E lē toe fia manatua e le tamā o Aukuso Sale le Aso Sa o Tama o le 2018 ona o lea ua mafua ai le faaiuga a le faamasinoga e nofo sala i le falepuipui mo le 3 tausaga ma le lua masina. O Aukuso e lē mamao lona fale ma le fale o lona nephew.
O le Aso Sa o Tamā o le tausaga ua mavae na o ai lona nephew ma lona atalii 9 tausaga e momoli le taumafataga mo lona uncle o Aukuso ma faamanuia foi i ai le Aso Sa o Tama.
Na tuu le meaai ae valaaulia ane le nephew e lona uncle e nofo atu e inu le la pia ma se’i fiafia ai. Na alu le inuga ma tupu ai loa ma se feupua’iga ua vavane ai i luga mataupu o le latou aiga. Na faifai tetele le vevesi ma vaovao ai loa fusuaga. Na faaalia e leoleo ia latou faamaumauga na mafai ona vavao le vevesi ma agai ese ai loa le nephew o Aukuso ma lona atalii, peitai o le taimi lea na savali ai Aukuso i se vaega i tua o lona fale ma alu ane ai loa ma le laau malosi o le ituaiga o le 12.
A’o savavali ese le nephew ma lona atalii ae o loo tauvalaau atu Aukuso e foi atu e fufusu. E lei ano lava le nephew sa savali ese pea, peitai na toe liliu ane ina ua ita i le valaau a Aukuso e alu atu aumai lona toalua la te momoe. O le foi ane lea na faapapa ai e Aukuso le laau malosi ma faapea ona aafia ai loa lē na faamanu’alia.
Na faanatinati i le falema’i ma fai ai togafitiga. O le silasila a le faamasinoga e matuia tele le solitulafono ona e lē gata o le faaoo o manu’a tuga i le laau malosi ae o le taimi ua lavea lē na aafia sa faaauau pea ona faaoolima Aukuso lea na ia faaaoga ai le u’amea o le fana e ta ai lē na faamanu’alia.
Na finau le loia Aukuso mo se isi faasalaga ae lē o le falepuipui, ae na faaalia e le afioga i le Faamasino le susuga Leiataualesa Darrel Clarke, e ogaoga le solitulafono aemaise o le laau malosi na faaaogā faapea ma le toe faaoolima o Aukuso ae ua vaai atu ua lavea lē na aafia i pulu fana o lana a’upega.
E lima tausaga na amata ai le fua a le faamasinoga i le faasalaga na toesea isi masina ona itu lelei mo lē ua molia faapea lona ioeina o le solitulafono. Na totoe ai le 3 tausaga ma masina e luau a tuli nei i le falepuipui o lona faasalaga.
O le solitulafono lenei na tulai mai ia Aukuso o le tausaga ua mavae.
