O le mae‘a ai o le filifiliaina o tofi o le galuega a le Atua i le Ekalesia Peace Chapel i Magele, na tupu ai se lagona i le susuga i le faafeagaiga ia Peter Leota ma lona faletua ia Vaonila Leota e faia se mafutaga e unaia ai pea le aufaigaluega ina ia iai se filigā ma se mataalia e faatino ai galuega fai auā e pei ona masani ai tatou, a masani loa i le faiga o se mea ona iai lea o le manatu faatauvaa ma le lē tāua. O le agaga lea o loo taumafai e tineia o le agaga masani ai (or familiar spirit)
Peiseai o le manatu laualuga lea i le auauna a le Atua ma lona faletua o le galuega e ao lava ona toe tapena i latou ua avea ma faauluuluga, auā a manuia luga ona tafe mai lea ia i latou i lalo (e tafe mai mauga manuia o nuu, aiga ma ekalesia).
Ma o lea sa fuafuaina ai loa se mafutaga e valaaulia ai nisi o uo mamae i le galuega faafaifeau le susuga ia David Katina ma lona faletua ia Debbie Katina mai Amerika e faatautaia lenei faamoemoe. O ni auauna ua maoae foi lo laua tomai i lea vaega ae o le mea e sili ai o ni alo Samoa e malamalama gofie ai o tatou tagata i le gagana.
O le fonotaga lenei ua faaigoina o le “Breakthrough Conference”, o le manatu autu ia mafai ona manumaloina o tatou tagata i mea o loo taotaomia ai pe taofiofia ai mai le ausia o matatia ma fuafuaga mamana a le Atua i o latou olaga.
Poo le isi ona uiga o le OSOFAI – o lona uiga a osofaia o tatou tagata i le lelei o le Atua e leai se pa puipui o le fai mea lelei, ma le faamaoni ma le fai mea fiafia. E lē tau faatonuina auā ua malamalama i ala o le Atua.
Pei ona maitauina pea o le tele o tagata lolotu ua leva ona lolotu ae leai se agai i luma ona e mafua mai lea i le tele o faafitauli o loo faia‘ina ai, e pei o le fefe, agaga teena, manatu maualalo, agaga mativa, le lē talitonu atoa ai ma le tele o nisi mea o loo saisaitia ai o tatou tagata i le lē ausia o le lelei atoatoa o le Atua.
O le naunautaiga o le susuga i le faafeagaiga ia Peter Leota ma le faletua ia Vaonila i lea polokalame, ia faasafua faamanuiaga a le Atua mo ona tagata, o lea sa valaaulia ai loa le latou mafutaga i Magele i nisi o Ekalesia o loo latou nutimea faatasi i le galuega a le Atua e auai atu e talitali faatasi manuia ua foai mai.
O se mea na faateia ai le Ekalesia Peace Chaple i lea faamoemoe, ona o le toatele o tagata o loo galala i le upu a le Atua. E lua aso na faatinoina ai lenei polokame ae sa vaaia le papa tutu‘i o totonu o le malumalu i tagata o ekalesia eseese aemaise o susuga i faafeagaiga. Ua moni ai le upu o tatou manatu e lē o manatu ia o le Atua.
O se mafutaga e faigata ona tuua e le toatele pe a mae‘a se sauniga, ona o le faamanuia o loto o tagata taitasi i le upu folafola ae lē gata i lea o aitema sa saunia e fanau talavou. O le tele o sauniga i ia aso e lua e uma lava ma faaiu i se iputi māmā poo se taumafataga mamafa e saunia lava e le Eakalesia Peace Chapel. Ua taunuu ai upu a le Tusi, “Se mea ina lelei ma matagofie pe a nonofo faatasi o Uso.”
