le atunuu, ia faaaogā fanua ia, auā e selesele ai lava tagata o le afioaga i Salelologa. Saunoa Tuilaepa na ia toe faafoi le 2,400 ma ona tupu eka ae taofi e le malo le 400 eka.

“Na ou toe faafoi le 2400 eka ae taofi na o le 400 eka e le malo, ae ua totogi le 4 miliona tala mo le 2,872, na ou fai i ai e totogi pea ae toe ave i ai le latou 2400 eka leaga o lea ua tagofia e le faamasinoga, a’o lea la e lei maua mai le faaiuga a le faamasinoga.”

“O le taimi lava e maua mai ai le faaiuga a le faamasinoga ona toe tapa lea e le malo o le toe faafoi mai o le 2,400 eka, pe toe totogi mai e le itumalo le paleni e tusa ma le tau e tatau ona faatulaga ai le tau o fanua nei.

“O le eseesega o Salelologa ma o i Tiavea, manatua foi o tau uma lava mea uma i le lalolagi lenei poo le taavale afi poo le tui penisini, puaa, povi, poo i’a e fagota mai poo taamu e tasi lava le auala e faavae, o le tau i le maketi.”

“E ui ina 20 ma ona tupu fanua o Tiavaea, ae o le faalavelave o toganiu la e ola ai, faatoaga, ma fale o aiga, o Salelologa, e leai a ma se mea o ola ai, na’o mea o ala, poo maa lapopoa e tau alu se taimi o tu’i e masina. Ua fia afe tausaga o nonofo ai Salelologa e le faato’aina se’i vagana ai fue la e ola ai auā pau na o mea e mafai ona ola i luga o ‘alā.” 

O le mafuaaga lena e eseese ai le tau o fanua e tusa ai ma le saunoaga a le Palemia.

Mo Tiavea, o le mae’a o le sainiga lima  e pei ona faatino i le va o le matagaluega a le MNRE a Samoa ma sui o le afioaga o Tiavea, na manino ai le saunoaga a le sui Palemia Fiame Naomi Mataafa, o loo iai aiga e lē o mafai ona tuuina atu se vaega o seleni o latou fanua, ona o loo feeseesea’i ma e lē o maua se tasi o ia aiga.

O le vaiaso na tea nei lea na faaalia ai e le tina ia Vasati Valai Tapuni, le feeseeseaiga a le latou aiga poo ai e sainia le 500 selau afe o le latou lisi i le malo, lea e tusa ma le lima eka le telē o le latou fanua o loo lisi  mo le malaevaalele. Ae o le saunoaga a le malo, o faaletonu ia e fitoi tonu i aiga o le nuu, ae ua mae’a ona faatino le pitolaau a le Malo latou.