O le fuata ma lona lou, o le aso ma le mea e tupu ai, o le taimi foi ma lona suiga. Ua silia i le 20 tausaga o tautua le susuga ia Muliagatele Shiu Singh i le atunuu o Niu Sila e ala i lana faletaavale o le Henderson Cars, na amata mai Henderson e pei ona faaigoa ai le faletaavale i le Henderson Cars, sosoo ai ma Manurewa tuaoi ma Takanini.
Ua siisii pea i luma lana tautua i le atunuu ma ua vaaia foi le tele o taavale i totonu o lana lotoā tuai aemaise ai o le tele o tagata ua faaaogāina lana tautua, o le mafuaaga lea ua toe sailiili ai le susuga i le alii pule ia Muliagatele i se isi nofoaga e faalautele i ai lana tautua auā lava le mamalu o le atunuu.
Ae lē gata i lea sa vaavaai foi Muliagatele i se nofoaga e faigofie ma afegofie e ana tagata faatau mai le itu i Sisifo o Aukilani, ma tagata o loo aumau i le ogatotonu faapea ma tagata i le itu i Saute o Aukilani. O le filifiliga a le alii pule na ia lagona ai e saili se nofoaga i le ogatotonu e faafaigofie mo tagata uma. O Shiu Singh ua faasuafaina nei i le suafa Muliagatele ma ua avea nei o se matai Samoa, ma o lona loto lava o tagata Samoa faapea ma tagata o le Pasefika e faatele i ai lana tautua, ae le tuua ai lona fesoasoani i isi tagata mai isi lava atunuu.
O Manukau ua siitia mai iai le ofisa fou a le susuga ia Muliagatele, ma o se nofoaga ua matuā sili ona matagofie mo lana ia foi tautua mo le atunuu. O le taeao o le Aso Toonai na iloga ona matuā faatumulia totonu o le lotoā fou lea a le Henderson Cars i le 194 Cavendish Drive i Manukau i le mamalu o le atunuu ua lē gata i tagata Samoa, o Tonga ma isi tagata mai isi atunuu e pei o Initia sa molimauina le tatala aloaiaina o le nofoaga fou a le susuga ia Muliagatele Shiu Singh.
Matagofie le faamoemoe o lea aso auā sa toatele susuga i faafeagaiga sa auai aemaise ai o le afioga i le Konesula o Samoa ia Faolotoi Reupena Pogi ma o le saunoaga autū foi lea o le aso na ia faafetai ai foi lea tamalii o le atunuu i lana tautua mo Samoa ua lē gata i taavale ae o ana isi foi fesoasoani i galuega fai a le komuniti a Samoa.
E lei auai le afioga i le Minisita ia Hon Aupito Su’a William Sio ona o nisi o ana fonotaga, ae sa momoli atu ona alofaaga ma lana faafetai i le susuga i le alii pule ia Muliagatele e ala i ana taumafaiga mo le atunuu, e ala lea i lana video sa faaleo atu ai lona loto fiafia.
O le susuga i le faafeagaiga ia Rev Victor Pouesi sa fai ma ositaulaga o lea taeao e momoliina le taulaga o faafetai i le Atua ona ua ausia e le Henderson Cars se isi laasaga fou o lana tautua i totonu o le atunuu.
O le saunoaga a le alii pule ia Muliagatele Shiu Singh na ia faaleoina ai lona agaga faafetai i le atunuu ona o le lagolagoina o lana faletaavale, o lana faafetai foi i susuga i faafeagaiga ona o le auai atu e molimauina le tatalaina o lana nofoaga fou ua iai nei i Manukau.
O le afioga i le Konesula ia Faolotoi Reupena Pogi ma le susuga i le faafeagaiga ia Rev Victor Pouesi na ootiina le lipine e tatala aloaia ai le fale ma faaulufale loa le mamalu o le auvalaaulia faapea ma le atunuu.
O faafiafiaga eseese mai ausiva a Samoa le Tatau Samoa ma le La o Samoa faapea ma le aufaafiafia mai Tonga sa faafiafiaina le auvalaaulia faatasi ai ma le faili lauiloa a le Mapuitiga sa faanofo filemuina le atunuu i le faaletonu o le tau ma le malulu.
Sa faapea foi ona faatasi atu i ai le Miss Samoa New Zealand le tamaitai ia Fonoifafo Nancy McFarland Seumanu ma le Miss Tonga.
O le fofoga o le aso o le susuga ia Tofiga Fepuleai ae sa vaavaalua ma le fetalaiga ia Seumanu Fransis Ioane.
O le auga o aute o le faamoemoe o le tatala aloaina lea o le nofoaga fou o le Henderson Cars, ae sa tatala ai le avanoa i le lautele o tagata e agai atu ai e tusi o latou suafa i le se’i e manumalo ai i le faailoga tupe e $5000.00, o pepa malaga e lua i le alu ma le toe foi mai faatasi ai tino i tupe ma pepa tala oloa mo faatauga o aiga.
O se fuafuaga na iloga ona faatumulia ai le pusa na tuu ai suafa o le mamalu o le atunuu lea e latalata i le afe tagata sa molimauina sa iai o latou igoa i totonu o le pusa.
O le toatele foi o tagata sa auai i lea aso sa faatalitali ma le toto’a pe ono fiti se manuia o lea aso ae peitai e lē mua uma ni vaa, ae pau le vaega sa pito sili ona tāua o le maua lava o le fiafia ma le maua o le taumafataga e tali ai le sua.
